السلام عليكم و رحمة الله

دى عاشر مرة فى عاشر صفحة اكتب انى عضو جديد فى المنتدى

انا عضو جديد فعلا لأن دى اول مشاركة ليا بعد ما اشتريت عربية الحمد لله و هاستلمها من صاحبها خلال ساعات

بعد عناء شهور و تصفيات بين كل انواع العربيات اللى تتخيلوها اتلعب اخيرا ماتش الفاينل اللى اتأخر قوى و كان بين نيسان تيدا شكل 2007 و مازدا 3 نفس الدفعة . و مش قادر اقولكوا قد ايه كان ماتش حامى و كل شوية واحدة تحط جون فى التانية و تبقى راكبة الماتش لدرجة ان اى حد يتابع الماتش يومين تلاتة يقول خلاص النتيجة محسومة لصالح فولانة و اكون خلاص رايح اخلص فى واحدة منهم تقوم التانيةتفرك و الغيرة تشتغل و تعمل اى حاجة و تقوم منزلالها اعلان على دوبيزل ولا كونتاكت اقوم اتلفت لها مرة واحدة و موازين الماتش تتغير و يسخن اكتر. و كل شوية ينزل اعلان فى حدة محدوفة ابعد من اللى قبلها تقوم التانية تقول لصاحبة الاعلان مش هايروح طبعا تقولها لا هايروح تقولها انسى يا ماما استحالة يخبط المشوار ده كله ده باع عربيته و بيتحرك على رجله تقوم تقولها هاتشوفى. و انا زى المدب ارقع المشوار كل مرة . فيصل المعادى المريوطية الهرم الدقى الشيراتون المطرية. اول امبارح و الله روحت اشوف مازدا 3 فى بنها و لونها اسود اللى كان نفسى فيه و اتفقنا على كل حاجة و رجعت البيت الساعة 3 الفجر و تانى يوم الصبح اختلفنا شوية على طريقة الفحص و بعدين على العصر اقتنعت بكلام الراجل و خدت تاكسى و روحت لحد موقف العاشر عشان اقابل اخويا و نروح بنها نجيب العربية و فلوسى على كتفى و على الدائرى كلمت الراجل قاللى العربية اتباعت. رجعت بكل يأس و قولت ابص بصة فى سوق الاحد قبل ما اخر عربية تمشى و وصلت هناك المغرب و سبحان الله لقيت مازدا 3 واقفة و نفس المواصفات و اللون و كالعادة اتفرجت و اتفقنا و قاللى كلمنى بكرة نتفق على الكشف يكون فين كلمته فعلا الصبح قاللى اسف العربية اتباعت. تقريبا 6 او 7 مازدا يتباعوا قبل ما اوصلهم. فى النهاية احب اقول لمازدا 3 حقيقي هارد لك انتى كنتى الحصان الاسود فى المسابقة دى و هاتبقى الوصيفة الاولى انما التاج الملكى انهاردة اتحط خلاص على الملكة . نيسان تيدا 2007 سيدان. اهلا بيكى فى اسرتنا الصغيرة.