الموضوع: سيات توليدو Vs تويوتا كورولا

المشاركة الأصلية كتبت بواسطة karim ibiza

كالعادة موضوع رائع ومجهود أروع
تسلم ايدك





طبعا المقارنة ظالمة للتوليدو
بس مش عشان الكورولا مكتسحة
لكن عشان التوليدو عربية اسبانى بمكونات ألمانى وأعلى فئة فيها سعرها أقل من الفئة الأولى فى الكورولا
وده مش دليل على تفوق جودة الكورولا سواء فى مواد تصنيع او تكنولوجيا او امكانيات ولكن لأن دى ثقافة شعب

لما أنا يبقى قدامى عربية ألمانى بكل التجهيزات دى وقدامى عربية يبانى بتجهيزات أمان أقل وسعرها أعلى يبقى بدون تفكير هختار الألمانى وبدون تحيز

لكن عشان ثقافة الشعب اللى دايما مش بيحس بالأطمئنان غير لما يشوف العربية اللى قدامه بقت منتشرة وواخدة سمعة كبيرة عشان مجرد الأسم يبقى الطبيعى ان الكورولا هى اللى تكتسح

بس الانتشار مش دليل على النجاح والتفوق لأن لو طبقنا المبدأ ده هنلاقى ان الفيرنا السيارة الأكثر مبيعا فى مصر ومع ذلك هى من أسوء العربيات اللى ممكن تقتنيها لأسباب كتير مش عايز أتطرق ليها

الكلام اللى انا هقوله ده ناتج عن تجارب شخصية(انا أسف انى بقوله داخل قسم تويوتا لكن الأمانة تحتم عليا انى أقوله):

انا كان معايا ابيزا 98 قعدت معايا سنة ونص وبعتها لظروف سفر ولغاية دلوقتى زعلان انى بعتها
ودلوقتى معايا كورولا 2013 يابانى أخر الشكل القديم من الزيرو ودلوقتى عامل بيها 30,000 كيلو فى 6 شهور وده مش عشان انا فضلتها على الألمانى ولكن عشان دى عربية الشغل اللى مستلمها من الشركة اللى شغال فيها
غصب عنى بقيت بقارن بين العربيتين رغم ان المفروض مفيش وجه مقارنة بسبب أختلاف الأجيال والتجهيزات والتكنولوجيا والفئة نفسها مختلفة ولكن للأسف حصلت بسبب حدوث بعض المواقف اللى فاجئتنى

المقارنة اللى انا هعملها دلوقتى هى بين الكورولا اليابانى موديل 2013 والابيزا الأسبانى موديل 1998

-عزل الصوت لصالح الأبيزا رغم أن المتعارف عليها أن العربيات الأوروبى وزنها ثقيل وده بيخلى احساسك أكبر بصوت أحتكاك الكاوتش بالأسفلت وصوت احتكاك الهواء بجسم العربية أعلى
-قوة التكييف لصالح الأبيزا رغم ان المتعارف عليه ان تكييف اليابانى ثلاجة وتكييف الأوروبى عموما مش حلو
-وضعية القيادة لصالح الأبيزا رغم ان الكورولا فيها امكانية تعديل وضع الكرسى بشكل رأسى وده مكانش موجود فى الابيزا ورغم كده قاعدة الكورولا مش مريحة زى الأبيزا
-مساحة الصالون لصالح الأبيزا سواء فى الأمام أو فى الخلف
-مش هتكلم عن الثبات ولا عن امكانيات الموتور لأن الأبيزا بتاعتى كانت متعدلة جنوط 16 وموتور 1.6 واحد كامة 101 حصان ومع ذلك اقدر اقول ان الابيزا كانت تطلع من الكورولا رغم ان الكورولا 2 كامة و vvti وزيرو و 122 حصان وجبت بيها 220 لكن عزم الابيزا كنت بحس بيه أكتر والكورولا بتموت بعد الـ 160 بسبب الفتيس الاوتوماتيك العقيم الـ 4 نقلات (طبعا الفتيس الجديد cvt أكيد هيكون افضل و الله أعلم)



-الخامات الداخلية لصالح الابيزا لأن البلاستيك داخل الكورولا كتير والجلد موجود فى جزء صغير من الطابلوه
-العمر الافتراضى لقطع الغيار الاستهلاكية أكيد لصالح الأوروبى رغم انى مش محتاج اقارن لكن انا مش هقول غير حاجة واحدة بس: انى غيرت تيل الفابريكة وخرطت الطنابير فى الكورولا على 19,000 كيلو!!!!!!! انا بعترف انى بسوق بعنف شوية وبفرمل على سرعات عالية وده بيسرع عملية تأكل التيل لكن مش لدرجة انه يتغير على عدد الكيلوات ده علما بأن سواقتى للكورولا هى نفس سواقتى للأبيزا وغيرت التيل فيها مرة واحد لغاية ما بعتها (ورغم كده فرامل الكورولا مش الفرامل اللى تحسسك بالأطمئنان)

من ضمن المواقف اللى حصلت معايا ان من حوالى كام شهر أيام المطر الجامد كنت راكن العربية فى حتة منخفضة شوية عن المستوى الطبيعى للشارع, نازل تانى يوم الشغل لقيت المياه واصلة لغاية حرف العتب من فوق, بفتح العربية وكانت الصدمة انى لقيت حمام سباحة جوة الصالون والمياه بارتفاع حولى 5 سم لدرجة ان الحتة العالية اللى فى الارضية الخلفية للصالون مش باينة.... يعنى كمان مفيش عزل للمياه!!!!!

طبعا روحت للتوكيل عشان الضمان على أمل انهم يقولولى ان ده عيب صناعة ويعالجوا الموضوع لكن قالولى ان ده خارج الضمان واكتفوا انهم يرفعوها على الكوريك ويفكوا الطبات من تحت ويصفوا المياه وقالولى سيبها فى الشمس وافتح الابواب وهويها عشان متعفنش!!!!!! وجابوا كل السمكرية اللى فى التوكيل عشان يعرفوا المياه دخلت منين وبصوا على كاوتش الابواب والزجاج والقوايم لكن ملقوش حاجة











مشيت من عندهم ووقفت عند الورشة اللى تابعة لشغلى وفكيت الكونسول (طبعا كل حاجة بلاستيك بس من نوع جيد مش زى بتاع هيونداى) والكراسى وشيلت موكيت الأرضية باللباد بتاعه وسيبته فى الهواء لمدة يوم عشان ينشف ويتهوى, وكان أهم حاجة عندى انى اعرف المياه دخلت منين!!!! هل ده عيب فى عربيتى انا بس , ولا ده عيب تصميم فى الكورولا كلها؟؟؟!!! أكتشفت ان المياه دخلت من الباب الخلفى, طيب ليه؟؟!!! عشان كاوتش الابواب اللى ماسك فى جسم العربية حوالين حلق الباب مش متوصل ببعضه لمسافة طولها أكتر من 20 سم فوق العتب!!!! طيب ليه برده؟؟؟ عشان فيه الفبرة اللى بتحمى الدهان اللى على العتب الداخلى للصالون من احتكاك احذية الركاب اثناء عملية الدخول والخروج من العربية بتبات فى العتب من داخل الصالون وعشان تبات كان لازم يقطع الجزء ده من كاوتش الابواب عشان تبات على العتب!!!!! يعنى معنى كده ان ده فى الكورولات كلها ومش فى عربيتى انا بس(أترك لكم التعليق)

الكورولا كان زماااان لغاية موديل 2007 رغم فقر امكانيات الموتور الفتيس واللى محصلش فيه تطوير جذرى الى وقتنا هذا وده بشاهدة الملاك اللى ركبت الكورولا القديم والجديد

لما انا أوصل لمرحلة انى اقارن عربية سيدان يابانى موديل 2013 بعربية هاتش باك أسبانى موديل 98 وتتفوق عليها فى كتير من النقاط يبقى فعلا المقارنة دى ظالمة للتوليدو موديل 2014

يعنى ازاى حضرتك بتقارن 1998 با 2013 وكمان 1998 هيا الى بتكسب ازاى

الميه الى دخلت عندك عيب فردى علشان انا معايه ايكو وكان فيه سيول فى شرم الشيخ وعايز اقولك

ان الميه كانت بارتفاع نصف متر والحمد الله مشيت عادى ولا الهوا دخل جوا العربيه فا مينفعش تعمم

على كل تويوتا

وكده يبقا فيه مشكلا فى العزل اكيد ادام ميه دخلت العربيه

طول عمرى اسمع ان افضل اعتماديه لليابانى


تكيف ايه بس دا انا بشغلو على الدرجه التانيه بيبقا تلج

وشكرا على الموضوع بس الكورولا تكسب