الموضوع: تغيير موتور طرمبة بنزين - اكسنت 2011 بالتفصيل الممل

بسم الله الرحمن الرحيم
سعيد جدا ان فيه ناس بدأت تتفاعل وتشتغل بأيدها
والنهارده هانغير موتور طرمبة البنزين بأيدينا
وكالمعتاد
اى شغل حضرتك هاتعمله – هاتعمله على مسئوليتك الشخصيه – انا غير مسئول نهائيا فى حالة وجود اى معلومه خاطئه فى الموضوع بتاعى
نبدء على بركة الله
الشغل فى عربيه نيو أكسنت موديل 2011 – ومتهيألى ان نفس موتور طرمبة البنزين هو المستخدم فى الالنترا والماتريكس وتقريبا اغلب عربيات هيونداى
الاعراض اللى خلتنى اغير موتور طلمبة البنزين – الموتور بيفصل – العربيه سحبها زى الزفت – اقصى سرعه 120 بالعافيه
سعر الشراء - 140 جنيه من البنا - التوفيقيه
يفضل قبل تغيير موتور الطلمبه ان العربيه متكونش متفوله – ويا ريت لو كان فيه 5 أو 6 لتر بنزين بالكتير
نبدأ بسم الله الرحمن الرحيم ونفصل كابل البطاريه السالب من العربيه
a (2)

بعد كده هانروح على شنطة العربيه زى الشاطرين – هانلاقى جواها حاجه كده لونها احمر أسمها الطفايه بتاعت الحريق – نخليها جنبنا لدواعى الامان
نشيل الكنبه الخلفيه هنلاقى المنظر ده
a (3)

بهدوءجدا هانشيل الجزء الاسود البلاستيك ده وفى الاغلب هاتلاقيه ملزوق بسيلكون – اول لما تشيله هاتلاقى المنظر ده
a (4)

هاتفك الجاكات بتعتك بهدوء ويفضل انك تصور قبل ما تعمل اى حاجه علشان لو نسيت يبقى عندك مرجع
هام جداااااااااااااااااااا واغلب الصنايعيه مش بتعمل كده
نظف كويس قبل ما تفك أى حاجه – أول لما تفك الخراطيم هاتلاقى شوية بنزين وقعوا على مكان الطرمبه – افضل وزع البنزين زى ما تكون بترش على الطلمبه وبعدها نظف تانى – كل ده وانت لسه مفكتش ولا مسمار
بهدوء فك المسامير – شيل الحلقه السوداء الكبيره اللى بتثبت الطرمبه على جسم التانك – حرك الطرمبه شمال ويمين لغاية لما تطلعها - وطلعها بالراحه علشان متبوظش العوامه بتاعت البنزين (اللى بتديك القراءه بتاعت التانك)
الطرمبه بقت فى ايدك وشكلها كده
a (5)

زى الشاطر بمفك عاده صغير هتفك الكلبسات اللى تحت زى اللى فى الصوره اللى تحت ديه عند الاسهم الحمراء – هاتلاقى جسم الموتور بقى باين تمسكه بأيدك وتسحبه بالراحه لتحت مسافه صغيره – هاتلاقى الفيشه بتاعت الكهرباء بانت عند السهم الازرق كده تفكها وتطلع الموتور
a (5-2)

دلوقتى يا بطل بقى فى ايدك الموتور القديم قارنه بالجديد وأتأكد انه تقريبا زيه فى الحجم وفيشة الكهرباء
a (6)

ركب الفلتر الجديد بتاعك على الموتور الجديد - وانقل الجزء البلاستيك الابيض الصغير والروده الكاوتش للموتور الجديد
a (7)

ركب القاعده البلاستيك اللى فكتها واتأكد ان الدنيا مظبوطه
a (9)

أرجع ركب كل حاجه تانى مكانها
مبروك عليك تسارع رائع – سرعه قصوى أعلى – هدوء نسبى فى صوت الموتور

وطبعا انتوا عارفين ان مفيش حاجه ببلاش فى الدنيا ديه
اذا كنت استفدت بأى حاجه من الشغل اللى انا عملته ده – أسألك الدعاء لوالدى بالرحمه ولوالدتى بالشفاء ---- طبعا عايز تفتكرنى انا وعيالى بأى حاجه اهو كله فى ميزان حساناتك

يا ريت يا رجاله اى حد يعمل حاجه فى عربيته يصورهلنا ويشرح هو عملها ازاى