شفت بالله عليك بنات آخر زمن..عمار يا مصر
السلام عليكم يا أحلى منتدى..
مش هاطول عليكم علشان ما تزهقوش بس حبيت اقول قصتي باختصار مع الحب والارتباط ...يمكن الناس تتعظ
أنا مهندس بترول خريج هندسه بترول 2004 وبشتغل في مجال الحفر والتنقيب (شهر في الموقع وشهر أجازه)ولله الحمد من قبل ومن بعد كنت طول عمري بعيد عن موضوع الصداقات مع البنات .أولا بحكم الدراسه والشغل (طبعا ما فيش بنات) ثانيا نوع من الالتزام الاجتماعي والديني (أنا متدين عادي جدا زيي زي اي مصري بصلي وأصوم ...الخ)من سنه قررت الارتباط وكان طبعا لازم يكون جواز صالونات لأني ما أعرفش حد وكانت كل شروطي هي
1-تكون بنت مسلمه ومؤدبه وطيبه ومن عيله محترمه ومترابطه .............تمام مفيش مشكله دي الناحيه الادبيه والدينيه
2-تكون طويله ورفيعه وجميلة .................ده من الناحيه الجنسيه....لاني طويل 186 سم وبحب البنت الرفيعه ....أعتقد برضه مش عيب ولا غلط
المهم واحد من الاصدقاء عرفني على زميلته في الشغل دكتوره صيدلانيه وحصل الحمد لله القبول ثم الخطوبه ثم بدأ التقارب والتعارف يزداد
المهم بعد 10 شهور خطوبه (طبعا نصهم كنت بره مصر).....اكتشفت هي انها عاوزه واحد يقعد جنبها ....(مش عيب ولا غلط ) بس وكمان عاوزاه بياخد قد كده على قلبه ....وكمان عاوزاه قاعد 24 ساعه بيحب فيها .....وأخيرا
طلبت مني ان اقبل انها تستمر في الشغل وكمان الدراسات العليا وكمان العمل الخيري التطوعي ...بحجة انه طالما انا مش عاوز اشوف شغل في مصر (قال يعني الشغل بالهبل والمرتبات بالعبيط!!!!) وهي بتستحمل بعدي عنها شهر كامل ...أنا كمان في شهر أجازتي لازم أستحمل بعدها عني!!!(عاوزه تشتغل من 7 الصبح ل 7 بليل والجمعه أجازه ...واديني 2 كيلو بلح زغلول)
بالله عليكم ده اسمه كلام....
وصل الدلع والاستهتار بالبنات لدرجة انهم عاوزين يتساوي بالرجاله؟؟انا مش ضد عمل المرأه بس أنا ضد نظرية الند بالند والعين بالعين
يعني انا قلتلها لو الموضوع موضوع فلوس انا هاديلك 3 اضعاف مرتبك واقعدي في البيت
أنا بدور على السكينه والراحه النفسيه والجنسيه بالجواز ..أنا ما بدورش على مركز اجتماعي او فلوس ...الحمد لله الاتنين متوفرين عندي وعند اسرتي....سبحان الله
وبرضه مش عاجب...فعلا لا حول ولا قوة إلا بالله
المهم اني وبعد محاولات عديده لاقناعها ان الرجال قوامون على النساء ..مش لاني راجل ...ده بحكم الفطره والتكوين البشري ...وبرضه القوامه دي تكون بالحب والتفاهم والعشره الطيبه ...مش أوامر ...إحنا مش في الجيش
وبرضه ما فيش فايده
وقررت أخيرا أنا وهي الانفصال
وقد كان ....وسبحان الله ارتحت جدا جدا ...بس صعبان عليا كل البنات الي كده والي بيعملوا في نفسهم كده ....فعلا بقه قليل جدا جدا الشباب المحترم والقادر على تكاليف الجواز ...دي فعلا حقيقه
أنا عارف ان ان شاء الله هي أكيد لها قدر من الله مع غيري وأنا ليا قدر من الله مع غيرها في ميعاد معين لا يعلمه إلا الله
بس أنا حبيت أكتب قصتي لكل بنت بتفكر او قررت انها تضيع منها شخص بيحبها علشان الشغل والطموح ..وبقولها فكري الف مره قبل القرار ده...العمر بيجري ...والفراخ البيضه المتهرمنه بوظت الدنيا
والله المستعان