معاناتى لتغيير دنجل البيتلز مو 70
رجالة البيتلز هم اللى هيقدروا حجم المعاناه لتغيير دنجل العربية نبتدى من الاول
البداية كانت انى كنت بلاحظ ان العجلة اللى قدام يمين مايلة من فوق ناحية جوة وده كان بيسبب انى لما بلف الدركسيون على الاخر كانت العجلة بتحف فى الدنجل من فوق وكمان كانت لفة الدركسيون ضيقة جدا المهم رحت ضبط زوايا عند واحد عادى مش كمبيوتر قالى ياباشا العربية قديمة وعمر ما الزوايا بتاعتها هتطلع مظبوطة
كبرت دماغى وقلت العربية ماشية لكن المشلكة بدأت تزيد وبذات مع الحمولة ولفة الدركسيون قلت زيادة وكمات الدركسيون بقى تقيل اوى رحت اضبط زوايا عند واحد كمبيوتر بعد ماغيرت بيض المقص فوق وتحت وبيض الدركسيون ومساعدين ومساعد غربلة وعلبة دركسيون قالى لا يباشا الدنجل معووج زيادة وماخر من ناحية اليمين 2 سم وطالع لفوق 1.5 سم
رحت لمحفوظ بتاع عزبة شلبى قالى المقص هو اللى فيه مشكلة لان العجلة لما تشدها من فوق كانت بتلب طيب ياسيدى هات مقص دخل دور ملقاش
بعد ما بقى استعمال العربية مقرف جدا قررت اخذ خطوة جريئة فى الموضوع ده
رحت للميكانيكى قالى لا هنجيب دنجل استيراد ياعم طيب بص على الدنجل اللى راكب قالى لا هو بايظ ولازم تجيب واحد استيراد قلت ماشى
رحت يوم السبت اللى فات فك الدنجل وماادراك مافك الدنجل اصعب من تنزيل الماتور
المهم فكه قالى روح عزبة الصعايدة خلف حديقة بدر وهات واحد
رحت حديقة بدر عند واحد وصفهولى الميكانيكى كام ياعم الدنجل النضيف قالى هو بـ 1000 جنيه وعلشان خاطرك بـ 950 جنيه على ضمانتك قالى لو فيه حاجة بتاعى رحت واخده وطالع على الميكانيكى ركب وطلعت اجرب العربية بتحدف يمين جامد وعلى لف الدركسيون بتحف فى البودى بتاع العربية رحت لبتاع الزوايا قالى الدنجل ده ترميه فى اقرب صفيحة زبالة
كلمت بتاغ قطع الغيار قالى لاياباشا انا مديك دنجل نضيف المشكلة من الرقبة قلتله ازاى ده قياساتة عند بتاع الزوايا بايظة اكثر من الدنجل القديم قالى ماشى تعالى خد واحد تانى كانت الساعة دخلت فى 8 بالليل يعنى اليوم طار على مافيش
المهم خد دنجل تانى ورحت للميكانيكى يوم الاثنين فك البايظ وركب الثانى وانا دماغى وجعانى ياترى هيطلع بايظ برده ولا ايه المهم او ماخلص رحت طالع على بتاع الزوايا الحمد لله طلع دنجل نضيف ومقاساته مظبوطة ولكن بعد رحلة عذاب يومين عند الميكانيكى مع ان الدنجل الاول اللى انا جبته كان شكله نضيف جدا تقول انه مشتغلش اكثر من 10 سنين اما اللى طلع سليم مصدى وشكله تعبان والمساعد بتاعه واخد خبطة وشكلة لايوحى بانه مظبوط
يا رجالة البيتلز بلاش تفتكروا ان العربية حديد صلب وتفتروا فى مطبات بلدنا الجميلة علشان مسالة الدنجل دى اسوء بكتير لما يكون فى اى حاجة تانية فى العربية