بسم الله - السلام عليكم ورحمة الله وبركاته
أعضاء المنتدى الكرام ..
أنا هتكلم عن عربيتي ياريس 2014 سيدان هايلاين عشان مالقتش موضوع كويس بيتكلم عنها
وإن شاء الله كل صيانة هتكلم عنها بالتفصيل.
ملحوظة: كلامي كلام مستخدم عادي مش حد خبير في السيارات.
العربية معايا من حوالي 3 أسابيع وعملت بيها حاجات كتير طرق سريعة وزحمة ورمال وشوارع مكسرة و ..... حاجات كتير =)
أولاً الإضاءة:
الفوج لايت مش قوي لكن هيبقى كويس لو مش محتاج تشوف غير المسافات القصيرة والشارع منور كويس. ممكن تحتاجه لاكتشاف الحاجات القريبة.
النور العادي كويس جداً ومش هتحتاج غيره طالما مش على طريق سريع.
النور العالي كويس جداً وأنا شخصياً مش بستعمله غير في الطرق السريعة لحظة وبقفله تاني.
ثانياً: الموتور:
السحب أكثرمن ممتاز بالنسبة لموتور 1300. أظنها أفضل سيارة في السعة 1300
إستهلاك البنزين كويس جداً (عملت معايا أكتر من 400 كيلو وأنا بحرق كتير وتكييف وكله)
الفرامل:
ممتازة ومش محتاجة كلام كتير. هتلحقك ماتقلقش
الإتزان والثبات:
ممتاز، العربية عمرها ما أتنقلت معايا من حارة لحارة أو حسيت بعدم إتزان وأنا عادة على الطريق السريع المتوسط بتاعي 100 ~ 140
جبت بيها 170 على طريق السويس قبل كوبري 4.5 وكان ممكن تجيب تاني لولا أني هديت
التابلوه والتجهيزات الداخلية:
العربية من جوه مريحة جداً للسائق من حيث قرب الزراير وترتيبها وسهولة الوصول لكل حاجة. الكرسي هيدروليك وده كان فارق معايا (ومعظم العربيات بقت تنزل هيدروليك)
التكييف كويس جداً في الثبات ولا غبار عليه مع التحرك
العيوب من وجهة نظري:
العربية من ورا للأسف فيها عيب إن وسط الكنبة بارز لأعلى وهيخلي الي قاعد في النصف ممكن يتضايق. وفيها ميزة إن الأرضية في النصف مش مرتفعة فهينزل رجليه براحته ومش هيحط رجل عند الي قاعد على يمينه ورجل عند الي قاعد على شماله
كماليات كتير مفقودة مش منطقي ماتكونش في الهاي لاين الي فيها سمارت كي! حساسات الركن والبلوتوث وفتحة السقف مش منطقي خالص مايكونوش في تويوتا هاي لاين
أماكن التخزين قليلة بشكل مستفز. مكان كوب واحد ورا وكوب للسائق والراكب الأمامي وعند التكييف على اليمين والشمال. أمام الفتيس مكان بسيط والمسند ومكان ضئيل جداً رفيع جداً بجانب الهاند بريك.
مافيش مكان للنضارة
مافيش لمبة للكنبة الخلفية
درج التابلوه صغير
وفي النهاية مستعد لاستقبال أي استفسار وبإذن الله بعد أول صيانة هكتب تقرير تاني
والمعذرة لو التقرير مش دسم أوي :)