حضرتك ليه أشتريت العربية ؟؟

**waleed0** · 18-05-2014 11:00 PM

انا شايف ان قلة العربية احسن بصراحة فى مصر
انا واحد من الناس عندي مقدرة اني اجيب عربية , بس شايف ان مشاكلها اكبر من فوايدها فى مصر
سعر العربيات غالي فى مصر
مرتب للجراج
صيانة واصلاح
تراخيص
مخالفات
زحمة
ركنه
سرقة
الفايدة الوحيدة ليها انك بتنزل من بتكم تركب وتروح مشوارك مش حتقف توقف تاكسي وتستني بقي
مميزات بقي التاكسي بالنسبة ليه
قرف السواقة مليش فيه علشان مش انا اللي سايق
مش محتاج جراج
مش محتاج ركنه
العربية عطلت حانزل واخد تاكسي غيرة واكمل حياتي
بقعد فى اي حته وانا مش خايف ان عربيتي بره في الشارع ممكن تتسرق
عيبه الوحيد اني بنزل استني اشوف تاكسي فاضي
وشكرا

**dede_dodo88** · 18-05-2014 11:41 PM

اشتريت عربية عشان البلد مفيهاش مواصلات عامة تحترم ادمية المواطن تخليني أقدر اعتمد عليها في أي وقت + أني بحب العربيات و بستمتع بالسواقة..
أكيد العربية الشخصية بتوفر جو من الخصوصية و الراحة, تبقى في عربيتك قافل أزازك مشغل تكييفك مشغل مزيكتك..
أنا الحمد لله شغلي مش بعيد عن بيتي فبتعرض بدرجة أقل لمشاكل و مشاحنات الطريق لأني مش بسوق كل أيام الأسبوع, لكن الحاجات اللي بتستفزني هي عدم أحترام المصريين لمباديء أحترام الطريق; زي أحترام الأشارة, الحارة, المشاة, السرعة القانونية, أتجاه السير,,, و غيرهم و غيرهم من مظاهر أنعدام الأنضباط و الأحترام..
بس من وقت للتاني كده بشتاق أني أركب تاكسي مثلاً عشان أقعد على الكنبة ورا و أتفرج على الشوارع و الطريق من غير ما أكون شاغل بالي بقى بالسواقة و همها..

**mikho83** · 19-05-2014 10:17 AM

ناوي أشتري عشان ارحم نفسي من 5 ساعات بتضيع كل يوم في المواصلات، وعشان الحرامية اللي انتشروا كتير جدا في المواقف وبيستغلوا الزحمة ويقوموا بعملتهم السودا، عشان اترحم من السواقين اللي بيمشوا في شوارع بمزاجهم ويغلوا الأجرة بمزاجهم ويركبوا على الخط اللي هما عايزينه مش المحدد ليهم، عشان أترحم من المدخنين اللي بمنتهى البرود بيولعوا سيجارتهم ولما تطلب منه يطفيها يبقى ناقص يطفيها في جسمي، وكمان عشان الأغاني الهابطة اللي مضطر اسمعها كل يوم ، وأخيرا عشان لما بطلع مشوار مع أسرتي بنتبهدل كلنا

**drcobra** · 19-05-2014 10:46 AM

علشان اشترى كرامتى انا واسرتى

**S O P H O S** · 21-05-2014 12:09 PM

بتكون كويسة لو ظرف طرئ ومعاك ناس

**adel 000** · 21-05-2014 12:38 PM

الصراحه بالرغم من الزحمه والعشوائيه الفوضويه فى شوارع مصر بس برده العربيه ريحتنى كتير عن لما كنت ابقى واقف فى الزحمه وفى الشمس فى عز الحر مستنى ميكروباص يجي واول ما يوصل تلاقى هجوم عليه ووجع الدماغ ده

**ayman20100** · 21-05-2014 02:47 PM

انت بتتكلم في موضوع يطول شرحه
عاوز الخلاصه
الاسرة ... انا لو عليا ممكن استحمل المواصلات بس بجد تسوى مليون جنيه انك تنزل انت واسرتك تاخد العربية وتروح مشوارك بكرامتك وترجع
العربية ليها سلبيات كتير صيانة وبنزين ومشكلة ركنه وغسيل ومتابعه ومصروف وترخيص ومخالف
لما ربنا رزقنى باول مولد وجربت اخرج بيه وكان لازم نروح الشغل يومياً الصبح ... ما استحملتش بهدلة الاسرة واخدت قرض بفايدة عالية ساعتها جداً عشان الحق اجيب عربية وبجد بعد كده عرفت قيمة العربية في بلد ما فيهاش مواصلات بني ادمين يركبوا فيها

**a7medsh3rawi** · 21-05-2014 03:00 PM

ولله فى خلقه حكم
العربيه ليها مميزات وعيوب
والمواصلات ليها مميزات وعيوب
وكل شخص على حسب احتياجاته ونظام عمله وحياته بيقرر ايه الاحسن

فى رأيي الشخصى انا بعتمد على الاتنين
يعنى معايا عربيه وبرضه بستخدم المواصلات ودا الاحسن بالنسبه ليا

**M.ABDOU** · 21-05-2014 05:12 PM

من وجهه نظرى المتواضعه العربيه دلوقتى لواحد متجوز وعنده اطفال مش اوبشن

ده الزااامى وحاجه لا بد منها لان البديل هوا المرمطه والتحرش

مفيش زى زمان مواصلات او حتى ميكروباصات ينفع الواحد يركبها

انا شايف عن نفسى ان العربيه نعمه كبيره ربنا يدمها عليا واتمنى ان اى حد مش فى مقدوره يجبها دلوقتى ان ربنا ييسرهاله ويجبها