-
الناس دى هتبقى ايه ؟؟
الاسبوع اللى فات كان من المرات القليلة اللى رحت فيها شارع الهرم بالعربية و كانت ليا ملاحظات
أولا الزحمة اللى ملهاش لزمة نتيجة الميكروباصات اللى بتحمل بعد كدة الطريق فاضى
الباعة اللى واخدين الرصيف و نازلين عنه شوية كمان
الحاجة اللى عامل عشانها الموضوع دة وانتشرت فى اماكن كتير بس لاحظتها فى الهرم اكتر
كمية العيال المهولة اللى بتقف تلمع العربيات فى الحتت الزحمة اللى زادوا بطريقة انا شايفها ملفتة جدااااااااااا لدرجة انى فى اسكندرية واحد زى ضرفة الباب جاى يلمعلى الازاز بزمر له بقول له متلمعش فضل يلمع وبعدين تنح وقالى انا لمعت خلاص انت و ذوقك بقا !!!!!!!!
اللى عاوز اسأله هى كمية الناس دى اما تكبر هتبقى ايه ؟؟ يعنى الناس اللى فالشوارع دى اما يكبروا هيبقوا ايه ؟؟ هل هيتحولوا لبلطجية مثلا ؟؟ هل هيبقوا اغنياء مثلا نتيجة التسول ويعملوا مشاريع
على العموم انا اى واحد شاب بصحته و يعمل كدة بصراحة مش بساعده لأنى بعتبر دة تشجيع ليه و دة رأيى الشخصى خصوصا اللى تلاقيه شايل سنان السكاكين اللى انقرض من ايام الخمسينات وبيشحت بيه و صحته احسن منى
-
-
لما يكبروا هيبقوا بلطجية وفي نفس الوقت أغنياء برده نتيجة التسول ولو معاهم مليون جنيه هيفضلوا مستمرين في المهنة طول ما الناس بتشجعهم على كده
وعدم مساعدتك وإعطائك فلوس ليهم هو عين الصواب وأنا عن نفسي بعمل كده في أغلب الأحيان ومش بيصعب عليا منظر العيل الصغير وهو بيلمع العربية أو بيقولي هات جنيه اتغدى لأن العيال دي مش جعانة ولا حاجة دي مهنتهم بيستسهلوها عن إنهم يروحوا يشتغلوا زي البني آدمين خاصة إنهم مش بيلمعوا العربية أساسا دول أحيانا بيليطوها أو بيعملوا أي كلام مجرد حاجة ياخدوا عليها فلوس وخلاص زي اللي بتبيع مناديل في الشارع ولو اديتها فلوس مش بتديك علبة مناديل من اللي معاها !!
ولسة ياما هنشوف إبداعات في طرق التسول اللي آخرها دلوقتي النقاب ودول بالذات بحتقرهم ومش بديهم مليم لأنهم شوهوا النقاب والمنتقبات بالقرف اللي بيعملوه ده ووالله بيبقوا مش مسلمين أساسا وبيلبسوه علشان أولا بيخفي معالم الوش فممكن يكون شكلها مش محتاجة وشبعانة والنقاب بيساعدها إنها تخفي ده وكمان بتبقى وسيلة لإثارة الشفقة على المنتقبة المتدينة يا عيني اللي مش لاقية تاكل !! ربنا يكويهم بنار جهنم اللي بيتسولوا بدون حاجة ولا عوز
قال النبي صلى الله عليه وسلم: (مَا يَزَالُ الرَّجُلُ يَسْأَلُ النَّاسَ، حَتَّى يَأْتِيَ يَوْمَ القِيَامَةِ لَيْسَ فِي وَجْهِهِ مُزْعَةُ لَحْمٍ). متفق عليه
-
يا أبو آسر اللى هيجننى ان كل واحد فيهم طول بعرض والله شارع جميلة بوحريد فاسكندرية كان واقف ييجى نص ساعة عديت اللى الراجل اللى بيقولى انت و ذوقك لمه فى الشوية دول اكتر من 10 جنيه و عدى عليا بعديه حوالى 3 كمان كلهم ما شاء الله بيطيروا بين العربيات مفيهومش واحد حتى بيزك برجله !!!
-
معظمهم ينفق هذه الاموال في المخدرات
لانها بتيجي سهلة ، وبتروح سهلة
وهذه مسئولية الحاكم
ياراجل ده حتى عند مول العرب اصبح العمال بدون مسح زجاج ولا اي شيء يطلبوا بكل بجاحة بدون اي سبب
فاكرين ان كل اللي يروح المول اثرياء
-
طب انا هاقلكو علي حاجه انا وانا رايح الكليه بخرج من المترو وبعدي علي كوبري مشاه المهم من قريب بقيت اشوف طفل او اتنين ماسكين مقشات وبيكنسو الكوبري اول مره اشوفهم روحت مدي الواد فلوس اهو بيعمل حاجه مفيدن المهم بقي مره يكنس حته وحته لأ ولما لقو الناس بتديهم فلوس مابقوش حتي يكنسو
يعني علي الاقل كانو بيعملو حاجه مفيده كنت بديهم فلوس لكن بعد كده ما بقيتش اديهم حاجه
-
الناس دى هتبقى قد الدنيا :d
-
الفئة دي سواء اطفال او كبار بقت في زيادة مستمرة و بقوا منتشرين في كل مكان بطريقة تجيب للواحد اكتئاب..
هو حتى الواحد لما بيشوف اخلاق و تصرفات الاطفال الصغيرة اللي في المدارس دلوقتي بكون متأكد ساعتها ان المستقبل هيكون شديد السواد...
-
الناس دي طول ما بتلاقي حد بيديها هيفضلوا كده
احنا برضه بنتحمل جزء من المشكله دي بشكل او باخر
انا بقالي فوق السنه و نص مبديش اي حاجه لاي حد في الشارع
اللهم الا بتوع المناديل بس ده في حاله كنت محتاجها فعلا
لاني اكتشفت انها مهنه و مهنه منظمه كمان
و بصراحه في ناس كتير اولي بس احنا اللي بنستسهل
-
انا اتصدمت اما عرفت طبقا لإحصائية ان اطفال الشوارع والباعة الجائلين عدددهم حوالى 3.5 مليون شخص
يعنى احنا عندنا 3.5 مليون قنبلة موقوتة الاطفال دى مش بتتعلم و ملهاش مهنة غير التسول طيب اما يكبر بجد هيبقى ايه الموضوع دة هيجننى لازم الدولة تلحق الناس دى
والله شفت فاسكندرية ولد بيبيع لعب بلاستيك عالبحر قاعد بيتكتك وكمشان عالبحر وعملت معاه اللى ربنا قدرنى عليه طب الولد دة اما يكبر هيبقى شعوره ايه ناحية المجتمع وناحية بلده
الموقف الظريف بقا ان عربيتى كانت عطلانة قدام تسيباس فى ستانلى وواقف حزين و لما جه الونش خدها المنادى اللى واقف هناك كان عاوز الحلاوة هههههههههههههه
Content Relevant URLs by
vBSEO 3.6.0 PL2