مواقف البيع و الشراء و بعض تعاملات الناس في ظروف اخري

سلام عليكم

الخلاني اكتب الموضوع ده اني لسه لابس من واحد حوار عسل ربنا لا يسامحه
المهم انا هقول علي شويه حاجات عدت عليا من ناس كتير في حاجات تعتبر صغيره
بعيدا عن حوارات النصب العلني انما اخلاق الناس اللي شافها علي مر السنين و معظمهما بيع و شراء



اشتريت مره تليفون من واحد في نايل موتورز من سنين و روحت قابلته و بصيت علي التليفون و لقيت حته مكسوره قالي ده الكسر في الكفر انا بطبيعتي مش بحب ادي خوانه علي حد
المهم اول حاجه بعد ما روحت اكتشفت ان الشاسيه نفسه فيه الكسر مش الكفر

تاني حاجه البطاريه منفوخه و جايبه اخرها لدرجه ان الكفر مش عايز يقفل كويس مش من الكسر

ثالث حاجه قالي انه ماتفتحش قبل كده و انا صدقته و بصيت علي المسامير بس مش بفهم جامد اوي في الموضوع ده و طلع انه اتفتح قبل كده

رابع حاجه اكتشفت ان فيه حته في الهاوسينج ملحومه من جوه

كلمته و قعد يطلع عيني في التليفون و يماطل و علي الاقل ابعتلي ثمن البطاريه و يعتبر انا دفعت ثمن البطاريه اساسا من كثر المكالمه و في الاخر بعتلي ثمن البطاريه بعد مهاترات كتير و طبعا ثمن يجيب بطاريه تعبانه و انا اصلا يعتبر خلصت ثمنها في المكالمه





ثانيا قريب اشتريت تاب من علي النت و اتفقت مع اللي هيشتري علي الثمن و كله تمام
روحت قابلته و جربته التاب و كله تمام
بعد ما روحت بثاني يوم مع تجربه التاب لحظت ان الشاشه بترعش نور خفيف و بتبان اكثر لما الاضائه بتقل ..روحت مكلمه و قولتله علي المشكله
عمل نفسه انه مش مصدق و قعد يقولي طيب ابعتلي فيديو و هو بيرعش
روحت بعتله فيديو ليه قعد برضوا يحور شويه و يقولي يمكن انت اللي بوظته مع اني كلمته تاني يوم علطول و يعتبر ما استخدمتش التاب
قعد يطلع عيني و يقولي انا بتعامل مع ربنا مش مع الناس و حوارات كتير
قولتله خد التاب و هات فلوسي ده عيب شاشه و مش هينفع معايا و هيبوظ ممكن مني قريب
قاللي انا ماعيش فلوس و جبت تليفون تاني
طيب بيعه انت و اديلك الفرق و اي كلام حمصي و اسلوبه بدء يبقي قليل الذوق و يقولي انا مش فاضي للكلام ده و انا في الشغل و نبره الصوت بقيت مش كويسه

قولت يتحرق بالفلوس و مش عايز منه حاجه و ما تصلتش بيه تاني و بعت التاب و خلصت منه مع اني زعلان اني ماقولتش العيب للي هيشتري علشان محل علشان ممكن مايشتروهوش من اساسه و ده طبعا غلط مني و انا عارف بس انا كنت متاكد ان محدش هيشتري مني و مارضتش علي الاقل ابيع لاشخاص عاديه قولت خليه محل معظمهم بياخدوا الحاجه برخص التراب اساسا بس برضوا مش مبرر ليا الصراحه :(




ثالث حاجه اتنين خبطوا العربيه و في نفس المكان
اول مره كانت العربيه اختي وخداها مني و هي طالعه علي مطب قريب من البيت واحد راح لابس في الاكصدام من ورا
كلمتني و روحتلها لقيت الاكصدام مخبوط جامد و الراجل عمل فيها محترم و قالي انا غلطان و خد نمرتي و انا برضوا ساكن هنا و هصلحهالك
قولتله انا هصلحه من نفسي و بعدين حاسبني علشان مش بضمن حد يصلحها كويس
صلحت العربيه و طلع عيني علشان الاقي حديد الاكصدام طلع ادشدش و عملت شويه حاجات فيها صرفت حوالي 550 جنيه
و معايا فواتير بالحاجه

كلمت الراجل و رد قولت ده شكله بجد محترم و قالي خلاص اقابلك و اديك الفلوس
قابلته طلع ان حاطت في دماغه هما 100 جنيه و و هو كده عمل اللي يرضيه و يرضي ربنا و علشان يريح ضميره و خلاص
قعدت اهري معاه مافيش فايده
قولتله انا مش مسامحك في الفلوس و سبته و مشيت
اللي يضحك في الموضوع ان الناس فعلا من كتر نفسيتها الزباله لو تعرف لو كان محترم كان ممكن يلاقي تصرف افضل
والدي كان قايلي لو الراجل فعلا محترم و هيديك الفلوس ماتخدش منه حاجه
بس الناس بطبيعتها عامله نفسها ناصحه و بتفهم في الاصول





موقف تاني برضوا واحد وقف فجأه و لحقت نفسي بالعافيه و راح شيروكي لبست فيا من ورا
طبعا نزلت لقيت نفس الخبطه اللي فاتت قعدت اتخانق مع الشخص الزباله اللي وقف فجأه
و هو بارد و يقول اي حجج في اي كلام و هو غلطان مليون في الميه و طبعا ماطلعتش منه بجنيه بعد هري ساعات و احتسبتها عند ربنا ثمن التصليح




اخر موقف واطي لسه طازه
كنت عارض تاب تاني للبيع و قابلت و احد جاري صدفه و كان معايا التاب
شاف التاب و عجبه و جربه و قالي ده خلاص بتاعي و حطه في جيبه
انا بطبيعتي مش بحب اسيب حاجتي مع حد مش صاحبي بس لقيت الواد واثق اوي من نفسه و قالي هجبلك الفلوس
و ده غلطتي اني وثقت فيه
المهم كلمته تاني يوم فين يا عم الفلوس اصل و فصل و حوارات
كلمته تاني و قولتله لو مش هتاخده في واحد هيشتريه مني و انا مستعجل قالي يا عم ده خلاص بتاعي عيب عليك
بعديها بيوم لقيته بيكلمني يقولي الشريحه مش عايزه تشتغل قولتله ازاي يعني انا مديهولك سليم وشغلته قدامك كمان
عديت عليه و طلع عيل تافه و زباله من بتوع بابي و مامي بوظ السوكت بتاع الشريحه لأنه بيركب عليه شريحه مقصوصه و بتتني البنه بتاعته و بيركبه كمان غلط و يحشر فيه
قعد يحور شويه و يقولي مش عارف ايه و يوريني ازاي يركب الشريحه اساسا بيدخلها غلط
قالي مش عايز التاب و بابا بيقولي ماتشتريش مستعمل
كنت هقوله الصراحه كلمه ابيحه بس مسكت نفسي
فعلا عيل و بتاع بابي و مامي و انا غلطان اني سبت حاجتي معاه
و قالي هصلحولك ..بعد ما روحت كلمته قولتله انا ماليش في الافلام ديه هات ثمنه ذي ماتفقنا و خده انت بقي صلح واعمل فيه اللي انت عايزه
طبعا كبر دماغه و مش هيجيب حاجه و استعوضت ربنا في ثمن تصليحه و ثمن التاب


فيه مواقف كتير جدا طبعا غير ديه بس ديه اكثر المواقف استفزازا بالنسبالي علي ما افتكر بس للامانه في مواقف من ناس عمري ماتعملت معاه و كانت في قمه الذوق معايا

و الموقفين من ناس هنا في المنتدي

اشتريت تليفون من واحد هنا و شوفته و كله تمام و قالي فيه حاجه في الشاشه بتظهر و ان ده بس سوفت وير ..قولت مافيش مشاكل و انزله انا بنفسي
بعد ما اشتريته و وروحت و جربت التليفون و حاولت انزل السوفت وير معرفتش
روحت لمحل يقولي ده عيب شاشه و هيحتاج تغير
قولت اشوف محل تاني و ثالث علشان اتاكد
برضوا قالوا نفس الكلام و ان الموديل ده في عيب صناعه اساسا و الشاشه بتبوظ
كلمته اللي اشتريت منه التليفون بصراحه كان ذوق و ما قعدش يحور عليا ذي بقيه الناس اللي فاتت
قالي مافيش مشاكل نتقابل و هات التليفون و خد فلوسك
وفعلا قابلته و مشكورا منه ماتعبنيش في مهاترات كتير و حوارات فاضيه و اخد التليفون و اخدت ثمنه و ربنا يجازيه خير



برضوا في موقف تاني من شخص محترم في نايل موتورز
كان عارض 5 كاوتشات بالجنوط الحديد للبيع و كان ساكن قريب مني و انا كنت هاخد الكاوتش بس
كلمته و اتفقت معاه وقابلته و اعتذرلي انه مش فاضي حاليا ووراه مشوار و اني اخد الكاوتشات بالجنوط اروح علشان افك الجنط منه و اخد الكاوتش بس
و مارضيش ياخد مني جنيه لحد ما اروح افكهم ولا عمره شافني قبل كده ولا يعرفني حتا من الموقع
انا بصراحه كنت عايزه يجي معايا لاني كنت مستغرب من ذوقه و ثقته الزياده فيا
قالي انا مستامنك عليهم و مافيش مشاكل
وفعلا روحت فكيتهم لحد ما خلص مشواره و رجعت اديتله الفلوس و الجنوط
ربنا يجازيه خير علي ذوقه و احترامه الزياده





من تجارب كتير اقدر اقول بصراحه معظم الناس زباله و ناس قليله جدا لما بتكعبل فيهم محترمين في الدنيا ديه
انا لو هكتب قصص عن الناس الزباله مش هكفيني عشر مواضيع
معلش طولت جامد عليكوا
وياريت اللي عندوا اي مواقف ياريت يشاركنا بيها

هو مافيش غيري اللي مر بمواقف مع ناس زباله ولا ايه!!!!
باين كده ان الناس كلها محترمه و انا اللي مش واخد بالي

انا مش حاضر فى بالى موقف دلوقتى بس اغلب الى بتحكى فيه حصلى بس موضوع البيع والشراء مش بامن فيه لاخويا حتى انسى

لكن مواقف العربيات والحوادث فعلا الناس بقت عندها سنتحه رهيبه وعايزين الحرق وبقيت بدب فى اى حد يمثل ومره وصلت معايا لخناقه كبيره وعورت واحد جامد فى صلاح سالم وبهدلته لانه قل ادبه وفاكر نفسه دكر بس طلع نعجه للاسف


الناس للاسف مش عايزه معامله حسنه دلوقتى كله ياخد على دماغه يمشى عدل الا طبعا الناس الذوق القله الى انت قولت عليهم دول ليهم معامله خاصه

اكيد كل واحد عدي عليه اكثر من موقف مش بس بيع و شراء لكن تعاملات اخري. اول موقف اتذكره و انا طفله في اعدادي تقريبا كنت باتبادل القصص مع زميلة في المدرسة و مرة رجعتلي القصة لكن فيها كتابة بالرصاص. زعلت جدا و اتكسفت اقولها لكن قررت اوقف التبادل معها لكن مخاصمتهاش.حسيت ان دي خيانة للامانة. المشكلة ان الناس بتحافظ علي حاجتها و مهملة في حاجة غيرها. لو دخلت مطعم او اي مكان عام ، شوف الناس بتهدر في كل حاجة ازاي. مرة في صيدلية لقيت العمال مشغلين التكييف في الخريف يعني الجو برد شوية و صاحب الصيدلية غير متواجد. لية يا جماعة؟ اصلنا لسه ماسحين الارض و عايزينها تنشف!!!!! طب علي الاقل فيه مروحة .هو انت في بيتك بتعمل كده؟ و فيه مكتب في العمارة اللي امامنا دائما الانوار منورة طول الليل. صاحب المكتب اكيد بيمشي بدري او بيديره من بعيد .يعني الموظفين مش هاممهم يطفوا النور. لو بيتهم كانوا هيتمموا كويس علي كل حاجة.
الكارثة لو اجرت شقة لشخص او عائلة مصرية هتشوف الانانية و الاهمال و هيقصفوعمر الشقة. حاجة تغيظ كانهم قاصدين.طبعا لو اجانب الامر هيختلف تماما.
عربيتي اتخبطت وهي واقفه (لينك الموضوع بعد التوقيع) .الشخص اللي خبطها عرض يصلحها بس كان فاكر انها هتتكلف 300 او 400 جنيه . لكن في الحقيقة اتكلفت حوالي1700 للدنجل بالتركيب. السمكرة منفعتش علي البارد فاتكلفت بالرش 1600 جنيه و مرضيش ابدا يزود علي 500 جنيه و لم نتناقش معه كثيرا لان مفيش فايده لكن مش عارفه اسامحه لسبب واحد انه صلح عربيته الاول مش عشان مدفعش . المشكله انه مش حاسس باللي اتسبب فيه مش مجرد خبطه لكن العربيه مبقتش فابريكه. اتغير فيها جزء مهم و اترشت. الامثله كتير لكن الخلاصة لو كل واحد وضع نصب عينيه جملتين الحال هيتصلح. اولا حب لاخيك ما تحب لنفسك او عامله بما تحب ان تعامل. و الثانية كما تدين تدان . الديان لا يموت

اكثر حاجه بتستفزني انها مش مشكله فلوس مع اللي قدامك قد ما هي نصاحه و قله ضمير
الشخص الزباله مثلا اللي اخد التاب و بوظه مسنواه المادي عالي و ابوه مستشار
و كان معاه عربيه جايبها بحوالي 180 الف كانت جديده و عمل بيها حادثه في حوالي شهرين و بقيت خرده
ومش فارق معاه الفلوس
بس وقت حق الناس بيبقوا مسعورين و بيحاولوا بأي طريقه انه مايدفعش ثمن غلطته حتا لو الحاجه بعشره جنيه مش فكره عشره جنيه بس وساخه في طبع الناس

انا كنت الاول بقعد انحر في نفسي مع الناس ديه بس دلوقتي مابقتش اتكلم كتير لأن مافيش فايده و مش هستفيد حاجه غير حرقه الدم
و بحتسبها عند ربنا و اقول لنفسي كأني بحوش للاخره حسنات تفيدني وقت الحساب
و عمري ما هسامح حد عمل اي موقف كان قاصد و مش عايز يدفع ثمن غلطته

البلد ديه والله ما هتقوملها قومه بسبب قذاره الناس

اقتباس:

---

المشاركة الأصلية كتبت بواسطة 3mr farrag

البلد ديه والله ما هتقوملها قومه بسبب قذاره الناس

---

جبت الخلاصه بالزبط وده رايى دايما فى البلد لان المشكله مش فى السياسه اد ماهى مشكله شعب

صدقنى موش كل الناس زى بعضهم يعنى فية كدة وكدة بس لسة الدنيا بخير وها اقول على شوية مواقف حصلت
انا هنا فى المنتدى كنت بافكر اعمل مغسلة سيارات واتصلت بعضو محترم هنا فى اسكندرية لقيتة هو متصل بى ورحب انى اتدرب عندة واكتسب خبرة واتعلم بلا اى مقابل ورحب بى بشدة
وبردة كنت بافكر فى موضوع مشروع ولقيت الاخ باسم جلجل فى المنتدى تواصل معى بعد ان تواصلت معة على الخاص لقيتة متصل بى وعرض خدمتة ونصحنى وافادنى بلا اى مصلحة
اخى كان معة سيارة وغير لها الفتيس مرتين وزهق وقرف جدا عند محاولة البيع اول زبون بعد ان عرف العيب لم يتصل او يعتذر تانى زبون شرحنا لة بردة العيب بالرغم انة كان ممكن يعدى ولكن شرحنا لعة عيب السيارة فقال غدا سوف ارد وكان مخلص فى سعرها و كان سعر كويس مع اخى جدا
الراجل دة كل مايشوفنى يقول لى انتوا ناس محترمين ربنا يباركلكم وطاير بالعربية وربنا كرمة بفتيس ممتاز
موش كل الناس زى بعض ياصديقى

انا هحكي عن موقف حصل معايا كنت ساعتها لسه في اول سنة ليا في الكليه -تقريبا- وكنت عايز اشتري حاجة ومكنش معايا فلوس فقررت ابيع راوتر زياده مرمي في البيت فرحت ابيعه لقيت راجل بدقن وشكله يقول انه محترم ومتدين فقلته لو عايز ابيعه يتباع بكام قالي انا ممكن اشتريه منك ب50 جنيه وحلفلي انه يوم ما هيبيعه هيبيعه ب70 بالعافيه وفعلا وافقت على عرضه واشتراه بعد ما روحت البيت وحكيت لوالدي زعل وقالي ارجع هاتو تاني وفعلا رجعت بس كانت المفاجئه ان الراجل عايز يبيعهولي ب100 جنيه ومش راضي ينزل جنيه من ساعاتها وانا معدتش بحك على الناس بالشكل وبحرص من اي حد
وفيه موقف تاني كنت عايز ابيع لاب توب واجيب حاجه احدث ورحت لمحل واتفق معايا على السعر وقالي هيبقي 500 لغاية ما يطمن ان اللاب مفيهوش مشكله وقالي اعدي تاني يوم اخدهم منو وفعلا رحتله تاني يوم عشان اخد باقي الفلوس لقيته بيقولي انه ملحقش يجربه واجيله بعدها بيوم ................................وفضل يماطل فيا كلم مره لغاية ما اتخنقت معاه واخدتهم منو والمشكلة الراجل دا كان وشه زبيبه صله وشكله متدين برده بس تقريبا معظم التجار مقرفين في التعامل مهما كانت اتجاهاتهم

افتكرت موقفين مالهمش برضوا لازمه

كان واحد عارض كاسيت عربيه للبيع في المنتدي و كلمته و اتفقت معاه علي السعر و قالي معاه ضمان لسه و السعر يعتبر مش رخيص و اعتبرت انه لسه جديد بضمانه
و كنت هجيبه لواحد قريبي و هو راح معايا ناخده منه
بعد ماروحتله وراني الكاسيت و كله تمام
فين يا عم الضمان ؟؟اصلي مالقتوش و دورت عليه و اي حوارات
ليه يعني ؟؟بيدور عليه ان شاء الله وهو نازلي
مايتكلم يقول مافيش ضمان من قبل ما ادب المشوار افرض اني مش هشتريه
المهم بعد شويه هري معاه اخدته اقل من ثمنه حاجه بسيطه و كنت شايف ان الموضوع مستفذ جدا و مش مجزي اوي




موقف تاني برضوا كنت بشتري جنوط معروضه علي النت
واتفقنا علي السعر بعد ما شوفت صور للجنوط و كله تمام
سألته علي ان اتصلح قبل كده ولا لأ قالي مافيهوش حاجه

اتفقت معاه اني هروحله متأخر لأني ورايا مشوار و انه ساكن بعيد جدا عني هو في التجمع الخامس و انا في اكتوبرو الدائري بيبقي زحمه لو في نص اليوم
وأكدت عليه ان هنروح لبتاع كاوتش يكشف عليه علشان مايكونش معوج و انه يكون فاتح متأخر
وقالي تمام و موجود بتاع كاوتش و هيبقي فاتح
بعد ما روحت المشوار المش ظريف وراني الجنوط و بيقولي انا لقيت جنط معوج و انا نازلك !!!!!!
ابويا بيقولي بص ده فيه جنط معوج!!!!!
انا كنت عايز اشتم الصراحه
قولتله ماكلمتنيش ليه تقولي بدل ما اجي المشاور ده
قعد يحور في اي كلام
قالي طيب هنزل في ثمنه و اني اصلحه و كان السعر بالنسبالي كويس علي الجنوط مع التصليح
قولتله تعالي طيب نبص علي بقيه الجنوط عند بتاع الكاوتش
قعد يدور من اساسه مافيش حد بتاع كاوتش لقيناه في التجمع
يادوب بنزينه و بتنفخ بس كاوتش و مش شغاله كمان

انا بصراحه كانت مرارتي اتفقعت و قولتله يوم تاني بقي نشوف القصه ديه
كلمته بعديها و قولتله انا مش هجيلك تاني
لو عايز تبيع تعالي انت بقي علشان ديه غلطتك من اول الجنط المعوج لحد ان مافيش محل كاوتش
نتقابل عند واحد بتاع استعدال كاوتش
قعد يقولي مش هينفع و بعيد عليا و اي كلام
كلمته بعديها و قولتله اي حجه و اني خلاص مش عايز اشتري و خلص الموضوع


شغل النت بصراحه في البيع و الشرا معظمه حوارات ذي الذفت

شكراً و الله لكل الاعضاء اللي شاركونا و افادونا في موضوع البيع و الشراء من النت

هو فعلاً موضوع الشراء بالذات محتاج تركيز و تكون عندك فكرة كويسة اوي في الحاجة اللي هتشتريها .
بصراحة انا في البيع و الشرا ده من سنين و فيه مواقف الواحد صعب ينساها أذكر منها

# كنت جايب تليفون سامسونج y5360 في يناير 2012 بـ1000 جنيه جديد من السراج مول المهم بعد 40 يوم كده حبيت أبيعه فعملت اعلان على النت
ناس كتير اتصلت بيا لكن السعر معجبنيش ، وبعدين غيرت رأيي لحد ماقولت أبيعه وخلاص علشان كنت محتاج فلوسه فرحت مكلم شخص اسمه هيثم فاراجل بصراحة ماستغلش الموقف اني رجعت له و لا حاجة و رحب و قابلته و راح مديني 800 جنيه زي ما اتفقنا و لا فاصل و لا حاجة الله يكرمه

# موقف كمان كان شخص عارض تليفون BB 8100 للبيع و هو كان من مصر القديمة فكان عارض الجهاز بسعر أقل بكتير جدا جدا من سعره لان كان فيه مشكلة في الماوس بتاع الجهاز و رحت قابلته عند محطة مترو الملك الصالح اداني الجهاز بكرتونته و وصلني كمان بعربيته و الحمد لله لسه فيه اتصال لحد النهارده ...الله يكرمه الدكتور بهاء فرج صاحب الفون

# كمان حاجة كنت عرض فون BB 8310 للبيع فاتصل بيا اكتر من شخص المهم اتفقت مع واحد قريب مني من الزقازيق ، رحت قابلته و قعدنا على القهوة و بصراحة كان ذوق أوي الراجل حتى أصر انه يحاسب على المشاريب ههههه
المهم خد الجهاز و خلاص....بعد يومين كلمني قال لي ان الجهاز مفيهوش BBM فقلت له ان ده مش عيب و لا حاجة لان البرنامج بينزل مجاني من على الAppworld فالراجل قعد يتصل بيه و انا احاول اقنعه المهم ماقتنعش فقال انه عاوز فلسوه فقلت له مش معايا دلوقتي قال لي انه مسافر فقلت له خلاص اصبر عليا شوية فمكلمنيش من ساعتها
و الله لحد النهارده انا مستني اعثر عليه علشان أقدر أراضيه

#كنت محتاج غرفة أطفال لحد ما لقيت طلبي موجود عند سيدة في الهرم حدائق الاهرام بالضبط فرحت واخد عربية و رايحين على الهرم لحد ما وصلنا لغاية البيت هناك...أول ما وصلنا هناك الست / أم محمد دي ، الله أكبر ، قمة في الذوق و الواجب ،و بعدين اخدنا واجبنا و حملنا العفش ولحد النهارده اي حد بشوفه يقول ده جديد ميصدقش انه مستعمل
هو فعلاً مش كل الناس وحشه فيه ناس ولاد حلال و كتير أوي

# حاجة لسه قريب هنا في نايل موتورز كنت عارض تابلت للبيع ففيه واحدة اتصلت بيا و قالت انها محتاجاه فقلت ماشي.
و بعدما قابلتها أخدت الجهاز من غير ما تقلب فيه و لا حاجة و أنا بقولها لو فيه أي حاجة ده بتاعي خلال كذا يوم
المهم تاني اتصلت بيا و لقيتها بتقول لي ان النت مش شغال على الشريحة
قلت لها ازاي ده كان شغال معايا ، المهم بقى قضيناها اتصالات علشان ننشوف المشكلة فين و لكن بصيت قيتها بتقولي خلاص انا مش عاوز التابلت
يعني ايه يا ستي ؟
قالت عاوز فلوسي
قلت لها و ماله
فرحت مكلم أخ فاضل هنا في نايل موتورز كان طلب مني التابلت فقلت له انه محجوز لو محصلش نصيب هاكلمك
و فعلا كلمته على انه يقابلها في رمسيس و الحمده لله ربنا يبارك له

فعلاً التعاملات على النت بقى حاجة وحشة أوي
فلازم كل واحد يخللي باله أوي زي ما بيقولوا كده يكون مدقدق أوي
و مايوقعك في الطيب الا ضميرك

لحد دالوقتي لم امر بمواقف سيئه في تجربه الشراء من الانترنت
اشتريت موبايل وجهاز كمبيوتر وسكوتر والثلاث تجارب كانوا ناجحين
بفكر طالما حظي كويس اني بقع في ناس محترمه كده اشوفلي عروسه من ع النت بالمره ههههههه

اصل احنا طيبيين هنا فى نايل موتورز
انا بثق جدا فى اى حد من المنتدى مع ان دا مش كويس بس اعمل ايه اصل انا هنا فى المنتدى من 7 سنين

فكرة الموضوع جميلة
بس بصراحة كل اللى حضرتك حكيته العيب منك انت فى ثقتك الزيادة فى الناس (مع ان انا زيك بالظبط و بعتبر كل الناس كويسة ) بس مع فرق بسيط .... اما مبشتريش حاجة مستعملة الا لو من حد قريبى او صديق مقرب غير كدة اشترى امكانيات اقل بس جديد ... حتى اما حبيت اجيب لمراتى عربية مرضتش اجيب مستعمل نهائى و جبتلها عربية صينى زيرو رغم علمى بمشاكل الصينى والحمد لله طلعت كويسة واصيلة

احمد ربنا ... انا كنت هتلسع فى شقة قبل كدة ثمنها 820 ألف جنيه كان فيها توكيلات فى النص منهم توكيل مزور مع انه كمبيوتر و مختوم ختم النسر و انا مكشفتش على التوكيلات ...... الشقة متسكنتش مع انها متشطبة من سنين المهم صاحب الشقة الأصلى افتكر ان ليه شقة امتى بقاااااااا.... بعد ماشتريت انا (انا شاريها من واحد شاريها من واحد بتوكيل رسمى موثق مزور ) المهم من هنا لهنا و حوارات طويلة وعشت فى رعب لحد مالموضوع اتساوى الحمد لله و سجلت الشقة وبعد كدة بعتها من اللى شفته و قفلت منها

اقتباس:

---

المشاركة الأصلية كتبت بواسطة ramymechanics

فكرة الموضوع جميلة
بس بصراحة كل اللى حضرتك حكيته العيب منك انت فى ثقتك الزيادة فى الناس (مع ان انا زيك بالظبط و بعتبر كل الناس كويسة ) بس مع فرق بسيط .... اما مبشتريش حاجة مستعملة الا لو من حد قريبى او صديق مقرب غير كدة اشترى امكانيات اقل بس جديد ... حتى اما حبيت اجيب لمراتى عربية مرضتش اجيب مستعمل نهائى و جبتلها عربية صينى زيرو رغم علمى بمشاكل الصينى والحمد لله طلعت كويسة واصيلة

احمد ربنا ... انا كنت هتلسع فى شقة قبل كدة ثمنها 820 ألف جنيه كان فيها توكيلات فى النص منهم توكيل مزور مع انه كمبيوتر و مختوم ختم النسر و انا مكشفتش على التوكيلات ...... الشقة متسكنتش مع انها متشطبة من سنين المهم صاحب الشقة الأصلى افتكر ان ليه شقة امتى بقاااااااا.... بعد ماشتريت انا (انا شاريها من واحد شاريها من واحد بتوكيل رسمى موثق مزور ) المهم من هنا لهنا و حوارات طويلة وعشت فى رعب لحد مالموضوع اتساوى الحمد لله و سجلت الشقة وبعد كدة بعتها من اللى شفته و قفلت منها

---

ينهار احوس الحمد لله ربنا كرمك وربنا ما يوقعناش في موقف زي كده

اقتباس:

---

المشاركة الأصلية كتبت بواسطة ramymechanics

فكرة الموضوع جميلة
بس بصراحة كل اللى حضرتك حكيته العيب منك انت فى ثقتك الزيادة فى الناس (مع ان انا زيك بالظبط و بعتبر كل الناس كويسة ) بس مع فرق بسيط .... اما مبشتريش حاجة مستعملة الا لو من حد قريبى او صديق مقرب غير كدة اشترى امكانيات اقل بس جديد ... حتى اما حبيت اجيب لمراتى عربية مرضتش اجيب مستعمل نهائى و جبتلها عربية صينى زيرو رغم علمى بمشاكل الصينى والحمد لله طلعت كويسة واصيلة

احمد ربنا ... انا كنت هتلسع فى شقة قبل كدة ثمنها 820 ألف جنيه كان فيها توكيلات فى النص منهم توكيل مزور مع انه كمبيوتر و مختوم ختم النسر و انا مكشفتش على التوكيلات ...... الشقة متسكنتش مع انها متشطبة من سنين المهم صاحب الشقة الأصلى افتكر ان ليه شقة امتى بقاااااااا.... بعد ماشتريت انا (انا شاريها من واحد شاريها من واحد بتوكيل رسمى موثق مزور ) المهم من هنا لهنا و حوارات طويلة وعشت فى رعب لحد مالموضوع اتساوى الحمد لله و سجلت الشقة وبعد كدة بعتها من اللى شفته و قفلت منها

---

فكرة المستعمل انه أقل بكتيير أوي من الجديد غير انك لما تحب تبيعه مش هتخسر فيه زي الجديد
و ده مفيد للناس اللي غاوية تغير على طول

اسفلو قلتلك ان العيب منك مش ف الناس بس . انتا مشاركهم العيب

انا زمان من صغرى لغاية لما غلصت كليه كنت بتكسف قوى ف خصوص الماديات دى

لكن لما فتحت صيدلية لقيت ان لابد ف التعاملات من جدية حتى ولو مع ابوك

والحمد لله الى الان ماشى كويس :)

__________________________

اللهم صلى وسلم وبارك على سيدنا محمد

الافضل بصراحه عدم شراء اى جهاز الكترونى مستعمل

لا تؤاخذنى .واضح إن فيه عندك مشكلة فى موضوع الحرص من الآخرين .حاول تعالجها