لسه فيه امل في مصر وشعبها ...

**prof2013** · 04-06-2014 03:47 AM

لسه فيه امل في مصر وشعبها ...
...................................
كنت طاير بالاسكوتر بتاعي ع الطريق .. الموبايل طار من جيبي وانا ماشي ومش حسيت بيه الا بعد فتره رجعت ادور عليه ملقيتوش ... اخدت موبايل واحد ورنيت على نفسي لقيته بيدي جرس بدون رد !! قولت يبقى محدش لقيه لسه
روحت اخدت ابويا ندور ع الموبايل وقعدنا نرن عليه وبردو مفيش رد
لحد ما فوجئنا ان موبايل ابويا بيرن والرقم مين بقى ؟؟؟ يبقى رقمي فرحت
رديت ع الراجل وكان نص الحوار كالتالي
هو : مين معايا
انا : انا صاحب الموبايل اللي معاك حضرتك
هو : طيب ياباشا انا من الرقه وحاليا في الوسطى حبيت تيجي تاخدوا دالوقتي ماشي حبيت تجيلي الرقه بكره مااااشي
انا : هو انا هقدر استنى لحد بكرا !!! دا انا اعصابي بايظه
هو : خلاص تقدر تجيلي عند مسجد التحرير بالواسطى انا مستنيك هناك
انا : خلاص ماشي 10 دقايق واكون عندك .... ومن الفرحه دوست بنزين وطرت وكانت المحفظه هتطير هي كمان كان فيها البطاقه ورخصه الاسكوتر و 100 جنيه
طيب الموبايل وينفع نرن عليه طيب والمحفظه نرن عليها ازاي ؟؟؟
المهم قابلت الراجل باسني من هنا ومن هنا وبكل زوق اعطاني الموبايل ومن كتر الفرحه عزمت عليه بعشوة في مطعم الملوك لم يقبل ولم يذكر مجرد القول بأخذ حلاوة استرجاع الموبايل
فأعطاني الموبايل وذهب
قولت في نفسي لو كل الناس في مثل امانتك لصلحت احوالنا ولم نصل لما نحن عليه الان ولكن هذا موقف يبشر بوجود فئات محترمه في المجتمع المصري ما زالوا على قيد الحياه
فالاحترام ما زال موجود ولم يمت بعد
المهم انا لازما اركب سوست في بنطلوناتي وانصح كل واحد يركب سوسته في بنطلونه

**hossam_elwani** · 04-06-2014 05:01 AM

عمله نادره وايجابيه فى مجتمع فاسد حتى النخاع

**shiko85** · 04-06-2014 05:07 AM

اولا مبروك ان الموبايل رجع
ثانيا المصريين فيهم خير سيبك من بعض الفئات الغريبه اللى ظهرت فالمجتمع دول عاملين زى الطين اللى بيغطى الذهب
للأسف الفئات دى ظهرت بشكل ملحوظ فالـ 5 او 10 سنين اللى فاتوا بس الحمد لله لسه فيه خير فـ ناس كتير و ان شاء الله قريب نخلص من كل حاجه بتشوهه صوره مصر و المصريين

**waleed0** · 04-06-2014 05:44 AM

في ناس عندها خير كتير , وابسط المواقف حتلاقيها , زي مثلا اللي وسط الزحمة وكل العربيات مش عايزة تعديك الطريق وتلاقي عربية وقفت وصاحبها شاورك اتفضل عدي وابتسامة علي وشه , تخليك تنسي قرفك من الزحمة في ثانية وتقول لسه فى خير .

**tutankhamoun** · 04-06-2014 06:10 AM

الخير موجود إن شاء الله و الناس و الله طيبين و غلابة و أغلب المصريين عندهم أمانة
المشكلة بس الناس اللي ظاهرة على السطح اللي عايزة الضرب بالنار .

**أسامه الحسيني** · 04-06-2014 09:07 AM

علي فكره المفروض يكون دا الطبيعي بس نقول ايه علي فساد الاخلاق واحب اقولك ان في من النوعيه دى كتير بس للاسف الوحش بس هوا الى باين
بالرجاء الاطلاع علي المشاركه دى
http://www.nilemotors.net/Nile/42472...post3875608003

**automea** · 04-06-2014 09:10 AM

عادي بتحصل كتير انا عن نفسي (للعبرة وليس للفخر ) لقيت مرتين موبيل وبتصل وبرجهوله بدون مقابل
واي رصيد بيجيلي عن طريق الخطاء بعمل كده برجهوله

وواحد صديقي لقي اي فون اتصل بصاحب الرقم وادهوله والراجل صراحة كان هيموت من الفرحة

فيه ناس مبترجعش الحجات دي ويقولك رزق اعرف واحد عثر عل موبيل في اوتوبيس وخده وخلع الخط رماه وقال لقيته من غير خط (وقال ربنا عوضني عن موبيلي الي ضاع وده رزق )

الراجل ده حاليا كل مايشتري موبيل يضيع منه يا يتسرق يا يبوظ حوالي اكتر من 5 موبيلات على الحال ده

**S O P H O S** · 04-06-2014 12:01 PM

الحمد الله انه رجع

**hhhhhm** · 05-06-2014 07:24 AM

أيوه كده حسسونا ان الدنيا لسه بخير

**khaled_sabry** · 05-06-2014 11:09 AM

المفروض ان ده العادى
انا بصراحه ماوقعشى منى موبيل قبل كده
لكن مره لاقيت موبيل بلاك برى قدام كوتش العربيه و انا بكشفها علشان اروح الشغل الصبح اخدته و فضلت قاعد جنبه علشان حد يرن عليا
(بصراحه برضه الشطان لعب فى راسى 3 دقايق لإن الفتره دى كنت عاوز اغير الموبيل و ده كان بلاك برى و كان لسه جديد - بس الحرام مابيدومشى)
لاقيت اخو صاحب الموبيل بيتصل من اليمن (بيتصل على اخوه اللى ماكنشى لسه اكتشف ضياع الموبيل)
قولتله على الموضوع وقولتله لو تعرف نمره تانيه تقدر توصل بيها لاخوك علشان ياخد موبيله
بعدها بدقيتين لاقيت صاحب الموبيل اتصل و قولتله تعالى الشغل بتاعى او استنى لما اروح و تاخده من مكان ماوقعته
قالى لا انا حجيلك دلوقتى و قابلته فعلا و كان شويه و حيبوس ايدي لإن شغله و ارقام كتير على الموبيل ده