الحمد لله أخيراً غير ت الكاوتش .. أسأل الله خيره وخير ما صنع له وأعوذ بالله من شره وشر ما صنع له .. اللهم آمين .
السيارة تويوتا ياريس مقاس 185/60/15 كنت مستبعد البريدجستون لأني ثمنه غالي 740 ج للفردة وشبه تيقنت أنه مفيش منه ياباني (أصلي) وبعد طول بحث وبناءً على نصيحة الكثير من الأصدقاء ورواد هذا المنتدى المبارك عقدت العزم على يوكوهاما ياباني سي درايف ..
وبناءً على نصيحة الكثير من الأصدقاء ورواد هذا المنتدى توجهت لعلي صبره في ش احمد سعيد سألته على اليوكاهاما قاللي موجود ب 550 ج .. سألت على الإنتاج قاللي الأسبوع 13 سنة 2013 طبعاً رفضت .. فقاللي: طب هتصرفلك في حاجة إنتاج حديث شوية .. طب شكراً يا سيدي .. جالي الصنايعي قاللي حظك حلو يا باشا الاسبوع ال 50 من 2013 .. طب الحمد لله .. جاب الكاوتش بصيت لقيته الاسبوع ال 43 من 2013 وبعد مناقشات وشد وجذب قولت أمري لله .. دفعت الفلوس وطلعت وقفت مع الصنايعي ..كان بدأ فعلاً في أول كاوتش.. قاللي : يا باشا إرتاح جوه علشان الشمس ومتقلقش إحنا بنعامل ربنا ..
قولتله : حتى يطمئن قلبي .. بصيت في تاريخ الإنتاج لقيت فرده واحده الأسبوع 43 من 2013 وفردة الأسبوع 3 من 2013 وفردتين الاسبوع 13 من 2013 .. طبعاً زعقت في الصنايعي وقولتله هي دي معاملة ربنا .. أومال لو مش بتعامل ربنا كنت عملت فيّ إيه ؟؟!!!
طلع صاحب المحل وحاول يقنعني قولتله لأ طبعاً مش هينفع .. إما إنتاج الأسبوع ال 43 زي ما اتفقنا وإما فلوسي أو ننزل السعر .. رفض ينزل السعر وقاللي أقل من 550 بجنيه مش هينفع ... دوروا على 3 فرد ملقوش إلا الأسبوع ال 13 حاولوا يقنعوني آخد بيرللي تركي فرفضت فجابوا الفلوس وأخدتها ومشيت من عندهم ..
توجهت لبركات في شارع الجزاير في المعادي لقيت عنده اليوكوهاما والمقاس الحمد لله .. السعر 550 زي علي صبره .. سالته على الإنتاج قاللي مش عارف بس هو حديث إن شاء الله .. جاب الكاوتش لقيته إنتاج الأسبوع الأول في 2014 ولله الحمد .. ركبهم وعباهم نتروجين ورصص والحمد لله .. الحاجة الوحيدة اللي ضايقتني إن البلوف صيني .. طبعاً فيه فرق في العربية وبقت أنعم بس مش للدرجة اللي كنت متخيلها ..
الحمد لله وربنا يكفينا شرهم ويرزقنا خيرهم ... اللهم آمين