تجربتي في اصلاح السيارة داخل الضمان (استرا كوزمو ٢٠١٣- ٢٤٠٠٠كم)
تجربتي في اصلاح السيارة داخل الضمان (استرا كوزمو ٢٠١٣- ٢٤٠٠٠كم)
من حوالي شهرين بدأت أحس بتنتيشة اثناء القرص على العربية سواء داخل المدينة او على الطرق السريعة و بتظهر بين عدد لفات ٣٥٠٠ ل ٥٠٠٠
توجهت لفرع جسر السويس و بعد الكشف على السيارة افادوا بأن العربية لايوجد بها عيب و لم يظهر اثناء التجربة.. اكدت عليهم لأني كنت مسافر الغردقة بعديها بيوم و مكنتش عايز اي موقف يحصل في السكة... المهم المهندس اداني رقمه علشان لو حصل حاجة اكلمه.
يوم السفر...طول السكة و خاصة اثناء تسقيط الغيارات او السير فوق ال١٤٠ العربية كانت بتنتش بشكل ملحوظ جدا لدرجة ان المدام اخدت بالها و سألتني...لحد ما في مرة سقطت من السادس للرابع و قمت لاقيت ٣ نتشات قويين جدا ورا بعض و فجأة ظهرت على الشاشة service ESP و عداد الrpm نزل على الزيرو و لمبة الESP نورت...
انا شوفت منظر عداد الrpm و هو في الارض و قلبي وقع في رجلي لان مش طلباها العربية تعطل في نص الطريق و الاجازة تبوظ...بس جيت ادوس بنزين لاقيتها بتستجيب و ماشية عادي جدا... المهم موقفتش خالص و قررت اكمل لحد ما اوصل الفندق و خليت المدام تعمل سيرش من على الموبايل على الرسالة اللي ظهرت و طلعت بتظهر لما بيكون فيه اي حاجة مش مظبوطة بتخص تغذية الموتور سواء كهرباء او بنزين او حساسات...الخ و لازم تتحط على سكانر علشان مصدر العيب يبان.
وصلنا الفندق و سيبت العربية لحد تاني يوم و دورتها اشتغلت كأن شيئا لم يكن و الرسالة مش موجودة و ال rpm شغال عادي...و في اثناء طريق الرجوع قررت احاول ماقرصش عليها و ماعديش ال ١٢٠... بس الكيف بيزل لأنها ممتعه في الجري و لبست ردار على ١٥٠... و طبعا النتشة كانت مستمرة في الظهور اثناء تسقيط الغيار بس الرسالة مظهرتش لأني مكنتش بطول في النقلة.
بعدها بكام يوم قرب البيت و السرعة لم تزيد عن ٦٠ قرصت تاني عليها قامت الرسالة طلعالي ...قلت مابدهاش بقى و حجزت معاد في فرع الصحراوي يوم السبت اللي فات.
رحت و استقبلني المهندس المحترم جدا جورج ... و قاللي ان ممكن العيب يكون بنزين او بوجيهات او موبينه و لازم نكشف عليها علشان نعرف السبب و احتمال العربية تبات و طلبت بالمرة صيانة ال٢٥٠٠٠ و كشف على رعشة الفرامل.
على الساعة ٤:٢٠ كده كلمني المهندس جورج و قاللي خلصتا الصيانة و لاقينا جوان حساس الكرنك مسرب زيت فبيخللي الحساس يهيس و غيرنا الحساس في الضمان... ادفع الفاتورة بتاعة الصيانة عقبال ما نخرج العربية و تستلمها.. مفيش خمس دقائق تاني لاقيته بيقوللي في حاجة لسه ظاهرة على الكومبيوتر و مش عايزة تروح حتى بعد تركيب الحساس... فالعربية لازم تبات علشان تتجرب صح..
طبعا علشان انا جاي من مسافة بعيدة و مش عامل حسابي اني ارجع من غير العربية ...قام المهندس جورج ظبطني اني ارجع في باص الموظفين لقرب سكني...
بعدها بيومين كلمني قاللي احنا فكينا العربية ١٠٠ حتة و فليناها علشان نعرف العيب جاي منين و لاقينا في الاخر سلكة صغيرة داخلة على حساس في الموتور مقطوعة و بتعمل شورت... و عربيتك علشان في الضمان مش هاينفع تتلحم و تتلف بشيكارتون علشان كده هانغير ضفيرة المحرك كلها...و حظي طلع كويس ان كان فيه واحدة في المخزن لأنها مش قطعة بتتغير كل يوم و عادة بتطلب من بره مخصوص..
المهم يوم الاربع بالفعل استلمت العربية و فتحت الكبوت لاقيت الضفيرة اللي جوه كلها جديدة فعلا و جربت العربية على الدائري على قد ما أقدر و النتشة لحد دلوقتي مظهرتش... بس هاستنى اطلع بيها للغردقة تاني كمان اسبوعين كده علشان اطمن ١٠٠%
من فرحتي بموضوع الاصلاح مسألتش الفرامل عملوا فيها ايه...بس حسيت انها ضعيفة في الاول و اخدت وقت عقبال ما طبعت تاني... فا يمكن يكون الطنابير اتخرطت ولا حاجة...
دي كانت تجربتي مع الضمان و الاصلاح مع منصور اوبل فرع الصحراوي... اللي اعتقد هاستمر فيه تاني لكل الصيانات بعد كده... ناس محترمة و على قدر عالي من المهنية و كنت متطمن و العربية هناك بصراحة
أي استفسار انا تحت امركم..
