استفسارات بخصوص صيانة 301
السلام عليكم ورحمة الله و بركاته اصدقاء المنتدى
آسف لعدم المشاركة من مدة...و ده بسبب دوشة شغل
انا فوجئت بعد غياب مدة بكم كبير من المشاكل و الشكاوى.....معقول ال 301 بكل الانتشار ده ما تاخدش الاهتمام رقم واحد من التوكيل.....ده قمة الغباء منهم بصراحة
المهم احكيلكم عن مشاكلى انا:
1-فى صيانة ال 2500 رحت صلاح سالم و سالت المهندس عن تنزيل السوفت وير و بعد ما خلص الصيانة قالى ان العربية علشان جديدة نازلة بالسوفت الوير الجديد.....و بعد يومين حسيت انى مش مطمن و كلمت الرقم المختصر و بعدها كلمونى و قالو معاش تعالى تانى ننزل السوفت وير...طبعا خلونى مش واثق فيهم و لقيت مركز خدمة معتمد فى اول شارع الهرم و ارقامه بتنزل مع اعلانات بيجو...المهندس تعامل بلباقة و مارضيش يغلط ف بتوع صلاح سالم و بعد الحاح منى قالى ان ده خطأ منهم و ان العربية بسهولة نقدر نعرف ان كانت عايزة سوفت وير و لا لأ....انا دلوقت عايز احجز صيانة 10000....اروح غمرة و لا أكمل فى مركز الهرم..بس انا حاسس ان التكييف بيضعف و يقوى علما بانى ببقى مش ماشى على سرعة عالية
2- انا فاكر من فترة كان فيه نقاش حول الزيت و هل نسيبهم يحطو موبيل و لا نحاول نشترى توتال...انا لقيت فى بنزينة توتال آخر شارع ترسا فى الهرم زيت توتال 10000....هل اشتريه و اروح لهم بيه
3- صديقنا هيما كان عامل موضوع قريته بسرعة عن انه هيشترى تيل فرامل برة التوكيل و عايز حد معاه...يا ترى حد اشترك معاه و ايه الاخبار
4- فيه مشكلة غريبة حسيتها...ما بين سرعة 70 الى 90 كم فيه صوت صفارة زى بالضبط صوت تيل فرامل خلصان...اكرر على السرعة دى و انا دايس بنزين مش فرامل...والصوت ده مش موجود اعلى من 90 كم
5- و اخيرا انضميت لقائمة حوادث ال 301....ميكروباص كان واقف على جنب...و طبعا كالعادة تحرك فجأة علشان يدخل ف الباب الجانبى اللى ورا و خد معاه اكرة الباب اللى جنبى...و بصراحة كنت متضايق و مش قادر حتى ادخل و اكتب حاجة...الحمد لله على كل حال.....لكن بصراحة الصدمة دى لو ف عربية تانية كان السواق هيدخل يقعد جنبى....فعلا حسيت ان الباب شديد و يتحمل الصدمات
فى انتظار ردود محبى البيجو