الموضوع: اول حادث لي بالسعودية - تجربة صدمتنى

المشاركة الأصلية كتبت بواسطة bassemali

نجيب من الأخر .. اللي موهوم قوي كده بالسعوديه ودول الخليج عموما يتفضل يشرفنا .. جرايد الأهرام خميس وجمعه والوسيط ماليانين إعلانات لشركات ومستشفيات وفنادق طالبين موظفين أتفضل روح قدم وتعالى عشان تتفرج ع الدوله المحترمه المتقدمه المتحضره .... إلخ ... بس قبل ماتتدبس ياصاحبي إسأل كويس اللي عايشين ف السعوديه تحديدا عن رأيهم ف العمل بنظام الكفيل .. والعدل الذي يسود البلاد ويخليك لو روحت تشتكي واحد سعودي فعلا بتاخد حقك (هههههههههه) أو العكس لو واحد سعودي اللي إشتكاك محدش هيمرمطك ويمسح بيك الأرض وأول شتيمه هتتشتمها هتتشتم ببلدك وأهلك ... السعوديه زيها زي مصر فيها حاجات بسيطه كويسه .. وحاجات كتيييييييييييييييييير كارثيه .. فمفيش داعي إن الناس تتحصر قوي كده زي ماهو باين ف الردود ... السعوديه عار ع الإسلام والمسلمين والعرب .. وبرضه نقول تاني .. عشان ماندخلش ف جدل ونقاش عقيم .. لإن معظمكم مش مجرب السعوديه .. انا بقى قعدت فيها 8 سنين .. جرب وأحكم بنفسك .

انا اتربيت في السعودية على فكرة يعنى مع كامل احترامى لحضرتك ، مريت بتجارب اكتر من الـ 8 سنين ، وفاهم وجهة نظرك كويس اوى ، بس برضه هرد عليك :

ماليش دعوة عار ع الاسلام ولامش عارف ايه ..

ونظام الكفيل ونظام الاقامة ، ماليش فيه دلوقتى


انا بتكلم بلد وحكومة بتعمل ايه للمواطنين والشعب بتاعها ماليش دعوة دلوقتى بقصة الكفيل بالاضافة اننا بنتكلم في جزئية بعينها وهى المرور .. انما عامة هقولك اه في هناك فساد وفي برضه اسر سعودية مش لاقية تاكل برضه على فكرة ، وكلام كتير بيتقال ان الشعب بيتوزع عليه اقل من ربع الدخل ، والفساد والتضخم كمان بدأ يبدأ وبدأ يبقى عندهم غلاء في الاسعار ..


بس على الاقل الناس دى عندهم كل يوم احسن من اللى قبله الى حد ما في حاجات كتير ، لما تشوف اي بلد هناك سنة بعد سنة ، في تقدم ، طريق كان مفرد بقى مزدوج ، بلد صغيرة بدأت تكبر ويبقى فيها كليات ، نظام مرور الكترونى ، نظام الدفع بتاع مش عارف ايه بقى اسهل ، خدمة النت بتتطور ، حتى مستوى معاملتهم للمقيمين بيتغير وللاحسن ...

الى حد ما فيه ناس بتفكر ازاى يحسنوا اوضاعهم ويسهلوا حياتهم ويريحوا بعض ، فيه جهود بتتم ، مفيش البشاعة اللى مصر فيها ، شوف كانوا فين وبقوا فين ، لما شعب اصلا كان بدو ورعاة غنم يوصل لكدة ، يبقى اللى بيحصل ده انجاز ، وشعب مصر اللى لحد قريب كان المثل والقدوة في كل حاجة وطول عمرنا بنعلمهم ونعالجهم ويبصولنا على اننا الدولة الاوروبية اللى في العالم العربي .. ودلوقتى بننحدر ازاى بطريقة مخيفة يوم عن يوم وسنة عن سنة

اقعد برة مصر ، وانزل كل سنة شهر ، وحس بالانحدار الرهيب اللى بيحصل ، افلام سنة عن سنة اوسخ من اللى قبلها ، زحمة اشد ، مشاكل في الكهربا والبنزين اكتر ، مشاكل جديدة بتظهر ، ظواهر جديدة بتتخلق زي قطع الطرق لما حد يموت ، التثبيت بالليل وسرقة العربيات ، التعقيدات اللى بتزيد في المصالح الحكومية ، انت عمال بتتخلف اكتر واكتر ، وبدل ما نقول طريق بيتحول لمزدوج ، لا ده مطبات بتزيد ، وطريق كان نضيف والاسفلت بدأ يتكسر او في حفر غاز اتعمل وحلنى بقى على ما يترصف تانى ........ ، اخلاق الناس في النازل ، اخلاق الشباب والبنات المراهقين في النازل ، موضات زي الزفت بتنتشر ... عادات اجتماعية قذرة بتتطور الى اكثر قذارة ... اسلوب السواقة بيتحول لأكثر قذارة وعدائية ... انت بتتكلم في ايه بس .....


عشان تحكم على حاجة ما تبصش هى واقفة فين ، ايه الاحداثيات بتاعتها ، بص ع الجراف كله شوفه بيطلع ولا بينزل ، ممكن تبقى تحت وبتطلع وممكن تبقى في القمة وبتنهار بطريقة مخيفة

احنا ما قلناش الناس دى وصلت للمدنية الكاملة والحياة المثالية ، بس بنقول احنا فين في النقطة دى وبنروح فين ، وهم فين وكانوافين .. وبيروحوا فين ..

انا سايب السعودية من 7 سنين ، وعارف انى لو رجعت دلوقتى للمكان اللى اتربيت فيه هتخض وهحس انها بلد تانية خالص غير اللى سبتها وده من سرعة الحركة و التطور عندهم


تحياتى :)