ايه رأيك فى فرض ضرائب على المصريين العاملين بالخارج؟
دا مجرد سؤال باساله لينا احنا المصريين اللى بنشتغل برا مصر.
أيه رأيك فى فرض ضرائب على المصريين العاملين بالخارج.
أنا حابدأ بنفسى انا واحد من المصريين دول باشتغل فى السعوديه.
الاول يعنى ايه ضرائب ؟
حسب فهمى ان الدوله اى دوله بتفرض مبالغ معينه على الدخول اللى بيحصل عليها الناس اللى شغالين فى البلد دى مش مهم انت من من اهل البلد دى او اجنبى المهم ان دخلك حصلت عليه من جوا شغلك فى البلد دى.
طيب ايه الغرض من الضرائب دى؟
ببساطه ان البلد اللى انتا بتشتغل فيها بتقدملك خدمات كتيره طرق مستشفيات امن وشرطه مدارس وغيره والضرايب دى علشان تصرف على الحاجات دى.
طيب نرجع لموضوع مصر.
أولا انا مش باشتغل فى مصر ومصدر دخلى مش من مصر.
ثانيا اى خدمه الحكومه بتقدمها فى مصر انا مش مستفيد منها لأنى ببساطه عايش برا مصر
يبقى مش منطقى ابدا انى ادفع ضرايب فى مصر.
ولما بارجع مصر فى اجازاتى اعتقد ان العمله الصعبه اللى باجيبها معايا مصدر مهم لمصر .
وعلى فكره لو حد حابب يساهم ويتبرع لمصر من العاملين بالخارج فمصر حاترحب بيه جدا.
بس انا ضد انك تفرض عليا انى اساهم غصب عنى وادفع ضرائب
انا شايف ان فى مصر حاجات كتير يفكرو فيها قبل ما يفكرو فى موضوع الضرائب علينا.
مثلا يطبقو الحد الادنى والحد الأقصى
انا سمعت فى فيه فئات معينه فى مصر مش بتدفع ضرائب اصلا الاول يخلوهم يدفعو ضرائب
يفرضو ضرائب على كبار رجال الاعمال بنسب اكبر
وصول الدعم لمستحقيه.
فى انتظار ارائكم وشكرا
