المشاركة الأصلية كتبت بواسطة amrelsaqqa
هو احقاقا للحق يعنى الكلام ده صحيح الى حد كبير يعنى عربية زي التويوتا كورولا دى انت ممكن تزهق منها من كتر ما هى ما بتبوظش :d
بس للاسف الكوري واليابانى (على الاقل اللى بيجيلنا في مصر هنا ) لما بركبهم بحس انى راكب لعبة في كل حاجة وبتخنق وممكن كتير جدا من الناس يفضلوا الركوبة على الاعتمادية
عامة اليابانى هو اللى رهيب فعلا في الموضوع ده انما الكوري مش بنفس درجة اليابانى خالص يعنى عادى جدا مليانة اعطال واي عربية كوري داخلة على 10 سنين في السوق خلاص عمرها الافتراضى بح وتفتح بقها في كل حاجة
واحد صاحبى جايب عربية اوبترا 2006 كل يوم حوار ، البوابة ، حساس الكامة ، طرمبة الباور بقت خشنة فجأة وعايزة تتغير ومالهاش تصليح .. حساس الشكمان ، لا حساس المش عارف ايه .. عادى يعنى
الفكرة في الاوروبى عندك 3 حاجات :
اول حاجة ان فعلا الاعتمادية بشكل عام اقل من اليابانى بس المفروض مش بنفس الشكل المبالغ فيه اللى بيحصل عندنا
ثانيا وثالثا بقى ان العربيات دى اصلا بتستحمل جامد جدا والله في الاصل بس الفكرة انها بتتركب لحد ما تتهلك وغالبا المالك الاول بياخد خيرها كله من غير ما يحط ايده فيها حتى الصيانة الدورية البسيطة مش بيعملها عشان غلو قطع الغيار والصيانة عامة ، فطبعا على ما تروح للى هيركبها بعد كدة تبقى خلاص جابت اخرها ، المشكلة كمان ان مش اي حد بيفهم فيها فطبعا عندك عك وفتى للصبح ، العوامل دى كلها مع بعض بتخلى العربية لا تصلح تماما بعد كدة
بس عامة الاوروبى وفي الموديلات الجديدة بالذات معقول جدا والفروق اصلا بدأت تتلاشى لان التكنولوجيا بقت كلها شبه قديمة ومعروفة ، غالبا مفيش حاجة هتضرب منك قبل عمرها الافتراضى وطالما بتعمل صيانة كل حاجة هتفضل معاك كويسة ، انت بتتكلم في ميجان ولا اوكتافيا ، موديلات اكيد 2005 و 2006 ، اللى هو لو هتبص في الكوري تلاقي المناظر لها في الكوري انقرض اصلا ، وبتقارن لاشعوريا بكوري 2009 و 2010 !
اما الكورولا فدى اصلا عربية اسطورية وفلتة من فلتات الزمن في الاعتمادية زي ما الميجان والفيكترا بي ماهم فلتة برضه في عدم الاعتمادية، الكورولا مفيش فيها حاجة بتبوظ اصلا ، حتى لو قعدت قد عمرها الافتراضى مرتين تلاتة ! وده مش العادى ، ومش لازم كل العربيات تبقى زيها والا بنظلم كل العربيات
اما الاوكتافيا اللى مقلوبة دى فطبعا واضح ان الحالة اصلا تعبانة والعربية اتلعب فيها للصبح وعادى يعنى ما البي ام نفسها ممكن تقلب ، حسب الحادثة ، ممكن العربية اتقلبت بسبب اللى راكبها داخل ملف على 190 مثلا والكاوتش في الضياع مثلا او الجو مطر مثلا او اي سبب كان او اهمل صيانة وحصل مشكلة في انظمة الفرامل مثلا ، ايا كان يعنى .. . اللى هو لو راكب يابانى ودخل نفس الملف على 110 هيتقلب برضه
او حادثة كبيرة جدا برضه اللى هو لو كوري او يابانى مكانها كانت العربية طارت 5 كيلو في الهوا واتفرتكت 100 حتة اصلا !