والله العظيم فى تشويش بيحصل
الشوشرة على محطات الراديو عموما سببه ابراج ارسال المحمول وشبكات ال WiFi لنقل البيانات بين شبكات النت اللاسلكية والتليفون المنزلى اللاسلكي
كل الشبكات اللاسلكية دى بتعمل تداخل وتدافع على كل الموجات اللى بيعمل شوشرة على الراديو
الأفضل داخل المدن سماع الراديو من خلال اجهزة أستقبال الأقمار الصناعية لانها بتعمل بتكنولوجيا البث المباشر بالميكروويف على ترددات عاليه جدا بعيد عن الشبكات اللاسلكية وبراحتك !!
موجة الاف ام
تتاثر ببعدها عن محطة الارسال
وكذلك على مكان تواجدك هل محاط بابراج سكنية
او ابراج تقوية محمول حتى لو عندك افضل جهاز
انا شارى راديو وام بى ثرى صينى
بصراحة جهاز محترم ماركته h.y.m
من حوالى سنة
ب55 جنيه وشبه الراديو القديم بس رقمى وقد الكف
ممكن تسمع الاف ام بدون حتى ماتطلع الايريال
صوت نقى وواضح جدا بدون شوشرة
ولو فيه تشويش دائم افضل للاسباب السابق ذكرها
هناك حل انك تسمع اذاعة القران الكريم
هو عن طريق الدش
ممكن تعمل وصلة صوت وعلى اى سماعات كمبيوتر صغيرة منفصلة
او على جهاز كاسيت به مداخل لاين ان
وبدون ان تشغل التلفزيون وانا عامل كده برضه اى الطريقتين
اشمعنا قنوات ال اف ام والاغانى زى الفل واذاعة القران الكريم مشوشة ّ!!!!!
بعدين انا عايز اسمع قران عل الراديو الدش العيال على طول واخدينة على الكرتون
ثانيا الواحد بينام على القران بليل فصعب انام والتلفزيون والدش مقتوحين
عارف الترونزيستور بتاع اللومض النيوووووون هات سلكتين عريانين وابرمهم على الترنزوستور. وطرف التاني على الاريل بتاع الراديووو هيقويلك الاشارة ٥٠٪
كان برضو في طريقة عملتها زمان في العربية الشاهين الي كانت عندي ركبت كاسيت بلو بونكيت ... فكان صوت الكلكس بيسمع في الراديو حتى صوت دوسة البانزين. فكان الحل اني جبت مكثف بتاعه زي الايه سي كده اسمها مكثف ٢٠٠. فجبت مكثفين وواد بتاع كسيتات اسمو مصطفى الله يمسيه بالخير عملي طريقة كده ضيعتلي صووووت الكلكس في الراديو خالص
بس بخصوص راديو البيت جرب. حكاية الترونزيستور بتاع اللومض النيون تمنوا جنيه من عند اي كهربائي. واي حتت سلك كده ملهاش لازمة قشرها وعريها ولف. وادعيلي .
عاوز راديو محترم ومش مهم السعر روح راديو شاك
او انزل اول الازهر وادخل محل محترم واشرحله طلباتك فى الراديو وممكن تتفق انك ترجعه لو ماداش الغرض
عندى نفس المشكله و خنقانى جدا وكل شويه احول مره على اف ام ومره على الام و
و الراديو الى عندى مسجل باناسونيك يابانى اصلى
التشويش من المحطه مش من الكاسيت
اعترف ان اذاعه القران بها شئ من الشوشره
لكن علي الاف ام واضحه جدا
الموضوع كما ذكر الاخوه من قبل راجع لاسباب كتير
كمان شوف التردد علي الاف ام معاه اذاعات قريبه منه و لا لوحده لباند كبير
و خلي بالك تردد القناه مش ثابت علي الاف ام
يعني مثلا عندي في السويس بتيجي علي 94.4 و لما اسوق في القاهره لا اجدها علي نفس التردد
كذلك اذاعه القناه عندي في السويس علي تردد و في الاسماعيليه علي تردد تاني خالص
اقولك علي حاجه
مره سافرت القاهره و مشغل الموديلاتور و اسمع زي محاضرات و مره الصوت راح و بقيت اسمع اصاله و انا متأكد ان الفلاشه مش حاطط عليها اصاله
و ثواني و المحاضره ترجع ثم اصاله و عندما اوقفت الفلاشه و شيلتها اشتغلت الاغنيه بوضوح
اتاريني ظابط التردد بتاع المويلاتور علي نفس تردد القناه التانيه و دخلت في مكان كان تردد القناه اقوي من موديلاتور العربيه
،،،،،،،،
سؤال اخير، هل بتكون مشوشه علي الريسفر
بالمناسبه، في اواخر الثمانينيات كان عادي جدا اني اسمع الراديو و اجد موجه تانيه تدخل في الخط و كانت بلغه غير مفهومه وقتها ( مره عبري و مره فارسي) و كانت بتبقي في الصيف
برضه بالمناسبه، كنت باتفرج علي التليفزيون الاسرائيلي بصوره زي قنوات الاتش دي الان، بس طبعا اوقات معينه في الصيف و غالبا كانت بتبقي المغرب الي نصف الليل
هو ملوش دعوه بالموضوع و لكن جت علي بالي، كانت ايام