جمارك السيارات فى مصر موضوع مهم
اولا يا جماعة الموضوع ده طويل ومهم جدا والفكرة انك تعمل جمارك على سلعة معينة زى السيارات مثلا ده حصل فى مصر لسبب انهم كانوا عاوزين يحموا الصناعة الوطنية ويطورها واعتقد انا فكرة الجمارك على العربيات ابتدت تقريبا من حوالى اكتر من 40 سنة يمكن تكون من ايام عبد الناصر لان انا اعتقد ايام الحكم الملكى ما كنش فى حاجة اسمها جمارك المهم احنا بعد السنين اللى فاتت اللى بنحاول فيها نطور ونصنع حتى عربية مصرية واحدة مصر ما عرفتش حتى التجميع المحلى للعربيات سئ جدا فمش معنى كده ان احنا مكتوب علينا ان العربيات تدخل مصر بجمارك
مصر فى صناعة السيارات عاملة زى التلميذ البليد اللى فى الفصل والحكومة منعت كل التلاميذ فى الفصل اللى بيذاكروا من حضور الامتحان علشان خاطر هو اللى يطلع الاول على الفصل وللاسف برضه ما عرفش ينجح
يعنى الطبيعى بعد ما احنا استحملنا طول السنين اللى فاتت وما فيش اى تقدم يبقى من حقنا نجيب اى عربية من بره ومن غير جمارك زينا زى باقى خلق ربنا فى دول العالم المحترمة
ده انا كل ما افتكر الجمارك اللى كانت مصر عاملها على اجهزة الفيديو كاسيت فى التسعينات والثمانينات اقول دى بلد الحكومات اللى فيها متخلفة
انا عارف لو الجمارك اتشالت من على العربيات فى ناس كتير من التجار هيخسروا المكاسب الرهيبة اللى بيعملوها بس هو ده حقنا كمصريين نركب عربيات ادمية
دى حتى اتفاقية الجات اللى كانت مصر ماضية عليها والمفروض الجمارك على السيارات الاوربية تتلغى عام 2016 برضه ما قدرتش تلتزم بيها والجمارك كانت المفروض يبقى فيها خفض تدريجى حتى تنتهى لغاية 2016
ولا المتخلف اللى طلع قوانين ان العربيات اللى بيزيد سعة ماتورها عن 1600 سى سى جمارك 135% طيب هتعمل ايه دلوقتى والشركات هناك طورت صناعة المواتير وبقت عربيات ماتور 1400 و1600 سى سى الهورس باور بتاعه اعلى من عربيات 2000 سى سى
ده الجمارك المتخلفة بتزيد على العربيات كل ما كان فيها عوامل امان اكتر زى الفرامل abs والايرباج شوفتوا تخلف اكتر من كده من بدل ما تشجع ان يبقى عندك عوامل امان فى السيارات كمواصفات قياسية
وبصراحة الجمارك دى خلت التجار كمان فى المستعمل تسمع ارقام مخيفة يعنى ايه اجيب عربية مستعملة كورى اويابانى عدى عليها اكتر من 5 سنين بسعر فوق 100 الف جنيه زى الكيا والهيونداى والمتسيوبشى الانسر
العربيات دى لو نزلت تشترى واحدة منهم مستعملة فى السعودية تمنها مش هيزيد عن عشرين الف ريال بالكتير لو حالتهم كويسة
بصراحة الموضوع بقى صعب جدا كل العالم بيتطور واحنا فى الضياع نايمين
ده حتى المهندسين المصريين اللى بيخترعوا سيارات زى مايكون تفكيرهم وقف من كتر ماهم مش بيشوف تكنولجيا حديثة زى الاخ مخترع السيارة النانو اللى كان وهوبيشرح العربية بيقول ان من ضمن مواصفاتها ان فيه كاسيت ايه الحلاوة دى المفروض انبهر ده غير ان حتى شكل العربية بشع جدا وماتورها ضعيف اوى اكيد انهم حطوا فى اعتبارها ان دى اقصى امال وطموحات المصريين زى التوك التوك اللى هو وسيلة مواصلات غير ادمية بالمرة وانتشرت فى مصر كالسرطان وعلى فكرة اللى دخلها مصر هو الباشا غبور
فى مصر احنا بنتعامل درجة تانية فى كل حاجة حتى اللى بيجوا يعملوا مشاريع اسكان للشباب ومحدودى الدخل لازم يقرفك ويزنقها عليك مع ان ربنا ماوسعها علينا يعنى يعمل شقق مساحة 42 متر فى الصحراء شوفت تخلف اكتر من كان تخلف وفساد وجهل من الحكومات المتوالية بيقابل رضا وقبول من الشعب ودى النتيجة
لو حد عنده حل يقول وشكرا مهندس /أحمد عطيه