الموضوع: مطلوب رأي الأعضاء الأعزاء....المشكله فين

السلام عليكم ورحمة الله وبركاته

باختصار شديد ...
انا مهندس ميكانيكا شغال في شركه محترمه......
كنت بعمل دبلومه في الكليه وشوفت بنت عجبتني بس علشان كنت ساعتها لسه خارج من الجيش وشغال بمرتب قليل مارضيتش افكر موضوع الجواز في الوقت دا.
لما ربنا كرمني بالشركه اللي انا فيها ابتديت افكر في الموضوع واول واحده فكرت فيها هي البنت اللي كانت معايا في الدراسات العليا....انا من النوع اللي قعدت 7 سنين في الكليه وماكلمتش بنت ولا اعرف اوقف بنت واكلمها في اي حاجه...مابعرفش اعمل كده.

روحت واخد اسمها وكتبته على الفيس المهم الأكونت بتاعها طلعلي .... كتبتلها رساله اني معجب بيها واخلاقها وان طالب اني اقابل والدها....قعدت اسبوعين منتظر رد....وبعد كدا لاقيت في البروفايل بتاعها ان الناس بتعزيها في والدها الله يرحمه...
بعتلها رسالة تعزيه....وربنا العالم انا كنت زعلان جدا اد ايه ...
بعديها بشهرين كررت طلبي ليها تاني بالتقدم اليها...وردت عليا رقم عمها...طبعا انا طرت من الفرحه.
كلمت عمها الصراحه الراجل كلمني بطريقه كويسه جدا وبترحاب بس هو ماكنش يعرف حاجه عن الموضوع وقالي انه هايبقى يكلمني تاني علشان ماكانش فاضي.
استنيت يوم والتاني .... روحت باعتلها رساله قولتلها اللي حصل ...وردت عليا برقم والدتها.
كلمت والدتها وكانت ست طيبه جدا واتفقت معاها على معاد اني اجي ازورهم.
وروحت وقعدت مع والدتها وكنت حاسس ان والدتها مبسوطه.....والبنت جت وقعدنا مع بعض حوالي ساعه وكانت القعده جميله جدا والبنت كنت حاسس ان هيا مبسوطه.
بعد كده جت والده البنت وسالتني على الشقه وقولتلها ان معايا شقه في بيت والدي ...سالتني على المساحه قولتلها 170 متر ...سالتني على المرتب قولتلها 3000 جنيه..واني بأسعى في حاجات تانيه بره الشغل علشان ازود من دخلي..هنا بقى حسيت ان البنت وشها اتقلب بعد ماسمعت المرتب....بس الصراحة والدتها كان مبسوطه جدا ..اتفقت معاهم على ان والدتي تكلمهم بعد 10 ايام...وكلمتهم وطبعا كان الجواب بالرفض..

السؤال هنا ايه الغلط.....