الموضوع: معني تعريق المايه من الشكمان

علميا انا مسمعتش عن الموضوع دا حاجه يمكن مدورتش فالنت بس سمعت انه مؤشر كويس وفي ناس تانيه قالت انه مؤشر مش كويس
طيب الفيصل ايه وهل فعلا العربيه بعد ال ١٠٠ الف الاولي بيكون الموتور بدأ يقرا فعمر افتراضي ولا المعلومات دي غلط ولا ايه
تحياتي

انا مش فاهم يعني ايه تعريق بس انا اعرف لما الشكمان ينقط مية دي حاجة كويسة ليه بقى السبب العلمي
ان الكتاليتك كونفرتر الي هي واحدة من علب الشكمان بيحصل فيها تلات تفاعلات
التفاعل الي بينزل مية ده هو

o-----hc----- co2+h2oبدخل اوكسجين

بندخل هو مع النات الي طالع من العادم hc هيدروجين كاربون الاكسجين هيتحد مع hc هيطلع غاز ثاني اكسد الكربون + ميه ويبقى كده التفاعل ده نجح ولازم يطلع ميه وده دليل ان التفاعل جوه الكتاليتك شغال كويس


اتمنى انك تكون فهمت حاجة وان تكون الاجابة سلمية للسؤال بس الاجابة دي من النحية العلمية عشان انا معنديش خبرة بالسوق :)

المشاركة الأصلية كتبت بواسطة akmm

معنى كلام حضرتك ان لو فيه افتراضا سياره موتورها متهالك او مفوت ولكن حطينالها شكمان كامل اصلى هيحدث هذا التفاعل وتنزل قطرات الماء من الشكمان اول فتره التشغيل ...... اشك ؟

انا معاك فالكلام دا بس هوه بيتكلم علميا بصوره بحته
اللي عاوز اعرفه ازاي عربيه عامله ١٨٠ الف وبتعرق ميه مالشكمان امبارخ دا حصل قدامي فالغردقه بالليل والدنيا طبعا حرارتها اكبر من عندك فالقاهره عربيه سيفيا بتاعت زميل كنا وقفين بندردش ركز بالليل مش الصبخ والاقي عربيته بتنقط ميه مالشكمان مبقتش عارف اقول ماشاء الله ولا انبهه هيه اوتو.
المهم هل دا دليل علي صحة الموتور ولا دا دليل للحرق الجيد لمكون الوقود مع نسبه الهواء الداخل للمحرق واتخادهم

تعريق المية بسبب ان بخار المية نفسها ناتج لتفاعل احتراق البنزين العادى جدا من قبل قصة الشكمان ...
وطبعا الشكمان بعد كدة برضه بيحصل فيه تفاعل تانى

بس الفكرة ان بخار المية ده ما بيخرجش في صورة تعريق غير لو الحرق تم بالنسب المثالية المظبوطة لخليط البنزين والهوا وخالى من الزيت ويكون الموتور والشكمان بارد الى حد ما والجو برد شوية عشان يساعد في عملية التكثف والموضوع ده يتم لدقايق معدودة في الغالب في الصباح الباكر او لو العربية ماشية على طريق مسافة طويلة في الهوا وجيت تقف سلانسيه تلاقى تعريق المية ، انما مفيش عربية تجيب مية في عز الظهر في الزحمة مثلا .. هنا المية تبقى مشكلة اللى هو النوع التانى من خروج المية للعادم



النوع التانى ده نتيجة خلل في وش السلندر او الجوان بيخلى ماء التبريد نفسه يدخل في غرفة الاحتراق وبتبقى واضحة وبكمية كبيرة ومش على شكل تعريق او تنقيط ، لا على شكل نفخ او نفث للمية طول ما العربية ماشية ويزيد لما العربية تسخن عكس التعريق العادى وطبعا تلاحظ ارتفاع في الحرارة ونقص في المية ، او طحينة في الزيت ... ( بتبقى قصة واضحة جدا )

اما علاقة ان التعريق العادى دليل على كفاءة الموتور
الموضوع ده مش دقيق 100% يعنى هو مؤشر عام على ان الموتور ده بيحرق كويس ، كهربته مظبوطة ،كاتينته مظبوطة ، الشنابر كويسة ..
اما لو في تعريق زيت على البوجيهات مثلا بسبب خلل من ناحية الصبابات ، او تقدم في عمر السبيكة والكرنك ممكن جدا الموتور يعرق مية برضه طالما الحرق مظبوط (الكربراتير او الرشاشات تمام ) والكهربة مظبوطة ومفيش كمية زيت كثيفة بتتحرق مع العادم


طبعا في حالة الشنبر كمان ، ممكن تحط زيت شنبر والموتور يعرق ويبقى كأنه 100 100 برضه ..!

الف شكر للتوضيح

ما علاقة ان التعريق العادى دليل على كفاءة الموتور
الموضوع ده مش دقيق 100% يعنى هو مؤشر عام على ان الموتور ده بيحرق كويس ، كهربته مظبوطة ،كاتينته مظبوطة ، الشنابر كويسة ..
اما لو في تعريق زيت على البوجيهات مثلا بسبب خلل من ناحية الصبابات ، او تقدم في عمر السبيكة والكرنك ممكن جدا الموتور يعرق مية برضه طالما الحرق مظبوط (الكربراتير او الرشاشات تمام ) والكهربة مظبوطة ومفيش كمية زيت كثيفة بتتحرق مع العادم

بس رجاء توضيح الجزئيه دي باستفاضه مش فاهمها
طيب امتي يكون التعريق دا دليل علي صحت الموتور لما اكشف علي ايه مثلا لو البوجيهات امرها سهل السبيكه صعب تعرف عمرها الافتراضي ولا ايه