الخاصه لغات vs التجريبى المتميز لغات

**khaled_sabry** · 21-05-2014 03:34 AM

السلام عليكم
انا عاوز ادخل ابنى مدرسه لغات - و الحمد لله سنه فى شهر 10 القادم حيبقى 5 سنوات و 10 اشهر مما يؤهله لتجاوز معظم تنسيقات المدارس اللى فى المعتاد بتاخد من 5 و شهرين فى المتوسط
الناهرده كنت بقدمله فى مدرسه جابر الانصارى (الزيتون) و لاقيت هناك مدرسه بتقولى قدمله فى مدرسه الفيوتشر (تجريبى متميز لغات ) فقولتلها انا كان نفسى فى حاجه خاصه علشان التحصيل يبقى افضل
قالتلى هناك افضل من هنا - هنا (جابر الانصارى الخاصه) الفصل بيبقى فيه 40 تلميذ لكن هناك 25(فيوتشر التجريبى المتميز) فقط على الرغم من فارق المصاريف بين المدرستين

فإيه رأيكم فى الكلام ده

بصراحه كلام المدرسه دى قلب حساباتى اللى كانت مبنيه على ان الخاص مافيش احسن منه و الحكومى مافيش اسواء منها
مع ملاحظه ان ابنى مش بيعرف يتكلم كويس لغايه دلوقتى (عامل وراثى و كل عائلتى متأخره فى الكلام :) ) و فيه بعض الحروف واقعه من كلامه

**svneleven** · 21-05-2014 06:05 AM

روح المدرسة التجريبي و اسأل أي أولياء أمور هناك في جميع المراحل و شوف رأيهم ايه. و راعي أن مهما كانت مدرسة محترمة مش هيكون فيه اجناع 100% عليها.

**ENG.MaRk** · 21-05-2014 09:05 AM

تجريبي أحسن و أرخص تعليميا و لكن أخلاقيا .... حدث و لا حرج

**khaled_sabry** · 21-05-2014 09:49 AM

المشاركة الأصلية كتبت بواسطة eng.mark

تجريبي أحسن و أرخص تعليميا و لكن أخلاقيا .... حدث و لا حرج

اخلاقيا بمعنى ايه ؟؟؟ يعنى فيه تجاوزات و الفاظ خارجه مثلا بين التلاميذ و بين بعض
ولا الاخلاق منعدمه لدى الاساتذه كمان ؟؟؟ ولا ايه بالظبط
يهمنى جدا اعرف

**douha_wise** · 21-05-2014 10:34 AM

فى اكتوبر المدارس الخاصه سواء عربى او لغات زفت و الحمدلله و فلوس على الفاضى يعنى كثافة الفصل بالفعل اعلى من المدارس التجريبى و اللغات التجريبى المميز و الادارة ايضا فى هذه المدارس افضل من الخاص و بالذات موضوع الاداره ده و القليل جدا و يعد على نصف اصابع اليد الواحده من المدارس الخاصه كويس
اما من ناحية ان مستوى الاخلاق فى الخاصه افضل من التجريبى و المتميز فهذا للأسف ليس بصحيح و عن خبره سنوات فكلاهما فيه السيئ و الأسواء و المهم انك تتابع اولادك باستمرار و تذهب للمدرسه و تعرف من هم اصحابه و ترشده و تتابع مستواه مع المدرسين
استخير الله و ربنا يرشدك لما فيه الخير لك و للأسره و يحفظ اولادك و اولادنا جميعا

**احمد المصرى** · 21-05-2014 11:10 AM

المشاركة الأصلية كتبت بواسطة douha_wise

فى اكتوبر المدارس الخاصه سواء عربى او لغات زفت و الحمدلله و فلوس على الفاضى يعنى كثافة الفصل بالفعل اعلى من المدارس التجريبى و اللغات التجريبى المميز و الادارة ايضا فى هذه المدارس افضل من الخاص و بالذات موضوع الاداره ده و القليل جدا و يعد على نصف اصابع اليد الواحده من المدارس الخاصه كويس
اما من ناحية ان مستوى الاخلاق فى الخاصه افضل من التجريبى و المتميز فهذا للأسف ليس بصحيح و عن خبره سنوات فكلاهما فيه السيئ و الأسواء و المهم انك تتابع اولادك باستمرار و تذهب للمدرسه و تعرف من هم اصحابه و ترشده و تتابع مستواه مع المدرسين
استخير الله و ربنا يرشدك لما فيه الخير لك و للأسره و يحفظ اولادك و اولادنا جميعا

معلش بس انا ابنى هيكون فى بدايه شهر 9 القادم هيكون 3 سنوات و 9 شهور هل ينفع اقدمله فى مدرسه تجريبى او خاصه

ولو تعرف افضل مدارس تجريبى فى اكتوبر ايه اكون شاكر جدااااااااااااااااااااااا اااااا

**محمد المصرى** · 21-05-2014 11:57 AM

احسن حل عشان تعرف المدرسة ده كويسة او لأ
كل اولياء الامور فى كل مدرسة بيعملو جروب للمدرسة
انت هتدول على الجروب ده وتشترك فيه وهتحسن كانك عايش فى المدرسة

وبالتوفيق ان شاء الله

**douha_wise** · 21-05-2014 12:25 PM

المشاركة الأصلية كتبت بواسطة احمد المصرى

معلش بس انا ابنى هيكون فى بدايه شهر 9 القادم هيكون 3 سنوات و 9 شهور هل ينفع اقدمله فى مدرسه تجريبى او خاصه

ولو تعرف افضل مدارس تجريبى فى اكتوبر ايه اكون شاكر جدااااااااااااااااااااااا اااااا

اللى انا اعرفه ان السن بيكون اربع سنوات أو اكبر عند التقديم له فى المدارس التجريبى
و بالنسبه لافضل المدارس اللغات التجريبى المميز فهناك المدرسه الالمانى بالحى الرابع الكثير بيشكر فيها و بعدها الصينى بالحادى عشر امام سنتر المصطفى لكن انا افضل المدارس القوميه امام مركز سوزان مبارك الاستكشافى و المدارس القوميه أظنها الأفضل و لها تايخ مميز و لو اتجهت للمدارس الخاصه فهناك مصر الرائده للغات بعد مستشفى الزهور بالسابع أو الخليل بالحى الثامن لكن لا اعرف بالتحديد بيقبلوا من سن كام