الموضوع: سيات توليدو Vs تويوتا كورولا

موضوع مفيد ومهم جدا وجزا الله صاحبه خير الجزاء

وتقريبا الموضوع طير مني اليوم لكن نقدر نقول فهمنا بعض انماط التفكير للشعب المصري لاني فعليا قرأت ال12 صفحه بتركيز والحمدلله
وبعتذر ان تعليقي هيكون عام وخارج اطار المقارنه نظرا لما قراته من تعليقات لمدة ساعات.

للأسف احنا متأخرين جدا كمستهلك مصري في فهم كيفية الشراء لأي سلعه مش بس السيارات.
تسمع كلمات من نوعية "ايه الاحسن" او "انا عاوز احسن حاجه" او "طب دي احسن ولا دي؟" وغيرها من الكلمات اللي بتنم عن تفكير ساذج بلاش نقول كلمه تانيه،
لازال عند الغالبية فكر واعتقاد اني كمستهلك لازم ابقى واد شاطر واشتري "افضل حاجه" بأرخص سعر واتباهى بنباغتي في الموضوع ده!!
بالتالي لو حصل بعد الشراء ووجد فيها عيب كبير بيضطر يبلعه وهو عاصر ع نفسه لمونه ولا كأن شئ حصل لان ده من وجهة نظره طعن وتشويه في نباغته وعبقريته الشرائية!!
ده عند الغالبية طبعا، لكن هناك اقليه بيلتزموا الموضوعية والحيادية وافادة اخوانهم المستهلكين وبالاخير التأثير العام للسلوك الحيادي الموضوعي ده بيصب في مزيد من الجوده والتحسين للسيارة نفسها لكن قل من يتنبه لذلك.
بالاضافة الى المعتقد السائد الخاطئ في كيفية الشراء لكن ايضا بنلاقي العاطفة والميول بتتحكم في وعي اغلبية الشعب المصري بالتالي السمعه العامه للسياره زي ماكان واضح من تعليقات ناس كتير.

امتى هنعرف نتعلم نشتري.. يعني امتى هنقول "ايه اللي انا محتاجه؟" في العربية و "ايه حجم ميزانيتي؟" عشان بناءا عليه ابدأ عملية البحث عن واحده.
والله العظيم عن تجربه اغلب حاملي الفئات العاليه من الهواتف النقاله في مصر لا يستخدمون الا خمس مميزاتها وخصائصها وقيس على كده باقي السلع.
اللي يعمل كده عشان "المنظره والفشخره"! واللي يعمل كده عشان "الخوف من المستقبل"! واللي يعمل كده عشان "فلان مش احسن مني"! واللي يقولك "اصل ممكن قدام استحدم الاوبشن ده"! واللي يقولك "وجوده هيحسسني بالامان" شاري قرص كيتو باين عليه!
الامراض المجتمعيه المنتشره دي بتضرب المنافسه والمستهلك هو اكبر المتأذيين في الموضوع ده واهو حاصل حاليا.
عشان كده من المضحكات المبكيات العجيبات تلقى الواحد بيبع عربيته المتهالكه بسعر اعلى من السعر اللي اشتراها بيه ويقولك "منا عاوز اجيب جديد والاسعار زادت"!!
طيب انا ايه ذنبي في الجشع ده تجيب جديد ولا متجيبش خليك عاقل ومنطقي وعندك دين ازاي اخد عربيه متهالكه بسعر يفوق سعرها وقت ماكانت جديده ده اكل مال حرام..اه نسيت الاوبشن الاسطوري دواخل فبريكه..يعني كمصري تحمد ربنا على كده.. على اعتبار ان المستهلك العالمي بيمصمص في الصالون وقت اما يجوع!!
اللهم اجعلنا من عبادك الصابرين

عن نفسي عندي قناعه ان الفئه العاليه من السيارات الاوروبيه او الاسيويه في مصر تعتبر ولا حاجه لمثيلاتها في السوق الخارجي لاعتبارات كتيره فعلى ايه نتعصب ونتحيز وكله بالاخير واخد الختم المصري الاصيل اياه اللي كلنا مجربينه ولو جه الماني او ياباني حب يجرب اللي في السوق متأكد ان اول رد فعله هيكون "!WTF"
عن نفسي بحب الصانع الايطالي بشكل عام كفسلفه سيارات وبشكل خاص لاسباب تخصني زي الحاله الماديه ..الايطالي زي الفيات بيتفوق في اشياء غيره مش بيوفرهالي كمستهلك مصري زي الاعتماديه "وجهة نظري" وقطع الغيار والجانب الاقتصادي بشكل عام مع اداء مرضي مريح ، وانا كشخص مش عاوز حاليا اكتر من عربية بتمشي وثابته وفيها كاسيت وتكييف ومتوسطة الامان وشكرا.
والفيات كلنا عارفينها في مصر تعتبر ايه وحتى في اوروبا اكتر سيارة محققة جائزة افضل سيارة للعام في اوروبا او ECOTY.
لكن غيري ممكن يلاقي نفسه عاوز توب اوبشن ورفاهيه فبالتالي هيحط الالماني اول خيار في باله.
غيره ممكن يضع افضل عوامل الامان مطلبه الاول في شرائه لسياره بالتالي هيحط الاوروبي بشكل عام كخيار اول له.
غيرهم ممكن يطلب بشكل عام مستوى متوسط لجيد من الامان والاوبشن والاداء فهتكون عينه ع الياباني او الاسيوي.
غيرهم ممكن يفكر في القوة وظروف طريقه ويشتري جيب او دودج او فورد...الخ
غيرهم ممكن يشتري بناءا على الاعتبارات الجماليه لا اكثر وكل شخص حر.
وكلا حسب مطلبه ومبتغاه واللي هو شايف انه هيلبي احتياجاته الشخصيه ولولا اختلاف الاذواق لبارت السلع مش بالضروره تكون خناقه.

صراحه لو انا شخص مقتدر ماديا ولازلت عايش في مصر هفكر في الالماني والهاي لاين منه مش الفئات الاقل لكن غير كده معتقدش في مصر ان الموضوع يستحق الصرف.

بالاخير لسه بدري علينا لما نتغير ونعرف ازاي نشتري وننشر الحياديه والموضوعيه بعيدا عن العاطفه والتحيز الاعمى.

وفي النهايه احب اشكر الاسماء الاتيه على احترامهم وردودهم الانيقه والموضوعيه:
الاخ SYD كفيت ووفيت جهد مبذول كبير جدا في الموضوع والردود ايضا خير دليل وشاهد.
الاخ yasser100 ردودك عقلانيه متفهمه بعيده التعصب واتفق معك جملة وتفصيلا.
الاخ ahmed_m_ashraf جزاك الله خيرا قلت بعض مما اود قوله.
الاخ sala7 شكرا على اضحاكنا وانا متفق معاك في تعليقك بشكل عام عن عقلية الشعب المصري.

واعتذر عن الاطاله لكنها اول مشاركة لي بعد ما كنت متابع فقط للمنتدى.
والله يوفق جميع الحضور لما يحبه ويرضاه.
دمتم بود والسلام عليكم ورحمة الله.