فلوانس موديل 2012 عامله 335 ألف كم على العداد!!!
http://i62.tinypic.com/4qr39i.jpg
دى فلوانس ليموزين بأجرها و أنا رايح المطار....الشركة عندها حوالى 18 عربية فلوانس قديم و أشتروا 4 فلوانس فيس ليفت عملوا بيهم 90 ألف كيلو لحد دلوقتى....
العربية من بره و من جوه متديش عدادها خالص....حالة الصاج نظيفة و حالة الفرش نظيفة و لكن العداد كما هو موضح فى الصورة 335 ألف كم فى أقل من سنتين....صيانة توكيل و التكييف أداؤة رائع و العربية سحب خطير و مفهاش أصوات و أحنا ماشيين....سفر دائم فى كل مناطق جمهورية مصر العربية....دهب، شرم، غردقة، رفح، و كل اللى أنت عايزه.....طبعاً كل السواقين بتفضل الفلوانس علشان الثبات و الراحة فى السفر....و لو أنهم بيقولوا أن الألنترا موفرة أكتر فى البنزين على السرعات العالية فوق 120 كم/ساعة و لكن فيه فرق كبير فى الثبات بين الأتنين....
أنا كنت راكب مع مدير التشغيل فى شركة الليموزين و سألته لاحظت أيه ما بين القديم و الجديد غير التغييرات الظاهرة.....قالى النتشة أختفت....العربية سحبها بقى أحسن و فايقة أكتر....و البنزين بقى أوفر من الشكل القديم....فعلاً قلت فى نفسى أنت راجل سواق مش أى كلام .....
أعتقد بالنسبة لينا أحنا كملاك و أستهلاك خفافى ممكن نبيع العربية قبل الوصول لهذا الكم على العداد.....
تحياتى
