زي النهاردة من 16 سنة ...الزلزال .. فاكرين ايه اللي حصل

**Hussein_Ramdan** · 13-10-2008 02:34 AM

دة كان يوم زاى الفل
اليوم دة كونت تقريبا اما فى تانية او تالتة ابتدائى والمهم وحنا اعدين فى الفصل والاستاذة بتشرح وطبعا كالعادة اعد مش فاهم حاجة لقيت الابلة بتصوت وبتقول اجرو وحنا كان حظنا اعدين فى اول دور طبعا انا خد البراية الى كونت لسة شاريها جديدة وقولت يافكيك وبعد ما قربت اوصل لغاية البيت نسيت ان اخويا فى المدرسة معايا واانو فى الفصل الى فوقى طبعا رجعت اشوفو راح لقيتو جاى بيجرى وبيقولى اجرى يلا جريت :)

**fiatto** · 13-10-2008 07:55 AM

كنت قاعد اتفرج على فيلم الرجال يفضلون الشقراوات بتاع مارلين مونرو على القناة التانية ووالدى كان بيصلى وحصل الزلزال وهو ساجد , لما خلصت الحدوتة قلت لنفسى طب لو كان ده يوم القيامة وكان حصل سجود ابوك كان هينفعه اما مارلين كانت هتنفعك بايه يا اهبل !! كان كلام عيال متخدوش فى بالكم

**Noha.M** · 13-10-2008 09:13 AM

المشاركة الأصلية كتبت بواسطة fiatto

كنت قاعد اتفرج على فيلم الرجال يفضلون الشقراوات بتاع مارلين مونرو على القناة التانية ووالدى كان بيصلى وحصل الزلزال وهو ساجد , لما خلصت الحدوتة قلت لنفسى طب لو كان ده يوم القيامة وكان حصل سجود ابوك كان هينفعه اما مارلين كانت هتنفعك بايه يا اهبل !! كان كلام عيال متخدوش فى بالكم

:::::DDDDD

**fiatto** · 13-10-2008 09:47 AM

المشاركة الأصلية كتبت بواسطة Noha.M

:::::DDDDD

ياريت الترجمة لو سمحتى !!

**Noha.M** · 13-10-2008 09:53 AM

المشاركة الأصلية كتبت بواسطة fiatto

ياريت الترجمة لو سمحتى !!

الترجمة : هأ هأ هأ

عجبتنى اوى الحتة بتاعة نفعتك بايه مارلين دى :D

**MoToRiZeR** · 13-10-2008 09:59 AM

انا فاكر اليوم ده كويس جداَ .. كان عندي خمس سنين تقريباَ و أعتقد إن مكنتش أعرف يعني إيه زلزال .. فا لقيت والدتي جاية و عمالة تقول "زلزااااال !! زلزاااااااال" فا لسبب ما انا سمعتها "تمسااااح .. تمسااح" .. تقريباَ عشان كان فيه فيلم أياميها بييجي عالقناة التانية إسمه التمساح القاتل و كان مأثر عليا .. المهم انا قلت يا خبر إسود !!! تمساااااح !!! و قعدت أبص تحت الكنب أدور علي أم التمساح .. ده تمساح إيه ده اللي هيهز العمارة كدة !! رحت لجدي كان قاعد بياكل (و كان في أواخر ايامه يعني) .. اقوله يا جدو تمساح يا جدو!!! .. قاللي روح قول لأمك تجيب الفاصوليا .. والدتي جابت أختي الصغيرة كان عندها سنة ساعتها و قعدتنا تحت ترابيزة و قعدت تقرأ قرأن .. حاولت تقوم جدي بس هوا كان مصمم يكمل الفاصوليا .. المهم الزلزال خلص و جدي ولاااااا حس بيه أصلاَ .. و قام من عالترابيزة قال "انا عايز أشرب شاي" .. بعد كدة بقي والدتي شرحتلي إيه اللي حصل .

**bassem.naguib** · 13-10-2008 10:13 AM

أنا بقى كنت في تانية معهد خدمة اجتماعية وراجع من تدريب عملي وماشي في الشارع جنب المبنى الأثري قصر الأمير طاز (مكنش لسه أتعرف ساعتها) وفجأة لاقيت نفسي دايخ جداً :K15:والأرض من تحتي زي العجينة رجل تطلع ورجل تنزل .. ومكنتش فاهم حاجة .. وشوية كان في قهوتين جنبي لاقيت الناس اللي قاعده فيهم بيجروا أنا اتخضييت في الأول وقلت أجري معاهم .. بس أجري ليه .. وعلشان أيه .. وهو فيه أيه .. في الأول افتكرت أن البيت بيقع وشوية ببص على قصر الأمير طاز .. والله العظيم لاقيت المبنى كله أكن حد بينفض سجادة ومطلع تراب جامد قوي .. قلت ده بيقع .. وبعدين فكرت شوية هي الدنيا كلها بتقع .. لحد ما أدركت أنه زلزال .. وطلعت جري على البيت أطمن على الناس اللي فيه .. بس كان يوم رعب .. لأن اللي في البيوت نزلوا وطمنو نفسهم .. وكذلك اللي سايق واللي في الشغل .. إنما اللي في الشارع يعمل أيه ويروح فين !!
ملحوظة :
قدره ربنا وبطشه حنروح منها فين .. سواء زلزال أو فيضان ... إلخ .. يا ريت نعمل لأخرتنا زي ما بنعمل لدنيتنا

**MoToRiZeR** · 13-10-2008 10:30 AM

المشاركة الأصلية كتبت بواسطة fiatto

فعلا يا موتورايزر الواحد وهو صغير كان بيسمع حاجات كتير بالمشقلب , بس انا ملاحظ حاجة ان اللى بيشترك مع الاطفال فى سماع الاشياء غلط هم الكبار غير المتعلمين وده بيتهيألى عشان معنهدمش ثروة لغوية من المفردات والمترادفات .
والبيه اللمبى دليل على كده

و الله يا أستاذ فياتو و المتعلمين حالياَ كمان .. انا ليا أصدقاء مبيعرفوش يكتبوا عربي صح و إسمهم خريجين جامعة و خلاص .. مرة واحدة زميلتي بتنقل مني جزء الدكتور قاله فا كاتبة " و الزيادات المقططة" .. فا بقولها إيه المقططة دي ؟! قالتلي مش عارفة هو إنت كاتبها كدة .. قلتلها انا كاتب المقننة .. طب بلاش .. يعني إيه مقططة ؟

:D يا عم و انا إشعرفني !

حالياَ فيه فقر جامد في المفردات و المترادفات سواء للمتعلمين و غير المتعلمين .

بالمناسبة انا كنت لسة بسمع november rain إمبارح في العربية أحييك علي ذوقك .

**fiatto** · 13-10-2008 10:43 AM

المشاركة الأصلية كتبت بواسطة MoToRiZeR

و الله يا أستاذ فياتو و المتعلمين حالياَ كمان .. انا ليا أصدقاء مبيعرفوش يكتبوا عربي صح و إسمهم خريجين جامعة و خلاص .. مرة واحدة زميلتي بتنقل مني جزء الدكتور قاله فا كاتبة " و الزيادات المقططة" .. فا بقولها إيه المقططة دي ؟! قالتلي مش عارفة هو إنت كاتبها كدة .. قلتلها انا كاتب المقننة .. طب بلاش .. يعني إيه مقططة ؟

:D يا عم و انا إشعرفني !حالياَ فيه فقر جامد في المفردات و المترادفات سواء للمتعلمين و غير المتعلمين .
بالمناسبة انا كنت لسة بسمع november rain إمبارح في العربية أحييك علي ذوقك .

شكرا ياموتورايزر انت اللى ذوق
بس زميلتك دى ضايعة خالص ! ونظلمها ليه مافيه كتير زيها على رأيك

-

الموضوع: زي النهاردة من 16 سنة ...الزلزال .. فاكرين ايه اللي حصل

LinkBack

أدوات الموضوع

عرض

-

-

-

-

-

-

-

المواضيع المتشابهه

إجابة السؤال الشائع: هم اللي في التحرير فاكرين نفسهم الأغلبية؟

إجابة السؤال الشائع (هم اللي في التحرير فاكرين نفسهم الأغلبية؟)

صوت غريب من العجل اللي قداام :( تاني مشكلة النهاردة !

الناس اللي كانت ف مقابلة النهاردة فين؟؟؟

خليكوا فاكرين ""لأهلي و النجم الساحلي "" و الفرافير هما اللي هيروحوا يشجعوا

الكلمات الدلالية لهذا الموضوع

المفضلات

المفضلات

ضوابط المشاركة