الموضوع: "المالية": خفض دعم الطاقة فى الموازنة الجديدة بقيمة 40 مليار جنيه

اللهم ارفع مقتك وغضبك عنا
طيب عمرك شوفت بلد عايشة على الشحاته
ومش راضيه تطبق الحد الاقصى والأدنى علشان توفر العدالة بين مواطنيها
شوفت بلد عايشة على الشحاتة وفيها ناس بتقبض فوق المليون جنيه فى الشهر
وفيه ناس مرتباتهم آلاف مؤلفة !!!

طبيعى هيشوفوا القرار سليم ومش هتفرق معاهم لو اللتر بقى بـ 20 جنيه
بس محدش يقرب للهبره اللى بيهبرها كل شهر
وطز فى باقى الشعب اللى المفروض يدفع الثمن على طول
حسبنا الله ونعم الوكيل

[img3]https://scontent-a-ams.xx.fbcdn.net/hphotos-xpf1/t1.0-9/10417828_10152453161487241_6492978144083026286_n.j pg[/img3]

منقول من
Ahmad Shaheen


"عن اكذوبة وصول الدعم لمستحقيه"

مفيش مرة سمعت الجملة دى " يجب ان نعمل على وصول الدعم لمستحقيه " من مسئول حكومى كبر أو صغر .. من رأس النظام أو دجاليه الا و عرفت ان اول المتضررين هيكونوا هما الفئة اللى بتتصنف انها من مستحقى الدعم و إن الموضوع ما هو الا نصب علنى

اكذوبة وصول الدعم لمستحقيه دايما بتكون توطئة او تمهيد لالغاء الدعم عن سلع و خدمات استراتيجية و بالتالى فأكتر فئة هتعانى من ارتفاع الاسعار الرهيب اللى بيحصل من تقليص او الغاء الدعم عن سلعة او خدمة معينة هما نفسهم الفئة اللى بيتم المتاجرة بيها لترويج الخطوة القذرة دى

اديك مثال بسيط ؟
لما سلعة استراتيجية زى الوقود مثلا (بنزين و سولار ) يتشال من عليها الدعم و تعلن الدولة انها هتعوض مستحقى الدعم بدعم مادى مباشر تفتكر ايه اللى هيحصل ؟

اقصى حاجة ممكن الدولة تعملها بشكل خيالى و مفرط فى الخيال و الوردية انها تشوف الناس الغلابة اللى هى مصنفاهم مستحقى الدعم – و مش هندخل دلوقت فى دهاليز التصنيف ده هيحصل ازاى أصلا - و تديهم دعم مادى مساوى لما تراه الدولة – و حط مليون خط تحت ما تراه دى – ترتب عليهم من عبء مباشر .. يعنى بشكل مباشر هيبقى الدعم المادى لمواصلاتهم ... يعنى لو الموظف بيقبض 1000 جنيه فى الشهر و مرتبه مغطى اعباءه تماما يعنى ال 1000 جنيه يدوبك بيكفوا متطلبات
حياته كل شهر ، و المواصلات بتصرف معاه حوالى 200 جنيه فى الشهر مثلا - طبعا الدولة هتعمل حساباتها و دراساتها على ما قبل الغاء الدعم - فالدولة تقوم تدى له 200 جنيه بشكل مادى كل شهر

... هل ده فعلا هيخلى الامور تتظبط و الدعم فعلا يوصل لمستحقه بدرجة تحقق الهدف منه بشكل اكثر كفاءة و فعالية و بدون ما يكلف الدولة فلوس زيادة بتروح لغير مستحقين من وجهة نظرها و فى نفس الوقت الموظف او المواطن ده حياته هتتحسن او على الاقل تفضل زى ما هى؟

قطعا و طبعا لأ ... بالعكس هتحمله اعباء اضافية اكبر بكتير من اللى كان بيتحملها قبل الغاء او تقليص الدعم عن السلعة .... إزاى ؟

أولا : اول ما الدولة تلغى الدعم عن الوقود المواصلات اللى كانت بتكلف المواطن ده 200 جنيه فى الشهر هتتضاعف و هتبقى 400 على الاقل و اظن كلنا عارفين ازاى
ثانيا : و دى المشكلة الاكبر ان كل السلع تكلفة نقلها هتتضاعف و بالتالى كل السلع هتغلى غلاء كبير جدا و هتبقى اضعاف تمنها و كل سلعة على حدة هتتحمل بكامل قيمة الزيادة اللى طرأت على سعر النقل و بالتالى الاعباء المادية اللى هتترتب على القرار ده هتبقى اضعاف اضعافها قبل الغاء الدعم عن الوقود
ثالثا : كل المهن و الخدمات الحرة (غير الحكومية ) اسعارها هتزيد بشكل كبير نتيجة لان اصحاب المهن دى اول ما اى زيادة فى الاسعار بتحصل بيزودوا اسعار خدماتهم على طول بشكل موازى

يعنى الموظف اللى مرتبه 1000 جنيه و كان بيكفيه بالظبط ، لما مرتبه يزيد 200 جنيه ببدل الغاء دعم الوقود هيلاقى ان 5 آلاف جنيه مش هيكفوه فى الشهر
و بالمثل لو عايز تطبق على السلع و الخدمات التانية اللى الحكومة عايزة تلغى الدعم من عليها و تدعم "المستحقين ماديا " من وجهة نظرها اللى كلنا عارفين قد ايه هى قاصرة و موجهة و فاسدة

طبعا الكلام ده على افتراض حسن النية الاقصى - أو لو عايز تقول الهبل - فى التعامل مع الحكومة ، و دون الخوض فى تفاصيل التنفيذ اللى بيكمن فيها كل شياطين الارض اللى ابليس يقول لهم يا معلمى

ده بالنسبة للآثار المباشرة على كل مواطن و خصوصا السيد مستحق الدعم من وجهة نظر الحكومة
... طيب بالنسبة للآثار على المجتمع ككل مع انتشار الغلاء الفاحش و بالتالى الكساد الاقتصادى و بالتالى زيادة البطالة بشكل غير مسبوق و بالتالى زيادة معدلات الجريمة و تضاعفها و انعدام الامن فى المجتمع هيبقى ايه اخبارهم ؟

نيجى بقى لنقطة شائكة و أساسية فى موضوع الدعم و اكذوبة مستحقيه ..... هو الدعم ده

مصادره ايه ؟ ايوا تمام ... الضرايب باشكالها و انواعها المختلفة اللى بتتفرض على مواطنين الدولة و غالبا بتتلم من الطبقات المصنفة انها غير مستحقة للدعم اللى بتشمل نظريا الطبقة الوسطى المتآكلة – بمن سقطوا منها لدرجة أو درجات اقل و لكن لازالوا مصنفين غير مستحقين للدعم - و الاثرياء (و اللى بتتلم بشكل عملى أساسا من الطبقة الوسطى بشكل رئيسى ، أما فئة الاغنياء و الاثرياء الكبار فغالبا بيتهربوا بشكل جزئى أو مقارب للكُلى أو بيعفوا من الضرايب اصلا )

طيب بعيدا عن تفاصيل إن النظام الضريبى مظبوط و للا لأ و على فرض حتى انه مظبوط و الضريبة متدرجة و تصاعدية و الاغنياء بيدفعوا الضرايب المستحقة عليهم ... فيه سؤال مهم جدا هنا :

هو اللى بيدفع ضرايب قد كدة مش من حقه يستفيد بالسلع و الخدمات المدعومة بالدعم اللى هوا اصلا دافعه من دم قلبه ؟

يعنى هل يحق للدولة انها تفرق فى السلع و الخدمات المدعومة بين مواطنيها طالما هما بيأدوا الواجبات العامة عليهم من ضرايب و خلافه ؟؟؟؟ و للا هوا الموضوع كله من الاساس هروب بشكل غبى من الفشل الذريع اللى الدولة فيه بسبب الفساد و السرقة و النهب و سوء الادارة اللى هما بقوا اساس و اعمدة النظام و اللى مش عارفة – أو أصلا مش عايزة - تعالجهم او توقفهم و بتحاول تلجأ للحل

اللى على قفا المواطن من غير تحمل اى مسئولية حقيقية ؟؟؟؟

عموما و من وجهة نظرى .... موضوع "مستحقيه" ده اكذوبة كبرى و عملية نصب على أعلى مستوى و ضحك على الناس و متاجرة بيهم لكن ده هيجرنا للسؤال الصعب اللى ناس كتير ما بتاخدش بالها منه او عاملة نفسها مش واخدة بالها منه

.... لما الدولة دى عايزة تلغى الدعم – اللى هوا بالمناسبة من دم المواطنين و ضرايبهم اصلا مش من جيب الدولة و المسئولين - ، و باعت و بتبيع القطاع العام اللى بيملكه الشعب و اللى من فلوسه و ثرواته و عرقه – بكل الفساد و السرقة اللى حصلوا فى الموضوع ده و لازالت الدولة بتدافع عن المصايب دى و بتطعن على الاحكام اللى بترجع الثروات دى للشعب فى سابقة مش موجودة فى اعتى الدول فسادا - ، و عايزة تخصخص الخدمة الصحية و التعليم و باقى الخدمات اللى حالهم كلنا عارفينه انه مليان سرقة و فساد و سوء إدارة و لا يسر إلا كل عدو ، غير الحالة المهترئة على كافة المستويات ، و تقريبا مش عايزة تقوم بأى دور لها الا فى القمع و التسلط على الناس ..... الدولة دى موجودة ليه طيب ؟؟؟؟؟؟ طيب الناس اللى الدولة دى ناهباهم و مطلعة اسلافهم مموتين نفسهم عليها اوى كدة ليه ؟؟؟؟