السلام عليكم
مش عارفة ابتدى ازاى بس خلاص انا جبت اخرى والله ابتديت اكلم نفسى وكرهت اليوم اللى قلت اجيب عربية فيهدوخة وبهدله وفلوس وكله على الفاضى
كان حلم عمرى اجيب عربية فيورا وكنت مقتنعه بيها جدااااااا ولما جبتها كرهت نفسى وكرهتها

انا بصراحه اخطات لانى اشترتها غميضى لانها من واحد معرفه وقلت مش معقوله ح تكون الحاله كده
بس هى للامانه قعدت معايا اسبوع تقريبا كويسه وبعدين ابتدت الحوارات من بطارية وقفت وتغيير بوجيهات ماشى دى حاجات بسيطه بس وقفت البطاريه تانى بعدها بكام يوم ثم ابتدى المشوار من اول ما غيرت محطة البنزين
وعنها العربية بقت مش بتسحب على المطلع قالوا احتمال بنزين مخلوط وبعدها غيرى ديسك واسطوانه بعدهم معلقه الفتيس اتكسرت بعدها بوجيهات سن قصير وطقم كهرباء وسلك الكهرباء
فلتر بنزين ورداخ بنزين كهرباء
العجل شيع :018a1d~146: كمان كاوتشة الكوبلن متقطعه والشحم خرج منها
وطبعا الفاصل بين كل حاجه البطاريه تفصل واجرى ياواد اشحن البطارية
وللعلم البطارية جديدة وجبت لها بطارية تانية برده هو يوم واحد مش دورتها البطارية راحت
وكهربائى نصاب منه لله غيرلها المايه مع انها مش كملت شهر
اخرحاجه بقى كهربائى جديد قال محتاجه دينامو جديد استعمال
ملحوظه والله العظيم العربية كل ده جرى لها وهى واقفة مكانها لمدة شهر ونص يادوب خرجت
مشوار واحد خفيييييف جدا نقول نص ساعه

السؤال دلوقتى انا اعمل ايه اغير الدينامو فعلا ولا اروح لحد يشوف الكتاوت دى ويعمله صيانه
واشترى كبلن جديد ولا اغير الكاوتشة بس

وخصوصا ان العربية محتاجه شغل فى العفشة لانى اكتشفت بعد ما اشترتها ان الشاسيه مفتوح وملحوم بورده ده كلام الاساتذه الفنيين طبعا كل واحد منهم يقول لى معلش يا استاذه متزعليش منى ح اقولك ..... ويفحمنى باللى اكتشفه

اه يانى

ومعلش باعتذر على الاطاله وشاكره جدا لاى ردود