اصلاح ماستر الفرامل الاماميه للنوفا

**hazemawad** · 08-05-2014 06:56 PM

بعد الدوخه وتحاشى دبح بتوع قطع غيار بتوع الرينو اللى بيدبحونا من غير مايسموا علينا وجدت ان الماستر الامامى للنوفا هانم مأخوذه شف مسطره من الماستر الامامى للبيجو 504 بدون فكاكه .
المهم انى جبت الجلد الامامى للماستر بتاع ال 504 من عند بتوع البيجو ب 18 جنيه ويمكن اقل الله اعلم ولكنى سعيد انى لاقيته موجود وبكثره وبعيد عن بتوع الرينواللى لا هايخشوا لا نار ولا جنه وهايتسابو يتعذبوا بحيرتهم لحد ما يرموا بنفسهم بالنار عشان يرتاحوا من ذنبنا احنا .
وللمعلومه ان التيل بتاع الريجاتا 86 بيركب عندنا بس بعد ما تاكل من التيل وتوصله لسمك 14 مللى وكنت شاريه ب 30 جنيه و ايطالى على ابوه لا تركى ولا صينى ولا اشتغاله بتوع الرينو
وخدوا دى كمان : التيل الخلفى بيركب بتاع الشاهين تيل لزق كامل بالقبقاب و 35 جنيه وبرضو ولا الحوجه للى يسووا واللى ما يسووش.
والله المستعان على الناس الطماعين

**mohsen128** · 09-05-2014 08:53 PM

حصلت معايا في التيل الامامي روحت للميكانيكي قالي ده بتاع الريجاتا ياباشا ، قولتله وانا الي رازع مشوار عشان اجيب التيل وهو جنب البيت ،، والحاجه الغريبه انو قالي طب انا هركبلك تيل بتاع ال 128 وهيشتغل ذي الفل بس لقيته بيحط لقمتين تيل فوق بعض ، قولتله يابا الله يكرمك بلاش افتكاسات ديه فرامل قالي طب اطلع جرب وبرهان هيقفش على الشعره وفعلا كان تمام اوي بس انا خليته يفكه ويركب الي انا جيبه عشان اكون مطمن ،، بس مشيت من عنده وحاسس بالقهر من بتوع قطع الغيار الي بيطلعو عنينا على الفاضي منهم لله وكل واحد بيستغل الناس ربنا ينتقم منه

**ahmedabdelrahm** · 11-05-2014 08:35 PM

الله ينور يا بشمهندس
وربنا يخليك لداتشاويه

و على فكره انا صحلت الكوبلن فى معروف الواحد ب 70 جنيه بالفك و التركيب بعد استشاره حازم باشا

وكنت عايز اغير قربه الميه داتشا نو فا 2000

وسير الكالتينه بتاع الداتشيا نوفا مو ديل 2000 بيتغير امتى

يا ريت الداتشاويه يفيدونا

**ahmedabdelrahm** · 13-05-2014 04:16 PM

رجاله الداتشيا
عايز اغير قربه الميه الاقيها فين و بكام
و يا ريت لو فيه قربه بديله تنفع تركب عليها

وسير الكاتينه بيتغر امتى
داتشيا نوفا موديل 2000

**hazemawad** · 14-05-2014 07:09 PM

المشاركة الأصلية كتبت بواسطة ahmedabdelrahm

رجاله الداتشيا
عايز اغير قربه الميه الاقيها فين و بكام
و يا ريت لو فيه قربه بديله تنفع تركب عليها

وسير الكاتينه بيتغر امتى
داتشيا نوفا موديل 2000

معلش يا عم احمد على التأخير فى الرد لعدم التغرغ للمتابعه...
اما القربه بتاعة الميه بصراحه انا كنت من فتره شايفها عند البساطى وبعت له واحد علشانها قاله مش موجوده .
بس فيه حل بأنك تركب واحده تانيه فى الغالب بتاعة التسعه ( وكنت شايفها عند ارزاق مصر القديمه ) وهيه للعلم اكبر فى الارتفاع فهاتغير مكان تركيبها واتخليها جنب العمه وبعد ماستر الفرامل على السدر الامامى فى الحوض.
اما قيما يخص الكاتينه لو انت هاتعمل عمره قريباً فغيرها او اذا كانت بترزع وعامله صوت خشن للعربيه ومش مستحملها فغير الترسين والكاتينه والشداد قطمه واحده فى فرح جنب طهور واخلص وطبعا مع جوان الوش والجوان المطاطى بتاع الكارتير مع وش التقسيمه.
ولكن يا عم احمد لى عتاب على حضرتك صغير : اولاً مبروك ليك على تصليح الكوبلن ولكن الامور لاتجرى هكذا بيننا على هذه الصفحات... بل نذكر اسم المحل ومكانه ورقم التليفون لو امكن والموضوع بتفاصيله الممله لعل وعسى ان ترشد اخ لك داتشاوى واقع فى نفس المشكله اللى ربنا فكها عليك بفضله... لذا فاسألك الرحمه بزملائك الزياده بالتفاصيل.
ودائما يشرفنى اتصال سعادتك فى اى وقت...

**hazemawad** · 14-05-2014 07:12 PM

المشاركة الأصلية كتبت بواسطة mohsen128

حصلت معايا في التيل الامامي روحت للميكانيكي قالي ده بتاع الريجاتا ياباشا ،

قولتله وانا الي رازع مشوار عشان اجيب التيل وهو جنب البيت ،، والحاجه الغريبه انو قالي طب انا هركبلك تيل بتاع ال 128 وهيشتغل ذي الفل بس لقيته بيحط لقمتين تيل فوق بعض ، قولتله يابا الله يكرمك بلاش افتكاسات ديه فرامل قالي طب اطلع جرب وبرهان هيقفش على الشعره وفعلا كان تمام اوي بس انا خليته يفكه ويركب الي انا جيبه عشان اكون مطمن ،، بس مشيت من عنده وحاسس بالقهر من بتوع قطع الغيار الي بيطلعو عنينا على الفاضي منهم لله وكل واحد بيستغل الناس ربنا ينتقم منه

والله يا عم محسن ربنا يتصرنا عليهم باتحادنا مع بعض وخللى بالك قى ناس منهم متابعين كلامنا بمكن يحسوا شويه ويدخل فى قلوبهم الرحمه...قولوا امين

**ahmedabdelrahm** · 16-05-2014 03:20 PM

و الله يا حازم باشا انا بعد ما اتصلت بيك وقولتى روح الوكاله عند تيحه و بعد ما استخرت ربنا
و انا ماشى عديت على شارع معروف و لسه هادخل الشاع لاقيت اللى بيقوللى تصلح كبالن قمت توكلت على الله وقلت ايوه
را ح جاى ناده على واحد اسمه صابر و فك الكابالن و قالى عايزه تتصلح بره و جوه المهم بكام قالى 280 جنيه فى الاثنين المهم فاصلت معاه لحد 150 جنيه
وبعد حوالى ساعه كان صلح الكبالن وقفل العربيه و مشيت و الحمد لله زى الفل

اللى مضايقنى بقى موضوع قربه الميه
بتاعه الرينو تسعه خرطوم واحد بس
اما الداتشيا 2 خرطوم داخل و خارج

و متشكرين على اهتمامك يا باشا انت و كل الداتشاويه

**hazemawad** · 16-05-2014 06:37 PM

المشاركة الأصلية كتبت بواسطة ahmedabdelrahm

و الله يا حازم باشا انا بعد ما اتصلت بيك وقولتى روح الوكاله عند تيحه و بعد ما استخرت ربنا
و انا ماشى عديت على شارع معروف و لسه هادخل الشاع لاقيت اللى بيقوللى تصلح كبالن قمت توكلت على الله وقلت ايوه
را ح جاى ناده على واحد اسمه صابر و فك الكابالن و قالى عايزه تتصلح بره و جوه المهم بكام قالى 280 جنيه فى الاثنين المهم فاصلت معاه لحد 150 جنيه
وبعد حوالى ساعه كان صلح الكبالن وقفل العربيه و مشيت و الحمد لله زى الفل

اللى مضايقنى بقى موضوع قربه الميه
بتاعه الرينو تسعه خرطوم واحد بس
اما الداتشيا 2 خرطوم داخل و خارج

و متشكرين على اهتمامك يا باشا انت و كل الداتشاويه

منورنا يا استاذنا الكبير ومبروك عليك تصليح الكوبلن
ودايما متواصل معانا بالخير

**mohsen128** · 26-05-2014 03:23 PM

ahmedabdelrahm ,،، معلش على التاخير بخصوص موضوع القربه انا مره كنت بتمشي في الوكاله وبسائل على شويه حاجات للداتشا وبالصدفه عند حد من بتوع الرينو كانت عنده القربه بتاعة الداتشا نوفا بس الباشا طالب فيها 150 جنية وقافش ، بصراحه سبته ومشيت

**bnoqo** · 27-05-2014 12:50 AM

قربه الميه عند ميشيل حليم فى مصر الجديده تمنها من فتره80 جنيه
فيه بديل راكب عندي انا هيا قريه المياه بتاعت الانوس فيها ركبت فى الجزء ما بين الكبوت والصالون