الموضوع: رجالة القاهرة مساعده لاخوكم الاقاليمي

السلام عليكم جميعاً

هدخل في الموضوع على طول...انا طول عمري عايش مابين الزقازيق وطنطا

بس للأسف مش مرتاح...يمكن عشان حاسس ان الحياة كلها في القاهرة

بمعني...عايز اخد كورسات ( في مكان محترم ) مش عارف

عايز اطور نفسي واشتغل في مكان كويس برده مش عارف ، ده على سبيل المثال لا الحصر

لدرجة انها وصلت اني اترفضت في مقابلة شغل عشان انا من الاقاليم ومعنديش محل اقامه في القاهرة

عشان مطولش عليكم اكتر من كده انا بفكر جدياً اخد شقه في القاهرة ... طب وايه المشكله بقى

المشكلة اني مش عارف اخد شقه فين ده غير اني معرفش الاماكن هناك لاني مبنزلش كتير ممكن مره في الشهر

المطلوب منكم ترشحولي منطقة تكون قريبة من كل حاجة ( بطلب المستحيل )

انا بفكر في النزهه ؟ ايه رايكم فيها ؟ والفرق بينها وبين النزهه الجديده

دي فين ودي فين يعني :d واللي عنده اقتراحات تانيه مفيش مشكلة

يعنى المفروض المصريين كلهم يروحوا يعيشوا في القاهرة مثلا !! ونقفل بقية المحافظات كشاليهات طول السنة
بذمتك يعنى بالتفكير ده ممكن البلد تتقدم او يبقى فيها حياة طبيعية ( لو لاسمح الله حبينا نتقدم ؟ )


احنا تفكيرنا بقى عقيم جدا جدا ونرجع نقول ايه سبب مشكلة المرور وايه سبب مشكلة الشقق والسكن
وحتى الـ 10% اللى كنا عايشين عليهم ، مش عاجبيننا وعايزين نعيش على 1% بس من مساحة مصر المليون كيلو اللى ربنا اداهم لنا !

يخرب بيت الهبل بجد ( احنا كلنا كمصريين مش حد بعينه )

خليك زي ما انت ياباشا ويولع الشغل اللى لازم يكون في القاهرة بس ، معلش دور بجد في مكانك ما تنقلش محل اقامتك عشان يبقى اسمك من القاهرة مش من "الاقاليم" ياي الفلاحين الوحشين !


انا شخصيا اشتغلت في القاهرة سنتين عمري ما تخيلت نفسى اكون قاهري او انقل محل اقامتى بشكل دائم للقاهرة
مكنتش عارف ايه اللى ممكن يحصل يعنى اخرج من الوضع ده ازاى
جرب تعيش في القاهرة فترة صغيرة هتكره نفسك ...
بس سبحان الله كنت بقول اكيد مش هستمر كدة

وفعلا الحمد لله ربنا كرمنى بشغل كويس وفي مجالى في مكان محترم وفي المحافظة بتاعتى (مدينة السادات) اينعم المسافة برضه بعيدة والطريق مش حلو بس اهو اسمى خرجت من القاهرة وخالفت كل القطيع والمركزية المقيتة اللى عايزين يفرضوها علينا وما زالوا متمسكين بيها بعد ما ظهرت كل سلبياتها ......


مالها المدن بتاعتنا اسكندرية وطنطا وبنها والزقازيق والمنصورة وشبين الكوم ... لو شوية اهتمام بس بيهم
خصوصا في المجالات اللى مش محتاجة مركزية اصلا ومش معتمدة على القاهرة ، يا راجل ده انا كنت بسافر القاهرة عشان اشتغل مبرمج بيعمل شغل عملاء في استراليا ! ادينى عقلك بقى !

للاسف مفيش حد بيفكر للبلد دى صح ، ده حتى المستعمر لما جه عمل السكة الحديد حافظلك على توزيع المدن بتاعتك وما عملش المركزية القذرة اللى انت عملتها يعنى بنها طنطا اسكندرية ، المنصورة تنزل تلاقى محطات قطر كبيرة وكلها زي بعض مكنش حتى في تمييز زيادة لمحطة مصر عنهم !


تخيلوا لو حلينا بس مشكلة المغتربين اللى عايشين في القاهرة والناس اللى بتهاجر سنويا للقاهرة ... وللاسف اغلبهم بيروح يعيش في عشوائيات ويسيب محافظته وبيته اللى عيشته فيهم اصلا كانت احسن 100 مرة من العيشة اللى هيروح يعيشها .. تخيلوا هنحل كام% من مشاكل مصر مرة واحدة ..؟
السكن ، المرور ، الطرق ، الزحمة ، البطالة ، التحرش ، الجريمة هتقل ..، التلوث هيقل .. دعم الوقود هيقل .. الانتاجية هتزيد لان الناس معاناتها على ما توصل شغلها هتقل ......
ليه مش عارفين نفكر بالتفكير المنطقى السليم وتيجى تتكلم يقولك هنعمل مدن جديدة .. تيجى تبص تلاقيها كأنها جوة القاهرة ! ، وليه مدن جديدة اصلا هو انت كنت خلصت تنمية وتطوير المدن اللى عندك لما هتعمل مدن جديدة .........!!


معلش انا اتفتحت في الموضوع ده غصب عنى بس بالنسبة لك ، انا معرفش مجالك ايه ، بس دور كويس ، ممكن مثلا تشوف شغل في العاشر من رمضان هتبقى قريبة ليك هناك شركات ومصانع وشغل في كل المجالات ..

موضوع الكورسات حتى الان انت مضطر تروح للقاهرة فعلا والموضوع ده مؤقت مش هيبقى على طول بس ارجوك ما يبقاش اول تفكيرك نقل محل اقامتك للقاهرة عشان تشتغل وما تبقاش من "الاقاليم" ، طز في اللى يقولك كدة ( انا اسف ).. انا محل اقامتى المنوفية والحمد لله كنت بكتبها في السي في لاي وظيفة بقدم فيها ، انا مصري زيي زي اي حد محدش هيقوللى معلش انت من الاقاليم مالكش حق تشتغل ، وكونى هروح اشتغل في القاهرة مش لازم اكتب انى بقيت من القاهرة ، القاهرة هى اللى اقليم ايوة القاهرة هى اللى اقليم ، وبقية مصر هى مصر ، مفيش حد عاقل في الدنيا ييجى على مساحة مليون كيلو ويختار منهم 5000 كيلو يقول عليهم هى دى البلد وفي ما عدا ذلك اقاليم !!
ده مختل عقليا على طول ...الاقاليم هى المساحات الصغيرة مش بقية المساحة الكبيرة !