تجربتى فى تركيب كبالن كليو استيراد للناس اللى بتحب تشتغل بايدها
السلام عليكم ورحمة الله وبركاته
تحذير ......(الطريقة دى للرينو كليو 1200 بس)
الادوات المطلوبة ..
لقمة 30مم - لقمة 18 مم - لقمة 13 مم - مفتاح بلدى 18 مم مشرشر بناحية
وصلة لقمة حرف L ب 25 ج – وصلة لقمة كبيرة 15 ج – وصلة صغيرة 10 ج
وردة نحاس جديدة لطبة الزيت - مفتاح طبة الزيت مربع مقاس 8مم - مفتاح عجل (صليبة)
جاك رفع لتحميل العربية عليه بعد الرفع لسلامتك ان امكن – عدد 2 كوريك
قمع بلاستيك - 1 متر خرطوم حنفية عادى - قفاز مطاطى تقيل حوالى 7 ج
نبدء بسم الله
يفضل ان تكون العربية باردة
الكوبلن اليمين (Passenger Side)
قبل ما ترفع العربية
هوى مسامير العجلة
هوى صامولة الكوبلن لقمة 30 مم
ارفع العربية
فك العجلة
فك المساعد من الشمعدان
(2 مسمار بصامولة مقاس 18 مم وده بالنسبة للكليو )
فك صامولة الصرة
حرر الكوبلن من الصرة
اسحب الكوبلن هتلاقيه خرج من مكانه
والتركيب عكس الفك وده كان الكوبلن اليمين وهو اسهل من الكوبلن الشمال
الكوبلن الشمال (Driver side)
هتجيب جركن فاضى
ارفع العربية
فك طبة زيت الفتيس
افتح طبة الملئ (اللى فوق) علشان الزيت ينزل بسرعة
فضى الزيت فى الجركن وسيبه يتصفى
ركب الوردة النحاس الجديدة فى الطبة
اربط الطبة مكانها لحد ما الوردة الجديدة تطبع من غير ما تفوت الطبة فى السن
وكدة انت جاهز تحط الزيت بعد ما تخلص
نزل العربية (علشان تعرف تفك المسامير بتاعة العجل براحتك من غير ما العربية تقع )
هوى مسامير العجلة
هوى صامولة الكوبلن 30 مم
ارفع العربية تانى
فك العجلة
فك صامولة الصرة
فك عدد 3 مسمار مقاس 13 (ماسكين قفيز تثبيت كاوتشة الكوبلن فى الفتيس)
حرر الكوبلن من الصرة
اسحب الكوبلن
ركب الجديد
بس خلى بالك
وانت بتركب الكاوتشة بتاعة الكوبلن الشمال بالذات
هتلاقى المقص نازل لتحت غير طبيعته (لان المساعد مفكوك )
فمش هتعر تركب كاوتشة الكوبلن اللى ناحية الفتيس
مش هتلاقيها مريحة فى مكانها فى الفتيس ..
هتلاقيها بيضاوية فى الوضع ده ومريحة من حتة (من تحت)
ومش طايلة من فوق لانها مشدودة مع الكوبلن لتحت مع نزلة المقص
هتجيب كوريك تانى وترفع المقص من عند بيضة المقص
هتلاقى الكوبلن اتعدل معاك على طول والكاوتشة ريحت وطبعت بصورة دائرية منتظمة
تقوم مركب القفيز الحديد على الكاوتشة
شبط المسامير وجمع المسامير بالتوالى
(اربط رقم 1 شوية وسيبه وشبط رقم 2 واربطه شوية مش للاخر وسيبه ثم رقم 3 شبطه واربط تجميع بس من غير تقريط وهكذا علشان الكاوتشة ما تكلكعش من حتة لو ربط كل مسمار لاخره مرة واحدة وطبعاً الكاوتشة دى هى اللى بتحافظ على زيت الفتيس)
وهتلاقيه ان شاء الله حاكم كويس بس احذر اثناء الربط وبلاش تتعافى علشان المسمار لو فوت هتبقى مشكلة
ركب صامولة الصرة وجمعها رباط مع الطمبورة من غير قرص لحد ما تنزل العربية
شبط المساعد وربط عفشتك كويس قوى
ركب العجلة
شبط مسامير العجل واربط لحد ما تجمع بس من غير قرص لحد ما تنزل العربية
نزل العربية
حرق على الصرة ومسامير العجل بالوصلة حرف L متركب فيها الوصلتين الكبيرة والصغيرة
علشان تديك العزم المطلوب
هات جركن الزيت
افتح الكبوت
ركب الخرطوم فى القمع البلاستيك
دخل طرف الخرطوم فى الفتيس
ضيف الزيت سنة سنة لحد ما الجركن يفضى
اقفل الطبة
ركب الطاسه والف مبروك
كان نفسى اكون صورت الخطوات دى بس للاسف مكنتش عامل حسابى انى هكتب الموضوع فى المنتدى
