هوه لازم العريس يرقص يوم فرحه !

السلام عليكم

ايه رأيكوا يا جماعه فى اللى بنشوفه فى الأفراح اليومين دول وهل لازم العريس يقوم ويقعد يرقص ويهز طول الفرح !
انا لسه مرتبطش أصلا بس من اكتر الحاجات اللى قرفانى وبفكر فيها هيا لما أرتبط وأجى اتجوز واعمل فرح انا أصلا معرفش أرقص ومش قادر أتخيل نفسى عمال أرقص على أغنيه شعبى ولا على الوباء اللى طالع جديد و اللى بيسموه مهرجانات ده
الواحد لما بيروح فرح ويلاقى العريس عمال يرقص ويتنطط بيقول فى سره ايه ده ؟ هوه انا المفروض انى هعمل كده ؟ :o
يعنى لو على رقص سلو على أغنيه هاديه فماشى ممكن معنديش مانع انما رقص شعبى بقى وهيصه والشغل ده مستحيييييييييل والمشكله لو مرقصتش وفضلت قاعد الناس بقى تتكلم عليك كلام مش ولابد
ده أصلا لو ملقتش بتاع دي جي رخم قومك ترقص بالعافيه -_- ولا طلعلك واحد سقيل من المعازيم يرقصك بالعافيه مأساه :(

الواحد نفسه أصلا ميعملش فرح ويطلع شهر عسل بره وبيدعى ربنا يوقعه فى عروسه متفاهمه كده او تكون معقده ومش عايزه فرح ههههههه وطبعا ده كمان مستخيل :)

لا مش لازم والمفروض إن مفيش راجل يرقص ولا فى فرح ولا فى غيرة
أما اللى بتشوفة فى الأفراح دة ... ربنا يهديهم

في مقولة شهيرة بتقول الرجل اذا رقص نقص

مفيش حاجة بتودي الانسان في داهية الا كلمة الناس والناس تقول ايه وعشان خاطر الناس وفي الاخر محدش بيعجبه حد فالافضل الواحد يعمل اللي شايفه (صح) واللي مش عاجبه يخبط دماغه في الحيط

والله الفرح من اوله لأخره مالوش لازمه اصلا

سلام عليكم بص ياباشا فى فكرة حلوة قوى عجبتنى شوفتها فى فرح أختى لان جوزها برضو مالوش فى الرقص و الكلام ده عملوا فى مجمع النسور فى مساكن شيراتون - طريق المطار بعد مول صن سيتى بشوية
عبارة عن زفة نص ساعة بس جميلة جدا انت وعروستك بعد كده تدخل قاعة شبه السينما بالظبط عشان كتب الكتاب لمدة ساعة و تبقى انت و عروستك و والدها و المأذون على المسرح و الناس كلها قاعدة شايفاكم و التكلفة مش أوفر قوى زى الافراح اللى بتتكلف 15000 و 20000 والاسعار المبالغ فيها دى .. وعقبالك ياباشا

بص هوه اولا مش لازم اغاني المهراجانات دي اللي تشتغل

انت هتتفق مع الدي جي على اللي عايزه و ممكن تنبه عليه و تقوله مش عايز الاغاني دي

بالنسبه للرقص انت ممكن تكون مش بتعرف ترقص ولا بتحب

بس هتلاقي كل اللي حواليك صحابك و قرايبك و فرحانين و قاعدين يرقصوا فبتلاقي نفسك مندمج معاهم

و الموضوع مش عيب عادي

هوه اللي بيبقى عيب الصراحه الرجاله اللي بتهز وسطها :)

انما الواحد ممكن يرقص عادي من غير ما يهز وسطه :)

انا مش ناوى اعمل فرح من اساسه ان شاء الله هعمل كتب كتاب و لو ربنا قدرنى هعمله وليمة العرس و خلاص على كدا
انما الرقص و المسخره دى انا ملبش فيها و مش عارف ازاى الى بيرضى على مراته اول يوم جوازهم ترقص قدام القريب والغريب! فين النخوه؟

دا اسمه جنان حضرتك ... الناس بتيجي يوم الفرح بتتجنن مش بيرقصوا هههههههه

‫فضيحة .. سلفي يرقص بمطواه (دول الى عايزين يحكمونا )‬‎ - YouTube

بص ياباشا انا ان شاء الله هكتب كتابى فى مسجد الشرطه مثلا واطير على اى حته واوفر فلوس الفرح اللى اصلا مبيبقاش ليك ده للمعازيم اللى مبيعجبهمش حاجه اصلا و ولا رقص ولا وجع دماغ

ياباشا متحملش هم الموضوع ده انا كنت زى حالاتك مليش فى الرقص نهائى

وواحد غلس صمم انه يقومنى وانا طبعا مستحيل كفايه ان ان امه لااله الا الله بتتفرج عليك جتلى فكره فى ثانيه قلتله البنطلون واسع جدا ولو وقفت هتبقى فضيحه والحمد لله الزبون شربها وهو اللى كان بيبعد الناس عنى كمان مع ان الغبى ده لو فكر للحظه واحده .. على ايامى فى التسعينات كانت الموضه البدله القصير على القمر بنتاع البنطلون وبتلف على الوسط حزام عريض بيلمع حاجه كده شبه السفرجيه ههههههههه فعلا والله نفس بتاع السفرجيه بس كانت موضه الايام دى .. بس وعديت من الموقف المحرج ده ... ياه حرام عليك قلبت علينا المواجع واكبر غلطه فى حياتى :) بهزر طبعا هو فيه احلى من الجواز

اقتباس:

---

المشاركة الأصلية كتبت بواسطة طارق _عبد السلام

ياباشا متحملش هم الموضوع ده انا كنت زى حالاتك مليش فى الرقص نهائى

وواحد غلس صمم انه يقومنى وانا طبعا مستحيل كفايه ان ان امه لااله الا الله بتتفرج عليك جتلى فكره فى ثانيه قلتله البنطلون واسع جدا ولو وقفت هتبقى فضيحه والحمد لله الزبون شربها وهو اللى كان بيبعد الناس عنى كمان مع ان الغبى ده لو فكر للحظه واحده .. على ايامى فى التسعينات كانت الموضه البدله القصير على القمر بنتاع البنطلون وبتلف على الوسط حزام عريض بيلمع حاجه كده شبه السفرجيه ههههههههه فعلا والله نفس بتاع السفرجيه بس كانت موضه الايام دى .. بس وعديت من الموقف المحرج ده ... ياه حرام عليك قلبت علينا المواجع واكبر غلطه فى حياتى :) بهزر طبعا هو فيه احلى من الجواز

---

شكلك متراقب هههههههههههههههههه

و الله ذكرتنى بفرحه عمرى وغلطه عمرى بنفس الوقت اخذت زهره شبابى و فلت

حاجات كتيرة لا داعي منها
الناس بتكررها وخلاص
ومنها الرقص فالفرح

اه الصراحة الرقص بالوسط عيب خالص احنا فى اسوان عندنا طقوس خاصة بالنسبة للفرح ونوع الرقص

شكرا يا جماعه عالردود دى نورتوا الموضوع والله وانا مبسوط من التفاعل ده :)
والحمدلله ناس كتير زى مش حابه موضوع الرقص
بس انا شخصيا مستحيييييل أرقص ولا يمكن أتنازل وأرقص ده انا لو أطريت أعمل فرح ساعتها بفكر قبل الفرح بيومين أشوف الواد الدى جى بتاع القاعه وأزرفه 100 جنيه ولا حتى 200 وأقوله انسى انى أرقص شغل أغانى مترقصش او موسيقى هاديه وخلاص ولو لقيت خد هيرقصنى غير الاغنيه علىل طول :)
طبعا فى ناس من المعازيم هيقولوا ايه الفرح الميت ده ده فرح اى كلام -_- لا منا بقى احاول اعملهم بوفيه فخيم واكل محترم أخذا بمبدأ أطعم الفم تستحى العين :)
أو بقى فى حل تانى اتنمى انى موصلوش وهوه انى اجبلهم صافيناز ترقص أهوه يتلهوه فيها وميركزوش معايا ههههههههههه بهزر طبعا أقتراح صافيناز ده مستبعد :)

والله انا كنت زيك بس فى الفرح مجرد مسكت ايد واحد صاحبى خمس دقايق وقعدت
عالعموم فى شباب دايما بيكونوا فى كل فرح وهما بيقوموا بالواجب

اقتباس:

---

المشاركة الأصلية كتبت بواسطة dodge2013

‫فضيحة .. سلفي يرقص بمطواه (دول الى عايزين يحكمونا )‬‎ - youtube

---

والله ما عارف انتوا بتكدبوا ع مين

اولا الف مبروك .حضرتك زعلان من رقص الرجال في الافراح؟ ده اقل حاجة. قاعات الافراح للاسف اصبحت مكان يُستحل فيها كثير من الحرام. بداية من العروس فهي لو محجبة اقل ذنب انها بتحط ميك اب و طبعا ده فرحها ازاي متحطش و الغريب و القريب يتفرج. و لو حد علق صح يبقي معقدها و دي ليلة و ايه يعني. و طبعا مستوي اخر انها تشيل حجاب الرأس و تعمل شعرها. و ايه يعني مهو محدش هيبص دي عروسة. و هو يعني حد هيغمض عين اللي هيبص عليها امال الناس بيتفرجوا علي مين غير العريس و العروسة. و اكثر ممكن لو برده محجبة تتنازل اكثر و تلبس فستان لا يصلح حتي لغير المحجبة. و اسوأ كمان احيانا اخت العروسة و الله شفت بعيني و خطوبة لسة مش فرح لابسة فستان بشع لا يصلح ابداااا. اللهم اعفينا. و طبعا اكيد العروسة كمان بس الخطوبة دي اتفسخت. يعني كله علي الفاضي. و صاحبات العروسة لازم الميك اب الحمد لله مبيشلوش الحجاب كتر خيرهم لكن مش عارفه هي سنة مثلا و انا مش عارفة ان غالبا المحجبة بتعمل الطرحة spanish يعني مربوطه للوراء و لا تغطي الرقبة طب لو مش كدة الفرح يبطل مثلا و مش دايما شكلها شيك و الله. الرقص مش بس للرجال لا ده كمان البنات و الكبار احيانا... محجبات و غيره و زي ماتكون مصدَقت طب احترمي الحجاب اللي انتي لابساه. ليه متجاملش العروسة ميصحش عييييب .طب سقفي بس حتي . لا ميصحش لازم ترقص بضمير امال يعني تزعل صاحبتها و لا اختها و لا قريبتها. و مين يشيل ذنوب الحبايب دي كلها ؟.
الغريب ان الاهل احيانا هم الي يبصمموا علي الفرح و العريس و العروسة بيكونوا عايزين كتب كتاب بس و بيرضخوا للاهل. لكن من ناحية اخري أعرف مستويات عالية جدا و متوسطه اكتفوا بكتب الكتاب في قاعة من قاعات كتب الكتاب زي مسجد الشرطة او غيرة بفستان الفرح و بس و هو ده الفرح. و لا ذنوب و لا مناظر مؤذية و لا وجع دماغ و بعدين اللي عايز يعمل وليمة يبقي يعمل علي مهله و التكاليف هم اولي بيها يسافروا يشتروا اي حاجة بدل ما يبدءوا حياتهم مش بذنب واحد، لا بمجموعة ذنوب.ربنا يهدي الجميع

بتختلف من شخصية انسان واخر اعمل اللي تراه صحيح من وجه نظرك

بص لا تقولي شعبي و مشعبيش ولا سلو ولا مسلوليش :d

الراجل المحترم لا يرقص

اقتباس:

---

المشاركة الأصلية كتبت بواسطة DODGE2013

‫فضيحة .. سلفي يرقص بمطواه (دول الى عايزين يحكمونا )‬‎ - YouTube

---

المطواه دى بتاعتى

اقتباس:

---

المشاركة الأصلية كتبت بواسطة mustafavet

والله ما عارف انتوا بتكدبوا ع مين

---

هو ايه حضرتك اللى بيكدبو على مين .. هو حضرتك مش شايف بعينك السلفى ده بيرقص بالمطواه ولا ايه :Ob_mak1[1]:

انا عن نفسى هعمله فى جامع
كون ان العروسه متفاهمه او لا دى بتهيئلى صعب لان كل واحده شايفها نفسها قمر وعايزه اعلى حاجه
وعايزه كل الناس تتغاظ منها الا من رحم ربى
انا من كتر اللى شوفته وانا قرفان وزهقان ونفسى اغور من البلد الزباله دى
وماحدش يقولى بلدك بلدى بوظتنى وجابتنى ورا هى واللى فيها
بلد زفت بصراحه وناس عقليتها غريبه وتفكير مرهق انك تقعد تتناقش مع قطه اسهل من انك تقنع بنى ادم بعكس اللى هو عايزه او توصلو لحل وسط