و لسه فيه أمل

**OlaOsman** · 12-10-2008 12:58 AM

وسط كل اللخبطة اللي حاصلة في البلد و الكوارث و الإحباطات و كل عوامل تثبيط الهمم يبقى بصيص من نور أمل.. ناس عايزه مستقبلها يبقى احسن من حاضرها.. شباب و بنات بالمئات راحوا النهاردة محاضرة زدني الافتتاحية للموسم الجديد عشان يبقوا احسن.. عشان يحاولوا يعملوا حاجة بدل الاكتفاء بالشكوى و حط الإيدين على الخد و الحجة جاهزة.. حال البلد.

و على الناحية التانية فيه شباب زدني.. شباب و بنات طول 4 ساعات همه زمن أكتر من محاضرة افتتاحية النهاردة كانوا زي خلية نحل.. شغالين.. طالعين نازلين هدفهم الوقتي هو ان الناس دي تخرج من المكان ده مبسوطة و بتاخد خدمة بروفيشينال مجانية و هدفهم على المدى البعيد هو ان الناس دي تبقى أحسن.. ان كل واحد يبقى عارف هدفه و مخطط له كويس و ما يسمحش لأي إحباطات انها تهد أحلامه و تقف في طريق تحقيق طموحاته.. مش بس الشخصية.. طموحاته لناسه و أهله و أهل بلده و أمته.. الحلم الكبير.. نهصة أمة.

النهاردة لما شفت المنظر ده.. مئات من اللي جايين يبقوا حاجة في مقابل عشرات من الشباب و البنات اللي حاطين نفسهم في خدمة الناس دي، ساعتها حسيت بالأمل.. أيوه فيه أمل طول ما في زدني و اللي زيهم في البلد.. ان شاء الله فيه امل طول ما احنا عايشين و بنتنفس و عايزين نعمل حاجة

**Hassan Khalil** · 12-10-2008 01:02 AM

ما شاء الله
ربنا يتقبل من الجميع
و يبارك في كل شارك في هذا العمل ..
و يوفق كل شباب و بنات البلد لما فيه الخير ليهم .. و لبلدهم

**waled369** · 12-10-2008 01:03 AM

ربنا يكرم البلد دي مهما قرفنا من نظامها رجوعنا أولا و أخيرا ليها لازم يكون فيه أمل و زي ما فيه السئ أكيد فيه الجيد .
ربنا يبشرك يا علا على لمسة الأمل وسط كل هذه الاحباطات

**OlaOsman** · 12-10-2008 01:08 AM

حسن و وليد.. الحمد لله رب العالمين.. الدنيا مش ضلمة اوي زي ما الواحد متخيلها :)

الحمد لله ان ربنا اختارني عشان اكون ضمن فريق زدني.. ساعات باحس ان ياااااااااه.. هو انا ممكن اكون استاهل اني أبقى واحدة من الناس دي؟ بالرغم من إني بقالي معاهم 5 سنين، انما ساعات بابقى مش مصدقة نفسي.. زي النهاردة كده :)

الحمد لله على نعمته.. الحمد لله عدد خلقه و رضا نفسه و زنة عرشه و مداد كلماته.

**waled369** · 12-10-2008 01:20 AM

المشاركة الأصلية كتبت بواسطة OlaOsman

حسن و وليد.. الحمد لله رب العالمين.. الدنيا مش ضلمة اوي زي ما الواحد متخيلها :)

الحمد لله ان ربنا اختارني عشان اكون ضمن فريق زدني.. ساعات باحس ان ياااااااااه.. هو انا ممكن اكون استاهل اني أبقى واحدة من الناس دي؟ بالرغم من إني بقالي معاهم 5 سنين، انما ساعات بابقى مش مصدقة نفسي.. زي النهاردة كده :)

الحمد لله على نعمته.. الحمد لله عدد خلقه و رضا نفسه و زنة عرشه و مداد كلماته.

للأسف يا علا أنا شايفها اغمق مما تتخيلي ربنا يفكها من عنده بجد أنا زهقت من السفر و والله العظيم نفسي آخد قرار رجوع مش قادر كل الاخبار اللي بتوصنا عن مصر تغم النفس .

**OlaOsman** · 12-10-2008 01:27 AM

المشاركة الأصلية كتبت بواسطة waled369

للأسف يا علا أنا شايفها اغمق مما تتخيلي ربنا يفكها من عنده بجد أنا زهقت من السفر و والله العظيم نفسي آخد قرار رجوع مش قادر كل الاخبار اللي بتوصنا عن مصر تغم النفس .

مش مختلفين إن الأوضاع في البلد تسد نفس أجدعها متفائل.. بس على الأقل اهو فيه ناس في البلد بتعمل حاجة.. يمكن ماتجيبش نتيجة مؤثرة دلوقتي خالص.. انما اهو برضه أحسن من التباكي على حال البلد من غير ما نعمل حاجة.

اما عن السفر و قرار الرجوع فده يمكن يكون أصعب قرار ممكن ياخده مغترب في حياته و الاستمرار برضه في الغربة مش سهل.. مع اني عمري ما اتغربت و لا عتبت برة مصر، انما مش عارفة ليه حاسة بالناس اللي متغربة فعلا اللي بتفكر في الرجوع و لاقية الأوضاع أصعب مم يحتملوا. الله يعين كل مغترب على غربته.. سواء اللي مغترب بره مصر.. أو جواها.

**Dr.A.Nabil** · 12-10-2008 02:12 AM

معلش
بس هو فريق زدني ده بيعمل ايه عشان انا معرفش نشاطه

اعذريني لجهلي بس انا حسيت انه عمل تطوعي فحبيت اعرف اكتر عنهم

**OlaOsman** · 12-10-2008 09:47 PM

المشاركة الأصلية كتبت بواسطة ahmodium

معلش
بس هو فريق زدني ده بيعمل ايه عشان انا معرفش نشاطه

اعذريني لجهلي بس انا حسيت انه عمل تطوعي فحبيت اعرف اكتر عنهم

لا يا دكتور العفو، ده مش جهل و لا حاجة، انا اللي افترضت ان الناس كلها عارفة زدني بالسليقة كده :D

شوف يا سيدي، ده الموقع الرسمي لزدني www.zedny.org

لو عندك أي استفسار انا في الخدمة :)