حياتي بعد وفاه امي

**AboELsoud** · 19-05-2014 03:08 PM

السلام عليكم و رحمه الله و بركاته

الحقيقه انا اول مره اتكلم في الموضوع ده مع حد سواء على النت او مع صديق او قريب

الموضوع بكل بساطه انه امي توفت من 5 سنين و 4 شهور حتى كتابه هذا الموضوع

و الموضوع ده لسه مأثر فيا لحد دلوقتي زي ماتكون اتوفت امبارح مش من 5 سنين

و الصراحه امي بالنسبه لي مكنتش كل حاجه في حياتي / لا دي هيه كانت حياتي كلها

انا من و انا صغير كنت الطفل اللي بيقولوا عليه ( ابن امه ) و مبحبش اروح في مكان من غيرها

و وصلت لاني لما كنت اجي من المدرسه مطلعش البيت الا لما هيه تيجي من الشغل ( مع ان اخويا بيبقى فوق في البيت )

و الحمد لله لما كبرت عقلت و بقيت بخرج مع صحابي و كتير بس برضه بالنسبه لي كانت اهم حاجه في حياتي

اي حاجه كنت بفكر فيها او عايز اعملها كان لازم رأيها و رضاها عن الموضوع

و امي كانت من النوع الطيب جداا جداا و عمرها ما زعلت مني ابدا الا لما مكنتش بصلي لحد اما الحمد لله بقيت منتظم في الصلاه

و في يوم من الايام اكتشفنا ان عندها Breast Cancer و قعدت تتعالج منه لمده 4 سنين

و فاتوا الـ4 سنين بالعافيه و كانوا اصعب 4 سنين في حياتي و انا شايفها في المستشفى و تعبانه اغلب الوقت

و شاء الله انه بعد الـ4 سنين ( كنت في تانيه كليه ساعتها ) انها ترتاح من الدنيا و تطلع روحها الى بارئها و هيه ( سبحان الله ) مبتسمه

اقسم بالله اكتر شئ هون عليا رؤيتها اخر مره قبل الكفن رؤيه وجهها و هيه مبتسمه ( دلاله على حسن الخاتمه ) ( اللهم ارزقنا حسن الخاتمه )

بس من ساعتها و انا حاسس اني مش عايش الحياه اصلا

و حاسس ان الحياه ملهاش طعم ولا ليها لازمه

و الواحد مبقاش عنده هدف يسعى له و حتى لو عنده هاسعى له عشان مين

و لو جه موقف مفرح بفرح جدا ساعتها بس اول ما اقعد مع نفسي بفتكر انه كان هيبقى احلى لو هيه موجوده معايا

يمكن لما الوحد ينشغل في الحياه شويه ( في الدراسه من سنه - و دلوقتي في الشغل ) بينسى

بس بمجرد ما يقعد مع نفسه يفكر شويه ولا يشوف موقف وفاه لاي حد من المقربين يرجع يفتكر تاني و يتعب تاني و يحس ان الحياه ملهاش لازمه تاني

انا عارف انه الحل انك ترضى بقضاء الله و قدره و انا الحمد لله راضي لابعد حد و بحمد ربنا كمان انه الهمني الصبر بعد الوفاه و كنت متماسك الى درجه بعيده ( عائلتي كانوا خايفين عليا من الخبر اكتر ما كانوا خايفين على اختي الصغيره من شده تعلقي بامي )

بس انا الصراحه كنت حابب افضفض بحاجه يمكن عمر ماحد سمعها مني قبل كده

عشان بحس ان المنتدى ماهو الا اخواتي الكبار و الصغيرين

اللهم اغفر لامي و ارحمها و اعفو عنها و اجعل قبرها روضه من رياض الجنه

**أحمد عبدالله** · 19-05-2014 03:10 PM

اسال الله ان يرحمها

**lemo147** · 19-05-2014 03:17 PM

ربنا يرحمها يارب ويجازيها خير عنك
حاول تطلع عنها صدقة وادعيلها كتير
ربنا يرحم الجميع يارب

**canner** · 19-05-2014 03:29 PM

اخى العزيز انا حاسس بيك جدا علشان انا فى نفس موقفك والدتى توفت من 10 شهور تقريبا و من ساعتها مش حاسس بطعم الدنيا و حاسس شعور اللى بيبقى صايم و بيضيع الوقت لحد ما المغرب ما يدن علشان يفطر انا حاسس انى عاوز اضيع اللى فاضل من عمرى و يجرى بسرعة علشان اشوفها تانى و انا برضه كنت لما بعمل حاجة حلوة كنت بعملها علشانها و لما بنجح كنت برضه علشالنها دلوقتى اللى مصبرنى ان افكر ان ربنا اللى حرمنى منها فى الدنيا ح يجمعنا ان شاء الله فى الاخرة و دايما بدعلها ليل نهار بالدعاء ده يارب اعفو عن امى و فرحها و ارحمها و سكنها فى الفردوس الاعلى

شعور صعب جدا ان فى الدنيا الصعبة دى اللى كان بيهون عليك الحياة و اللى عايش علشانه يروح منك و تواجه الدنيا لوحدك و المواقف اللى كانت تعدى عليك و تستنى لما تاخد رأيها اصبحت مرة واحدة انك مطالب انك تاخد القرار لوحدك

لكنى دايما لما تصعب عليا الدنيا اتذكر قول سيدنا سعيد بن عامر لزوجته
"لقد كان لي أصحاب سبقوني الى الله... وما أحب أن أنحرف عن طريقهم ولو كانت لي الدنيا بما فيها"

فى يوم من الايام ح نتقابل مع من نحب و لن نخشى موت او مرض او حزن

اخى العزيز اعرف ان الكلمات اللى فى الدنيا لن تهون عليك ما تحس به و لن يشعر بك احدا الا من ذاق نفس مرارة الكأس و انا كل يوم قبل ما انا اقول لربنا يا رب لقد استودعت عندك امى امانة

ما تخفشى فالدنيا دى ح تعدى بسرعة و مافيش اسرع من الايام و بعدها سنجتمع مع من نحب ان شاء الله بس المهم ح تعدى الايام ازاى؟ لازم نعمل اللى يرضى ربنا علشان يتحقق لنا اللى بنحلم بيه

**marsguy** · 19-05-2014 03:31 PM

الله يرحمها ويحسن إليها ويلحقق بيها على خير في الفردوس الأعلى

**friendship7897** · 19-05-2014 03:42 PM

موضوعك خلاني أعيط ودا بسبب التالي :-
أولاً : أندمجت جداً وتأثرت مع قصتك وإرتباطك بوالدتك
ثانياً : فكرتني بجدتي يرحمها الله كانت بمثابة الأم لي
ثالثاً : كلي أسف أن وصفك لنفسك ذكرني بطريقة إرتباط أبني بي وتعلقه بي ، ودائماً أخشى المرض والموت بسببه ، لأنه عاطفي جداً وكل كلماته وأفعاله تؤكد أنه ممكن يكون زيك لو فقد عزيز عليه .

ربنا يصبرك وعايزة أقول لك وأقول لكل من فقد أمه أنت قدامك كتير علشان تقدمه لوالدتك ( ربنا يرحمها ) قال رسول الله صلى الله عليه وسلم : "إذا مات العبد انقطع عمله إلا من ثلاث: صدقة جارية، أو علم ينتفع به، أو ولد صالح يدعو له"
سأل رجل النبي صلى الله عليه وسلم وقال : يا رسول الله هل بقي عليّ من بر أبوي شيء أبرهما به بعد موتهما ؟ قال : أجل ، خصال أربع ، الصلاة عليهما- يعني الدعاء لهما-، والاستغفار لهما ، وإنفاذ عهدهما ، وإكرام صديقهما ، فهذا الذي بقي عليك من برهما بعد موتهما
وأقول كمان لكل من له أم ما زالت حية ترزق ، فأذكرك أن تقبل قدميها وتكون محسناً " وبالوالدين إحساناً "
ولا تغفل لحظة عن إرضاءها قبل أن يأتي يوم تعجز فيه أن تقدم لها شئياً
ربنا يرحم والدتك وموتانا وموتى المسلمين يا رب العالمين

**friendship7897** · 19-05-2014 03:47 PM

المشاركة الأصلية كتبت بواسطة canner

اخى العزيز انا حاسس بيك جدا علشان انا فى نفس موقفك والدتى توفت من 10 شهور تقريبا

أسأل الله العظيم ان يغفر لوالدتكم ويدخلهما الجنة بغير حساب فهو ولينا والقادر على كل شئ

أسأل الله ان يترقوا في الجنة الى منزلة الانبياء والشهداء

اللهم اجعل قبرهما روضة من رياض الجنة وجعل ذكر الله مؤنسا لهما

اللهم انك وعدت ووعدك حق نعم الجزاء للصابرين فأرزقهما اجر الصابرين

اللهم ابدلهما بدار خير من دارهما واهلا خير من اهلهما

اللهم احشرهما مع اصحاب اليمين وآنسهما في وحشتهما وآمنهما من الفزع يوم القيامة

اللهم ارحم جميع موتى المسلمين واغفر لميتنا وحينا وصغيرنا وكبيرنا

**rotanamasoud** · 19-05-2014 04:55 PM

ربنا يرحمها
فكرتنى بمقوله من مقولات هتلر
يظل الرجل طفلا حتى تموت امه فيشيب فجئه

**gade2** · 19-05-2014 05:30 PM

المشاركة الأصلية كتبت بواسطة rotanamasoud

ربنا يرحمها
فكرتنى بمقوله من مقولات هتلر
يظل الرجل طفلا حتى تموت امه فيشيب فجئه

الله على المقوله دى

**rotanamasoud** · 19-05-2014 05:46 PM

المشاركة الأصلية كتبت بواسطة gade2

الله على المقوله دى

اتفضل يا باشا النص الاصلى

الموضوع: حياتي بعد وفاه امي

LinkBack

أدوات الموضوع

عرض

حياتي بعد وفاه امي - انشر الموضوع فى :

-

-

-

-

-

-

المواضيع المتشابهه

وفاه ولي العهد السعودي

وفاه رشيد يكيني

شهادة وفاه الشاهين

الكلمات الدلالية لهذا الموضوع

المفضلات

المفضلات

ضوابط المشاركة