الموضوع: تقرير عن الامجراند بعد 14 الف كم

الحمد لله الشهر ده العربيه كملت معايا سنه و عامله حوالى 14500 كم .. و هقلكوا على انطباعى عنها سواء مميزات او عيوب و هبتدى بالمشاكل الى قابلتنى...

1- موضوع الصدأ موجود و طبعا حله تروح مركز الهياكل الى فقليوب و لسه ماروحتش
2-اول الف كم ترموستات الحرارة باظت و اتغيرت فالتوكيل و من ساعتها زى الفل
3-البطارية السائله كانت مبهدله الدنيا و غيرتها فالتوكيل بواحده جافه
4-من ساعه ماشتريتها و كنت فاكر ان التكييف ضعيف و فمرة كنا خمسه فالعربيه و كان يوم حر و شغلته كان ضعيف اوى و طلع هوا سخن وقفلته و فتحنا الشباك وطبعا كان شكلى وحش المهم روحت لبتاع تكيفات قالى السربنتينه عندك جايبه زيت و وريهالى لقيتها مطينه و مسدوده قالى دى لازم تتغير المهم روحت التوكيل قالولى لو انت السبب يعنى طوبه او حادثه هتتغير عالحسابك و طبعا كشفوا عليها لقوا عيب صناعه و غيروها و الحمد لله اكتشفت ان العربيه فيها تكييف و مكنتش اعرف و شغال كويس جدا و بيسقع تمام و مش بستحمله حتى فعز الحر .
5-التوكيل عليه ضغط جامد و العربيه فيها مشاكل كتير و مهندسين الاستقبال مش بيزيدوا عن 3 و ده من اهم عيوب العربيه من وجهه نظرى
6-السنسور الخلفى مش دقيق انا كنت مركب واحد فعربيتى النوبيرا كان احسن من ده
7-لمبه التشك انجن الى خانقه الناس كلها
8-زيت الباور زباله و غيرته بقى الباور تمام
9-الكاسيت التعبان و غيرته بواحد بايونيير و كذلك السماعات الخلفيه غيرتها بكينوود
10-الازاز الجانبى الامامى فيمته لان بيدخل اشعه الشمس بغباء و عزله ضعيف و كذلك الازاز الامامى

دول الى انا قابلتهم و مش ناقل مشاكل حد دى الى واجهتنى انا

المميزات:
طبعا الناس عارفاها لكن هقول الى حاجات الى عجبانى شخصيا

1-الصالون الواسع
2-التكييف الساقع ((طبعا بعد ما اصلح))
3-خاصيه smart drive
4-خاصيه follow me
5-خاصيه auto light
6-الاشارة 2 مستوى
7-مخرج الكهربا ال12 فولت
8-مكان تخزين للنظارة
9-الجنوط ال15 و الكاوتش العريض
10-الشكمان مش ظاهر
11-فتح الشنطه من الداخل
12-ظهر الكنبيه بيتفتح
13-الشنطه الواسعه
14-سحبها كويس بعد 3 ار بى ام
15-تحكم بعدسات الانوار الامامية

فى اخر التقرير عاوز اقول العربيه فيها عيوب و مش صغيره لكن برضه فيها مميزات كبيرة و السعر هو الى مخليها منتشرة و انا الحمد لله راضى عنها لان كل العيوب عيب صناعه و بتتعمل فالتوكيل و مش بتكرر و اتمنى مايظهرش حاجه تانى .. يارب التقرير يكون عجبكوا