الموضوع: غسيل موتور السياره بالمياه

اولا كدة و فى البداية الفوم دة ولا له اى لزمة... دا تستعملة لما الموتور اصلا يكون نضيف لانة مش بيعمل اى حاجة

لو عندك على الموتور ترشيح زيت او شحم يفضل الاول تغسل المنطقة دى ببنزين او جاز مع فرشة عشان تدوب كل الترسبات من على المكنة و يبقى سهل بعد كدة تغسل الموتور و يبقى نضيف

الغسيل بيبقى بالماء و الصابون السائل اما عن طريق سفنجة او فوطة او لو عندك كومبريسور تملا البنتة بتاعت الدوكو مية و صابون و ترش المكنة بيه

طبعا بال فوطة او السفنجة تدعك الاماكن اللى فيها وساخة لسة قافشة لحد ما تنضف و بعد كدة تشطف بمية نضيفة

اهم حاجة فى الموضوع اوعى تستعمل مية باندفاع قوى زى خرطوم غسيل الشاسية اللى فى محطة البنزين او كيرشر او اى مصدر لاندفاع قوى للمية لان دة بيخرب الدنيا

مش فارقة تغطى اى حاجة فى الحوض لان كل الفيش و السلوك و المكونات معزولة عن المية... هنا المقصود هو العزل عن المية العادية من خرطوم عادى مش مية باندفاع عالى

و على فكرة برضة البوبينة محكمة السد تماما و مش هيجرالها حاجة لو دلقت عليها فنطاس مية... طبعا اللى عندة مشاكل فى الضفيرة و العزل عندة مش مضبوط ميفكرش يغسل المكنة اصلا

بعد ما تخلص دور المكنة و سيبها دايرة لحد ما سخونية المكنة تبخر كل اثار المية اللى على المكنة

MMamdouh