أطفال بين زوجين مختلفين أم منفصلين؟

**OlaOsman** · 11-10-2008 01:14 AM

موضوع محيرني بقاله فترة.. هل الأصلح للأولاد انهم يتربوا في بيتهم بين أبوهم و أمهم حتى و لو كانوا على خلاف دائم و في خناقات مستمرة إلى درجة استحالة العشرة بس عايشين مع بعض عشان الأولاد ما يتشتتوش و ينشأوا في أسرة مفككة؟ و لا الأصلح لهم ان الزوجين ينفصلوا عن بعض ولو كان على الأولاد آديهم على الأقل مش هايشوفوا كل يوم أبوهم و أمهم بيتخانقوا و مافيش بينهم احترام؟

طبعا الموضوع مش سهل و الاختيارين أصعب من بعض و في الدرجة الأولى الطرفين بيفكروا في الأولاد.. بس أنهي الحلين أصلح لنفسية الأطفال و مستقبلهم؟ حاجة تحير فعلا.

**Ramy.Gamal** · 11-10-2008 02:19 AM

الانفصال مع وجود احترام متبادل احسن لكل الاطراف سواء الابناء او الاباء

**maka** · 11-10-2008 02:45 AM

المشاركة الأصلية كتبت بواسطة ramylancer

الانفصال مع وجود احترام متبادل احسن لكل الاطراف سواء الابناء او الاباء

وكمان علشان متتكونش عند العيال عقد نفسية من الجواز

**دموع الثلج** · 11-10-2008 02:47 AM

الانفصـــــــــــــــال بالتاكيد افضل من الاستمراريه فى ظل خلافات بتترك اثار نفسيه سيئه على الاطفال وااقل اضرارها انها بتفقد الاطفال الثقه فى من حوالهم

**Bossy_Fadl** · 11-10-2008 08:14 AM

طبعااااااااااااااا و مليون في الميه الانفصال و تربية الاولاد بين الزوجين

لان ده ارحم مليون مرة من اطفال عايشين بين زوجين حياتهم كلها شد و جذب و عدم احترام

و المثال ده شوفته حوالينا كتير

الطفل اللي بيتربي بين اب و ام منفصلين بس بيحترمو بعض (علي الاقل قدام الطفل) ابنهم بيطلع نفسيته سليمة علي العكس تماما من اللي بيتربي بين اب و ام مختلفين طبعا

فعلا الطفل ممكن يبقي متأثر ان باباه و مامته مش عايشين مع بعض لكن ده ممكن ميعملش حاجة اكتر من انه يحسس الطفل بشوية ضيق او نقص

لكن لو متربي بينهم و هما مختلفين هيبقي طفل معقد و مش ممكن ابدا يعرف يتعامل بشكل سوي مع الناس

**OlaOsman** · 11-10-2008 11:25 AM

بس يا جماعة قرار الانفصال ده مش سهل.. و حياة الأولاد مع الأم فقط بينما الأب متزوج و له أولاد تانيين برضه مش سهلة.. وجود الأب في حياة أولاده اليومية مهم جدا.. و ماذا لو الأم حبت تتجوز؟ ده غير القضايا و المحاكم و الحضانة و قانون الرؤية و دوامات الأطفال هايبقوا جزء منها شاء الزوجين أم أبوا :(

**Noha.M** · 11-10-2008 12:55 PM

لا انا مش مع الانفصال خاااااااااااالص

لو يقدرو يجنبو مشاكلهم و خناقتهم بعيدا عن ولادهم و يحاولو يعيشو حياة سوية مع بعض على الاقل لحد ما الاولاد يقفو على رجليهم يبقي افضل بكتير من الانفصال و دى حاجات كلها بتفضل فى نفسية الطفل و بتكبر معاه و تفضل مأثرة في نفسيته
يعني انا الحمد لله عمر ما شفت والدى الله يرحمه بيتخانق او معلى صوته على ماما و عمر ما شفت فى بيتنا خناقة واحدة حتى و دة فعلا بيساهم كتير فى انه يطلع طفل مش هقول خالى من العقد لان كلنا عندنا عقدنا النفسية لكن على الاقل بيبقي سوي

البيت اللى مليان زعيق و خناقات وصراعات بطلع طفل مهزوز و غير سوي و لو على ولد كمان تبقي اصعب لان ولد و شخصيته ضعيفة و مهزوزة بتبقي وحشة اوى