استشارة قانونية ـ عقد ابتدائي كمبوند
السلام عليكم،،
أنا حجزت شقة في كمبوند لسه جديد في القاهرة الجديدة، هما خلصوا أعمال البناء وعاينت الشقة ع الطبيعة، فاضلهم البنية الأساسية والتشطيب والواجهات واللاند سكيبينج، وبيقولوا الكمبوند هيخلص في 3 سنين والتقسيط على 48 شهرـ
المهم أنا في شقة عجبتني، عاينتها واديتهم مبلغ حجز صغير وخدت صورة من العقد معايا عشان أدرسه قبل ما نكتبه، وقالولي احنا مش بنغير حاجة في العقد، عشان كده في كام نقطة عايز أخد رأيكوا فيها عشان أعرف الكلام ده شائع ولا فيه حاجة غلط في العقد.
أولاّ، العقد بحق امتياز حتى سداد كامل الثامن، يعني من الآخر استلم الشقة لما أدفع الأقساط كلها
(هل الكلام ده متعارف عليه؟ أنا في كمبوند تاني قالي هسلمك لما تدفع 50% بس الكمبوند ده خلصان أصلاً ومتباع كله وساكن كمان)
ثانيًا، وده اللي أنا قلقان بسببه، في بند في العقد بيقول "لا يحق للطرف الثاني التصرف في الوحدة المبيعة إلا بعد سداد كامل الثمن .. وفي حالة رغبة الطرف الثاني في التنازل عن العقد للغير بعد سداد كامل الثمن يستحق للشركة مقابل عن التنازل 5% من إجمالي الثمن للغير.
أنا عايز أفهم الكلام ده معناه إني لما أخلص الأقساط لو عايز أبيع الشقة ياخدوا 5% من ثمن البيع؟ يا ريت حد يوضح لي البند ده.
ثالثاً، في بند التسليم مكتوب "يتم تسليم الوحدة المبيعة كاملة المباني مع نهاية آخر قسط بعد سداد كامل الثمن، ويتم التسليم النهائي لباقي أعمال المشروع بالكمبوند بعد عام من التسليم ما لم يكن التأخير خارجًا عن إرادة الشركة. وفي حالة تأخر الشركة في التسليم يحق للطرف الثاني استكمال أعمال التشطيب الداخلي للوحدة في الموعد المتفق ومتعاقد عليه.
سؤالي هو: مش المفروض تسليم مشروع الكمبوند ككل يبقى ليه معاد ثابت؟ ملوش دعوة بتسليم الوحدة؟ ازاي يكتبوا تسليم المشروع بعد عام من التسليم؟
رابعًا، في بند بيقول إن الطرف الثاني ملتزم بمصاريف ورسوم وأتعاب الدعاوى اللي تترفع بشأن العقد، ويضمن عدم الرجوع بشيء منها على الطرف الأول البائع.
يعني أي دعوى بشأن العقد حتى لو الشركة هي اللي رفعتها أنا اتكفل بمصاريفها؟
