الموضوع: مقبل على إيجار شقه وطالب النصيحه

المشاركة الأصلية كتبت بواسطة marsguy

السلام عليكم ورحمة الله وبركاته،،،

أنا مقبل على إيجار شقه إيجار جديد

عاوز نصائحكم عشان دي أول مره أأجر

الشقه فيها عفش بتاع المستأجر القديم


صاحب الشقه قال لي المستأجر القديم عاوز يبيع عفش لو إنت عاوز تشتريه

قلتله طب الشقه ممكن تفضى إمتى؟ قال لي ممكن أفضيهالك في يومين لو تحب

دلوقت الأسئله:

• أنا لو قلتله خلاص أنا عاوز الشقه. هاشترط عليه إني أبدأ الإيجار لما يفضي الشقه مثلاً ولا إيه؟
  هتكتب فى العقد اول يوم تستلم فيه الشقة فاضية اى الميعاد اللى هيقولك عليه .
  
  
• وهو إزاي يضمن إني هاكون جاد ومش هاخليه يفضي الشقه وبعدين أرجع في كلامي؟ ياخد عربون مثلاً؟
  ما هو لازم يكتب معاك عقد وياخد منك ايجار اول شهر والتامين اللى تتفقوا عليه ولو كان فيه مقدم ام لا قبل ما يفضى الشقة
  
  
• إيه هو العرف المتبع في التجمع الخامس؟ شهر عموله + شهر مقدم + شهر تأمين؟ ولا إيه؟
  الله اعلم الزملاء فى القاهرة الجديدة يفيدوكوا ان شاء الله
  بس المتبع عندنا ان الواحد بيدفع التامين وغالبا بيقى شهرين وشهر مقدم والعمولة حسب الاتفاق بس عمرها ما بتوصل لشهر ابدا يعنى ربع شهر او نص شهر حسب تعب السمسار معاك
  
• إيه الإحتياطات اللي أخد بالي منها وانا باكتب العقد وأنا باستلم؟
  ان التامين اللى هتدفعوا يكون مكتوب فى العقد مع اخذ ايصال باول ايجار شهرى دفعته وتتاكد من حالة الشقة لو فى حاجة مكسورة حاجة هتتكلف تصليح كتيير وتقوله عليها
  
• أي نصائح تانيه؟ :)
  شوف اخر وصل كهرباء وغاز او تكتب فى العقد الرقم اللى موجود فى عداد الكهرباء والرقم اللى موجود فى عداد الغاز علشان لو كان فيه وصلات متأخرة تخصمها من الايجار بتاع تانى شهر