تجربتي مع الموبينة للافادة
السلام عليكم و رحمة الله و بركاته
من يومين لقيت العربية فجاة بتقطع و انا ماشي و لمبة التشيك نورت وقفت و بطلتها شوية و بعدين دورت لقيت اللمبة طفت
اول ما اتحركت بالعربية اللمبة نورت تاني و العربية بدات تقطع و تنتش و مفيش سحب خالص
شكيت في طرمبة البنزين او البوجيهات بس كنت مستغرب ان العربية على السلانسيه مضبوطة و المشكلة بتظهر بعد ما اتحرك بالعربية
كمان اللي اعرفه ان لمبة التشيك مالهاش علاقة بالبوجيهات او طرمبة البنزين
رحت لميكانيكي اول مرة اتعامل معاه قعد يجرب حساسات من عنده
جرب حساس الكرنك و حساس البوابة و حساس الايدل و في كل مرة لمبة التشيك بتطفي و اول ما يزود من بكرة الاكسراتير اللمبة تنور تاني
قاللي نفصل البطارية شوية عشان نريح الكونترول يمكن المشكلة تتحل بصراحة حسيت انه مش فاهم و بيجرب في العربية سيبته و رحت عملت سكان كمبيوتر عند كهربائي طلعلي كود خطا 64
الكهربائي قاللي الموبينة بايظة لازم تتغير مع اني لما شيلت الكابلات من الموبينة و العربية دايرة لقيت شرارة قوية من الاربع كابلات مع العلم ان الموبينة صيني و انا شاري العربية كدة و معملتش معايا مشاكل قبل كدة و برضه مش عارف ايه علاقة الموبينة بلمبة التشيك بس مكانش قدامي غير اني اسمع كلام الاسكان
جيبت موبينة استيراد لان بصراحة الميزانية بعافية شويتين و المشكلة اتحلت و العربية رجعت تمام
حبيت انقل التجربة ربما يستفيد بها احد كما استفدت انا كثيرا من هذا المنتدى الرائع
و ايضا اطمع في نصيحة الخبراء هل ما فعلته صح و لا غلط خصوصا موضوع الموبينة الاستيراد
ولا كان لازم اجيبها جديدة
و شكرا