احذروا كاوتش الدانلوب و كاوتش الكونتيننتال !!!!
نزلت اشتري فردتين كاوتش مقاس 14 185\65 لسيارتي الماتريكس .. لان الهانكوك جاب ال 40 الف كم و بدأت كفاءته تقل .. فقررت اجيب كاوتش الماني المرادي .. و عن طريق المنتدى و الروابط بتاعت الصفحات العالمية للاطارات استقريت على الدانلوب sp او يوكوهاما c drive او بريدجيستون gr 90 ...
اختصرت البحث عند اشرفكو اللي في مدينة نصر ش الطيران و الغطاطي اللي ورا جنينة مول و فيت اند فيكس اللي محطة كالتكس عباس العقاد ...
فاشرفكو قالي ان الدانلوب اللي عنده ياباني و ب 450 !!! و اصل الدانلوب الماني طبعا و لدأ ينزل في السيارات الاودي و الفولكس فاجن ... و قالي يوكوها مش عنده ... و قالي الكونتيننتال اللي عنده روماني !!!! و قالي البريدجستون gr 90 مش عنده اساسا !!!!! و قالي الهانكوك هيحسبهولي ب 410 ج .. فقلتله الصراحة انا اسف لاني ناوي على الماني او ياباني ... و مشيت :(
دخلت على الغطاطي ... مالقتش اي حاجة عنده من الانواع السابق ذكرها الا الهانكوك و قالي ب 440 ج !!!! فشكرته و مشيت :(
و اخيرا قررت fit & fix اللي في كالتكس عباس العقاد وكيل بريدجستون ... و لقيت عنده المقاس المطلوب لسيارتي .. سعره 664 ج شامل البلوف و الترصيص .. فسألته على اي خصم .. فذكرلي بعض الهيئات اللي ليها خصومات عندهم زي البنك الاهلي و فودافون و اتصالات و نقابة المهندسين ... فقلتله مراتي مهندسة و معاية كارنيه النقابة .. قالي تمام .. و ليك خصم 5 % :))
و تم التركيب و كان توتال حسابي للفردتين بعد الخصم 1264 ج .. و طبعا من اول المشي احساس تحسن الفرامل باين جدا جدا و كأنك مغير تيل فرامل و الاسفلت تحس ان نعومته زادت :))
بالمناسبة \ تاريخ انتاجهم او تصنيعهم الاسبوع الاول لسنة 2014 :) فطبعا شيء ممتاز اوي الحمد لله ..
القصد كونوا على حذر من بعض الانواع اللي ذكرتها انها لو وجدت خارج وكيلها فقد تكون تصنيع دول اخرى غير البلد صاحبة المنشأ .. فعليكم دائما بالوكيل .. يعني لولا ان وكيل دانلوب تقريبا في المهندسين لكنت رحت له و اشتريتهم و ركبتهم بره عند اي حد لانه بيبيع بس .. لكن استبعدت المشوار و خاصة اني كنت مرتبط بمشاوير تانية في نفس نطاق مدينة نصر ..
و الف شكر لكل عضو زميل هنا زودني بمعلومات صحيحة عن الاطارات و نتج عنها اني وفقت في شراء الاطار السليم بمفهومية ...