الموضوع: تقييم الهيونداى ix35 بعد فترة استخدام 12 شهر و8000كم

{ تقييم الهيونداى IX35 بعد فترة استخدام 12 شهر و8000كم }

-----

بيانات السيارة :
-السيارة موديل 2013 / تجهيزات الفئة الثانية / ترخيص اول ابريل 2013/ استخدام 8000كم.
الموصفات الفنية :
-نوع المحرك : GDI السعة اللترية 1600 C Cبقوة 135 حصان.
الظروف التى استخدمت فيها السيارة :
-تم تجربة السيارة فى جميع الظروف تقريباً مثل (السرعة العالية/داخل البلد/على الطرق السريعة/بحمولة 5: 6 افراد بخلاف حقائب / استخدام ايام الحر وتجربة كفاءة التكييف/ الفرامل المفاجئة/ الطرق الغير ممهدة ......الخ

--------{{{{{ التقييم }}}}}----------

وقبل ما نبداء خلينا نتفق ان انا بقيم من واقع تجربتى الشخصية مع السيارة و طبيعة وطريقة استخدامى طوال الفترة منذ تاريخ شراءها حتى الان ، يعنى ممكن يكون واحد تانى اتعرض لمواقف او استخدامة مختلف و تقيمة للسيارة هيكون مختلف فى ضوء تجربتة هو، انا شخصياً استخدامى بسيط وهادى وكلة داخل المدينة ومشوار السفر بيكون من 2: 3 مرات على اقصى تقديرطوال العام،لاكن فى النهاية انا بقيم عن تجربة استخدام فعلى على مدار 12 شهر و8000 كيلو متر استخدام ، وتقيمى يا جماعة هيكون بطريقة محايدة قدرالمستطاع ، الغرض منة محاولة المساعدة والافادة لغيرى إن شاء الله.
أولاً/ الوكيل ومراكز الخدمة :
-انا شارى العربية من غبور (قمة الاحترام والالتزام)، والمسئول فى الفرع ال كنت شارى منة كان بيتابعنى بالموبيل اول 4 شهور، يسألنى عن العربية ويفكرنى بمواعيد الصيانة.
-المشكلة كانت فى عدم شرح السيارة وامكانيتها عند الاستلام بطريقة كافية (ممكن علشان انا مستلم اول دفعة وكان فى حاجات موش معروفة فى العربية – وموش سبب !!!)، يعنى مثلاً لم يتم توضيح موضوع الاضاءة النهارية وال عملت لى مشكلة اول ما استلمت العربية وانا ماشى بيها، الامر الذى سبب لى قلقل كبير لدرجة انى اطريت أركن العربية لغاية ما كلمت المعرض تانى يوم.
-عملت الصيانة فى ابو رواش، (صيانة ال 1000 و 5000) ، والحمد لله ما احتجتش اروح غير المرتين دول فقط . (مركز الخدمة محترم فى مواعيدة/حجزت فى المرتين بالتليفون ورحت فى الموعد).
-تكلفة الصيانة الدفعتها: 350/صيانة ال1000كم + 195/صيانة ال5000كم.
ثانياً / السيارة من الخارج :
-الابعاد مناسبة، والتصميم عصرى ومميز، والعربية فخمة وشيك جداً ، انا شايف انها افضل شكل فى فئة ال SUVللموديلات المشهورة فى مصر(مسألة اراء)،وكمان تم اضافة بعض التعديلات على موديل 2014 فى الفوانيس الليدات، وتعديلات فى الصالون بسيطة، خلت شكل العربية افضل.
-السنسور الخلفى بيسهل كتير فى الركن، لان من غيرة اعتقد كانت الركنة ممكن تكون بتعويرة – وموش حاسس انى كنت محتاج سنسور امامى .

الاضاءة :
-الاضاءة جيدة، باستثناء خاصية الاضاءة النهارية ال عملةمشاكل مع امة لا الة
الا الله (اعتقد موش عملية فى مصر على الاقل فى الوقت الحالى)
-الفوجات الامامية أضائتها ضعيفة ، ومتقدرش تعتمد عليها مع النور الصغير .

ثالثاً/ السيارة من الداخل :
التجهيزات (options):
كافية لحد كبير ، و من وجهة نظرى الشخصية وطبقاً لحاجتى انا الشخصية واعتيادى عليها، هناك كماليات ناقصة و هناك كماليات كان ممكن الاستغناء عنها .
ملحوظة : انا لما بتكلم عن كماليات ناقصة ، بتكلم على اساس أن العربية سعرها 225 الف جم يعنى ما ينفعش مع السعر دى وعربية كورى يكون ناقصها حاجة.
كماليات تنقص السيارة و كان يفضل وجودها :
1.خاصية قفل السنتر لوك بعد التحرك بالسيارة ( اعتقد دى (options) عادى دلوقتى )
2.البلوتوث الخاص باستخدام الموبيل- (موجود فى الفئة الهاى لاين فقط).
3.طى المرايات الجانبية موش من خلال الريموت.
4.عدم وجود وحدات رفع مع الريموت (لتامين وضمان اغلاق جميع زجاج السيارة).
5.زر قفل وفتح الزجاج one touch لباب السائق فقط.

كماليات كان ممكن الاستغناء عنها ، والاستعاضة بها بكماليات اكثر استخداماً، خاصة فى مصر:
1.خاصية تسخين المقاعد الامامية والخلفية .
2.سخان الزجاج الخلفى .
3.الاضاءة النهارية (lighti Day time runnin) والخاصية دى مرتبطة بالسيارات ذات المنشاء الاوربى ، علشان مواصفات السلامة والطرق البتطبقها دول اوربا على السيارات البتدخل بلادها- عملياً محدش فى مصر طول ما انت ماشى ، الا بيشاور لك او بيوقفك علشان يقول لك النور والع.
4.موضوع مثبت السرعة : بالنسبة لى وخصوصاً ان كل استخدامى داخل البلد عدا 2: 3 مرات سفر على الاكثر خلال العام موش عملى، ومحاولة استخدامة فى مشاوير السفر كانت غير مرضية (هناك تجهيزات كانت هتفيدنى اكتر زى البلوتوث)
صالون السيارة :
-تحس بالفخامة والرفاهية والحداثة فى التصميم والتجهيزات الداخلية للسيارة، بس التابلوة كان ناقصه شاشة عرض البيانات.
-نظام الصوت وتوزيع السماعات ممتاز.
-الكراسى مريحة ، والمسافة بين الكراسى الامامية والخلفية كافية ، لاكن الكنبة الخلفية موش واسعة كفاية .
-عزل كابينة الركاب ممتاز - من الصعب انك تحدد لو كانت السيارة تعمل ام لا.
حجرة الامتعة ( الشنطة):
-حجم الشنطة كافي ، وعلشان تقدر تستفيد بحجمها بشكل اكبر لازمتفك الشماسة (كبس)، وكمان فيها ميزة طى المقاعد الخلفية، بتعطى امكانية تحميل اكتر.
التكييف : (ممتاز)
-التكييف ممتاز وصوتة موش مسموع ، وكافى جداً على الدرجات المنخفضة من سرعة المروحة او التبريد، و خاصية التحكم الثنائى فى درجة الحرارة( Dual zone & Cluter lonizer)مفيدة بدرجة كبيرة.
-وجود خاصية التبريد الموجودة فى درج التابلوة مفيدة.
-كان ينقص وجود هوايات للتكييف خلفية (خاصة وان حجم السيارة موش صغير وتوزيع التكييف بيلزمك تعلى درجة التبريد والمروحة علشان يقدر الراكب وراك يحس بالتكييف)،يوجود مخارج للتكييف اسفل الكراسى الامامية بتحسن الوضع، لاكن طبعاً موش زى الهوايات البتكون فى الكنصول وبتوزع الهواء اتجاة الراكب الخلفى .

رابعاً / تقييم اداء السيارة:
-قيادة السيارة بشكل عام سلسة، وارتفعها جيد و ثباتها على الارض وفى الملفات والسرعة العالية ممتاز.
-عزم المحرك (1600) كافى واستجابتة ممتازة على الرغم من وزن السيارة وارتفاعها .
-الفتيس سلس ومريح الموتور واستجابتة للكيك داون ممتازة وسريعة وتجميع السرعة هايل (طلقة) – اقصى سرعة جبتها على الدائرى (170كم) ومكملتش، لاكن اعتقد العداد كان لسة هيجيب معايا كتير.
-عجلة القيادة مريحة جداً، والاوبش بتاعها مفيد (ينقصة البلوتوث للتحكم فى التليفون)
-الفرامل : ممتازة ولازم تتعود عليها، علشان حساسة جداً.
-العفشة : نشفة شوية وخاصة ان الجنط 17،مكنتش حاسس بيها أوى علشان انا كان معايا تيجو، لاكن بعد ما ركبت النيو سيراتو الجنط16 (التطور الطبيعى للعربية الناعمة) ، لا يا جماعة دى حمادة ودى حمادة تانى خالص.

-استهلاك الوقود :
معقول بس يعنى متعتبرش من العربيات الموفرة للوقود، طبعاً راعى وزن العربية وارتفاعها –وبشكل عام استيل العربيات SUV بيكون استهلاكة للوقود اعلى من العربيات السيدان، ودى بسبب وزن وارتفاع العربية البيأثرفى مقاومة الهواء وبالتالى فى زيادة استهلاك الوقود.
طبقاً لمواصفات السيارة ، الاستهلاك ( 7,5لتر/100كم ) داخل المدينة – (5,8لتر/100كم ) خارج المدينة ، بمتوسط 6,4 لتر/100كم.
عملياً فى حدود(6,7 لتر/100كم)فى المتوسط ، طبعاً داخل المدينة.

***

فى النهاية الحمد لله قرار الاختيار كان موفق وموش ندمان ، وانا على استعداد للاجابة على اى استفسار سواء من خلال التعليق على الموضوع او من خلال الخاص.