هل تأخر الكلام لدى الاطفال له مدلول سيئ

**khaled_sabry** · 02-06-2014 11:42 AM

السلام عليكم
اسمحولى اشكركم فى مشكله صغيره عندى
ابنى الكبير عنده دلوقتى 5 سنوات و نصف
و يعانى من تأخر فى نطق الكلام
على مستوى النطق و ليس الفهم - يعنى بيتكلم و لكن مخارج الحروف مش كلها سليمه و جدير بالذكر ان اخى (عمه) كان يعانى من تأخر فى النطق بنفس الكيفيه
ويتعامل بشكل طبيعي فى البيت و خارجه و مستوى ذكائه طبيعي ان لم يكن مرتفع فهو يتعامل مع الكمبيوتر و الاى باد (عشقه الاول) لدرجه انه يستطيع اكتشاف كيفيه لعب الالعاب الجديده بدون مساعده و الدخول على اليوتيوب و التبحر فى فيديوهات الكارتون من خلال recommended list
و على المستوى الدراسى فهو حافظ من الحضانه الارقام و الحروف بالعربى و الانجليزي بالاضافه الى بعض الكلمات الانجليزيه مثل الالوان و خلافه

طبعا سنه دلوقتى مناسب ل KG1 لغات و مناسب لاولى ابتدائى عربى
انا هدفى من الاول انى ادخله لغات
وقدمتله فعلا فى اكتر من مدرسه ففيه بعض المدارس رفضته بسبب مشاكل النطق ( رغم انه بيجاوب على كل اسألتهم) و بعض المدارس قبلته مثل ابو جابر الانصارى لغات و السيده عائشه لغات

المهم اخر اليوم (بعد مالفيت على 4 مدارس قبلها على مدار 4 ساعات ) روحت بيه مدرسه ابو زهره الاسلاميه (عربى) على اولى ابتدائى - و كنت عاملها من باب سد الخانه و خلاص
فوجئت بيهم اخدو الولد نص ساعه فى مكتب مديره المدرسه
و بعد كده المديره دخلتنى و بتسألنى "حالته ايه" ؟؟؟
طبعا لأول وهله مافهمتش هى تقصد ايه و بعد كده لاقيتها بتتكلم معايا كأن ابنى عنده توحد او مرض نفسى !!!!!
انا صعقت بصراحه لإنها الوحيده اللى قالتلى التشخيص ده و بصراحه كان كلامها قاسى جداا و اسلوبها سيئ جداا
فبسألها ليه بتقولى كده فذكرتلى
1- انها ملاحظه انه عنده "تعثر" فى النطق لدرجه انها لا تسطتيع التواصل معه
2- لما بتسأله سؤال احيانا يجاوب بكلام لا علاقه له بالسؤال
3- اثناء وجودنا فى مكتب المديره كان ابنى بيتحرك بجوارى و بيلعب فقالتلى ده فى حد ذاته سلوك غير طبيعي المفروض يبقى عنده رهبه و خايف من مكان اول مره يدخله

بالنسبه للجزئيه رقم 1 فانا معترف ان التأخر فى الكلام سمه وراثيه فى عيلتى و اعترف ان مهاب متأخر فى الكلام فعلا عن اقرانه - لكن ليس لدرجه عدم التواصل التام لإنه بيتكلم فعلا لكن مخارج بعض الحروف بايظه بدليل قبول بعض المدارس ليه
بالنسبه للجزئيه الثانيه فاحيانا فعلا لما اسأله سؤال يجاوب بكلام ليس له علاقه مباشره - يعنى مثلا فى احدى اختبارات المدارس وروله رسمه ظابط وقالوله مين ده فقالهم عمو السيسى :)
الجزئيه الثالثه فعلا هو ماكنشى عنده رهبه من مكتب المديره و ماكنشى خايف - لكن انا ببرر كده بإن ده كان المكتب رقم 5 اللى ندخله فى اليوم ده لكن مش عارف هل ده مبرر و لا لاء

طبعا زى ماقولتلكم المدرسه دى مش فارقه معايا اصلا لكن كلامهم بصراحه كلامهم زعلنى جداا و اثر فى نفستي انا ووالدته
فهل ممكن فعلا يبقى عندهم حق و يكون ابنى "متعثر" زى ماقلتلى باللفظ و انا مش واخد بالى ؟؟؟

hh · 02-06-2014 02:26 PM

اولا ربنا يبارك لك في ابنك و تشوفه أحسن واحد في الدنيا.

واضح ان الست الاخيرة دي شكت ان ابنك عنده تأخر في التطور السلوكي مش بس النطق و هي علقت على موضوع لعبه و عدم رهبته من المكان لأن الاطفال اللي عندهم توحد بيبقوا بيتعاملوا زي ما يكون مفيش ناس حواليهم أصلا و بيبقوا في وادي تاني خالص. انما النقطة دي انت ادرى بيها من اي حد تاني, يعني ابنك ما شاء الله كبير مش صغير, هل هو تفاعله معاكم و مع الناس سواء الاطفال او الكبار بصفة عامة طبيعي و لا منطوي زيادة و تحسه عايش في ملكوت لوحده؟؟

ثانيا بخصوص موضوع النطق ده لازم توديه لدكتور تخاطب عشان يشتغل معاه و يعالج مخارج الالفاظ عنده متستناش عليه أكتر من كدة و ان شاء الله لما الدكتور يشتغل معاه شوية حتلاقي كلامه بقى احسن كتير و ابقى اسأله تستشير مين بخصوص موضوع نمو السلوك الاجتماعي و التوحد و الحاجات دي.

من الأخر متسبش نفسك للقلق و ودي ابنك لدكتور و اتنين عشان تطمن على الأخر مش حتخسر حاجة, انما متستناش و تفضل تفكر و مخك يودي و يجيب. و ان شاء الله تطمن عليه و تفرح بيه و ربنا يبارك لك و لنا جميعا في أولادنا يا رب

**احمد فهمى** · 02-06-2014 02:44 PM

الموضوع محتاج دكتور متخصص يفيدك اكتر مننا وممكن يدلك على طريقه بسيطه تعالق القصه دى وفى اجهزع عندهم بتوضح ان وراثى ام لا وتدريبات بسيطه تضيع المشكله ان شاء الله وربنا يحفظه لك

**khaled_sabry** · 02-06-2014 03:03 PM

و بعد كده هل معقول لو كان عنده تأخر ذهنى - مدرستين لغات يقبلوه ؟؟

**SHNORY** · 02-06-2014 03:07 PM

هو ليه مدلول سيئ مرجوعه عليك بعد كده
كل حالات التاخر اللي شوفتها الطفل فيها بعد سن معين بيعوض الكلام اللي متكلمهوش طول عمره
وبيبقي رغاي جداااااااا وحيصدعك ومش حيبطل كلام
ربنا يخليهولك ويطمنك عليه
ومتقلقش

**friendship7897** · 02-06-2014 03:13 PM

ربنا يخلي لك أولادك ، ويحفظهم من كل سوء .

طبعاً أنت أدرى بأبنك لو الموضوع تأخر في النطق بس ، يبقى متأقلقش ، هو ممكن يكون شواية دلع وكويس أنك وديته لدكتور تخاطب .

وموضوع مديرة المدرسة الأخيرة والتوحد دا تشخيص مبالغ فيه شوية والله أعلم ، وهقول لك على بعض أعراض التوحد وأنت هتعرف تشخص أبنك أكتر منها لأنك معاه فترات طويلة أنت ووالدته :

1. لايهتم بمن حوله ويبدو كأنه لايسمع .

2. يقاوم التغيير في الروتين وايذاء الذات .

3. لا يستطيع التعبير عن الالم .

4. لديه نقص في الخيال والابداع عند اللعب .

5. حركات متكررة تظهر في حركة الجسم او اثناء مسك الاشياء مثل هز الراس ، او الرفرفة باليدين بشكل متكرر ومستمر .

6. لا يشارك الاخرين باللعب ولديه نقص فى اللعب التلقائى أو الابتكارى، كما أنه لا يقلد حركات الآخرين، ولا يحاول أن يبدأ فى عمل ألعاب خيالية أو مبتكرة .

7. نشاط زائد أو خمول زائد .

8. لايدرك المخاطر .

9. يقاوم الاحتضان والحنان .

10. الصعوبة والتكرار فى الكلام.

11. الاضطراب عند تغيير روتين معين مثل الانتقال من مكان لآخر.

12. الكلام فى الحديث مكرر ومتكلف تكرار كلمات معيّنة (فقدان الحوار مع الناس).

13. الصوت يكون غير معبر (كالصّراخ) .

14. تصرفات متكررة: الهزهزة عدم التمركز خلال الجلوس على كرسى (عند الأطفال), حَملقة دائِمَة بدون سبب.

15. يقضى الطفل وقتاً أقل مع الآخرين، يبدى اهتماماً أقل بتكوين صداقات مع الآخرين، تكون استجابته أقل للإشارات الاجتماعية مثل الابتسامة أو النظر للعيون.

أما عن سلوكه قد يكون نشطاً أو تصدر منه حركات أكثر من المعتاد، أو تكون حركته أقل من المعتاد، مع وجود نوبات من السلوك غير السوى (كأن يضرب رأسه بالحائط، أو يعضّ) دون سبب واضح، قد يصرّ على الاحتفاظ بشىء ما، أو التفكير فى فكرة بعينها، أو الارتباط بشخص واحد بعينه، هناك نقص واضح فى تقدير الأمور المعتادة، وقد يظهر سلوكاً عنيفاً أو عدوانياً، أو مؤذياً للذات.

**Samah AbdAllah** · 02-06-2014 03:18 PM

بعد الشر يا خالد مهاب طبيعى وزى الفل
اكيد تعب جاله برد وديته لدكتور مفيش مرة دكتور قالك انه مش طبيعى ولا عنده اى تاخر يبقا ان شاء الله مهاب معندوش حاجة
كريم ابنى لحد ما دخل سنة اولى تقريبا كان عنده حروف بينطقها مش واضحة منها الخ ينطقها ح الكاف تاف
وقبلها كان متاخر في الكلام ودكتور الاطفال قالى مفيش مشكلة مادام بيتكلم حتى لو الكلام مش واضح
بخصوص الرهبة وانه بيلعب عادى جدا ومش خايف فده بيبقا متعلق بشخصية الطفل فى اطفال مندهاش رهبة ولا خجل من اى مكان وبيكونوا اشقيا واجتماعيين جدا فمش بيفرق معاهم حتى لو دى اول مدرسة يدخلها
عندى زيه :)
فسيبك من كلامها لو بعد الشر عنده توحد كنت انت اول واحد هتاخد بالك ومن سنين مش من انهاردة