تعمل إيه لو رجعت لاقيت حد راكن جنبك على الشمال ومانعك من الدخول لعربيتك؟؟؟؟

**R A N A** · 13-10-2008 01:20 PM

المشاركة الأصلية كتبت بواسطة SS

عادى جدا جدا ...مش عارف ليه دايما يا جماعة بتنسوا انكم فى مصر ...عموما الحمد لله انه ماكنش واقف ورا منك موازى و معشق...و كويس جدا موضوع الورقة ده انا كنت بفكر فيه من فترة بصراحة عشان ما اتخانقش مع حد ..و اهو يمكن الزوق يجيب نتيجة و الناس تحس....بس قولى لى كنت هاتعملى لو تصادف وجود مشكلة عندك فى الباب اليمين زى ماحصل معايا؟

والله احنا مش ناسيين اننا في مصر بس الواحد بيفتكر عشان بيراعي الناس التانية بيفتكر برده ان الناس ممكن تراعيه (احلام وردية يعني :Angel_anim:).
لو حصلي موقف حضرتك بقي ولاقيت الباب اليمين كمان مقفول ومعرفتش ادخل ساعتها مكنتش هاقدر اعمل اي حاجة الا لما صاحب العربية يظهر ويحن عليا ويطلعني يعني كبيري اوي اقعد اسأل بوابين العمارات يمكن يكونوا عارفين حضرته ويندهوله يطلعني من المزنق ده :k41:.
لان مفيش اي طريقة تانية ادخل بيها العربية غير البابين دول مستحيل ادخل من الشنطة ياجماعة عربيتي 128 مش عربية حديثة اعرف اطوي فيها الكنبة وادخل من الشنطة والكلام ده وحتى لو ينفع مقدرش ادخل من الشنطة اعملها ازاي دي انا بنت ياجماعة مش ولد :D دي تبقي حاجة مسخرة ومستحيل اعملها اصلا

.
الحل التاني بقي هو اني كنت هاسيب العربية واروح مواصلات وافضل طول الطريق ادعي واتحسبن في اللي كان السبب في البهدلة دي وطبعا بردة كنت هاسيبله ورقة برده بس فيها اسلوب حاد اكتر من كده

.

**R A N A** · 13-10-2008 01:26 PM

في حاجة كمان بالنسبة لإقتراح اني اركن بضهري برده لو واحد مبيفكرش غير في نسفه وبس ولاقي المكان ضيق يقفل عليا باب السواق بنفس الطريقة واني اسيب العربية ممورة وازقها معتقدش ان طاقتي والبنية البدنية بتاعتي تسمحلي بإني ازق عربية من مكانها
ممكن بقي استعين بصديق :D

**Amrrr** · 13-10-2008 05:17 PM

حلوة اوي فكرة الورقة دي عجبتني موووووووووووووووووت
وعامة انتي فعلا ممكن تركني ممورة واي حد بس لو شاورتيله يزقلك العربية دي هتبقى حتة صغير مش عايزة مجهوود ولا حاجة وانا على فكرة دايما بسيبها ممورة على أد ماتقدري طبعا مش كل الشوارع ينفع فيها تسيبي العربية ممورة وفي كذا سبب لركن العربية ممورة :
1- لما حد ييجي يسند ويلاقيها بتتحرك مش هيسند خالص او هيريح بس من غير أذية عشان الصاج الورق بتاع الجديد
2- ساعات في ناس مش بتعرف تركن كويس او بيعرف ويحاول يوسع المكان لنفسة عن طريق انه يزق العربية اللي راكنة وحتى لا تصاب العربية بمكروه في حالة زي دي بسيبها ممورة

وانا لو مكانك كنت هعمل زي مانتي عملتي بالظبط باستثناء موضوع الورقة دي ماجاش في بالي قبل كدة خالص

**R A N A** · 13-10-2008 05:31 PM

المشاركة الأصلية كتبت بواسطة Amrrr

حلوة اوي فكرة الورقة دي عجبتني موووووووووووووووووت
وعامة انتي فعلا ممكن تركني ممورة واي حد بس لو شاورتيله يزقلك العربية دي هتبقى حتة صغير مش عايزة مجهوود ولا حاجة وانا على فكرة دايما بسيبها ممورة على أد ماتقدري طبعا مش كل الشوارع ينفع فيها تسيبي العربية ممورة وفي كذا سبب لركن العربية ممورة :
1- لما حد ييجي يسند ويلاقيها بتتحرك مش هيسند خالص او هيريح بس من غير أذية عشان الصاج الورق بتاع الجديد
2- ساعات في ناس مش بتعرف تركن كويس او بيعرف ويحاول يوسع المكان لنفسة عن طريق انه يزق العربية اللي راكنة وحتى لا تصاب العربية بمكروه في حالة زي دي بسيبها ممورة

وانا لو مكانك كنت هعمل زي مانتي عملتي بالظبط باستثناء موضوع الورقة دي ماجاش في بالي قبل كدة خالص

بصراحة انا كنت مترددة اوي قبل ماكتبها ومكنتش عارفة اكتب فيها ايه وقلت اطنش وخلاص بس صعبت عليا نفسي لما دخلت بالشكل ده وافتكرت اني مشيلتش الشماستين اللي ورا كمان واضريت اتشقلب تاني عشان اشيلهم :D فقلت وانا اتقهر لوحدي يعني واسيب الموقف يعدي بالساهل كده اكتبله ورقة أأنبله بيها مضيره شوية يمكن يخلي باله بعد كده ويحس شوية.

الفكرة دي كنت مرة راكبة جنب واحدة صاحبتي وطلعت لاقت واحد راكن ركنة متخلفة برده وقافل عليها جامد وطلعت بصعوبة وهيا طالعة لاقيتها بتقول انا نفسي اسيبله ورقة علي الإزاز واقوله منك لله ولا اشتمه على ركنته البايخة دي بس منفذتهاش بصراحة الفكرة عجبتني (مع الفارق اني كلمته في الورقة بمنتهي الأدب) وقلت بما اني اتحطيت في نفس الموقف بقي انفذها واقولهالكوا يمكن ربنا يهدي الناس ويحسوا شوية وياخدوا بالهم بعد كدة عشان ميرجعوش يلاقوا كلمتين على الإزاز :D
بالنسبة لموضوع التموير ده بقلق منه ومش بحبه خالص مش عارفة ليه بقول اركن صح احسن وافضل من البهدلة لحسن حد يزقها للشارع التاني ولا يسيبها في نص الشارع مثلا :D

**Mystique** · 13-10-2008 10:28 PM

والله انا أحييكي يا birdybirdy على التصرف اللي عملتيه وشايفة انه سليم 100%
أنا لو مكانك كنت هعمل كدة..
أنا مريت بالمواقف دي بس غالبا ببقى ف مكان شغلي او تحت البيت فبقول للبواب او عامل من عندي قول للباشا لما يطلع بلاش الركنة دي..في ناس وراها مصالح ومش طالبة تضييع وقت وأكروبات عشان الواحد يركب ويطلع..وهم بيقوموا بالواجب..وساعات لما بتزنق قوي أو ألاقي حد راكن ورايا بالعرض بيزقولوا العربية.
الورقة دي فعلا ساعات كتير بتفيد وخصوصا لو واحد ركنته ف المكان ده متكررة..حتى لو مش هياخد باله عموما..أعتقد ممكن هياخد باله ف المكان ده بالذات..

ربنا يهدي الجميع..وميحطكيش ف مواقف زي دي أبدا.

**ibrahimsaad** · 13-10-2008 11:05 PM

هو طبعا موقف بايخ من الناس اللى بتركن كده وواضح انهم ناس ماعندهمش احساس

لكن موقفك ايجابى جدا ويدل على رقى حضرتك

انا حصل لى موقف زى كده بس كنت راكن عربيتى قدام بيتى على رصيف العماره وواحد ابن حلال ركن عربيته على رصيف الشارع اللى هو يعتبر قدامى وقفل عليا الطريق واضريت انى اسيب العربيه وامشى بدونها ودمى محروق بس ماجاش فى بالى حكايه الورقه دى هاابقى اعملها المره الجايه بس هااخلى الاسلوب شديد شويه لان دى ناس ماعندهاش احساس

**Ghamrawy** · 13-10-2008 11:37 PM

حادخل من الباب اليمين عادى و مش حاكتب ورقة و لا أعمل اى حاجة علشان ممكن جدا اللى راكن كده ده مايكونش بيعرف يقرا و يكتب ....................بس لو مجهود دخول العربية زاد و العملية قلبت بقرف يبقى مافيش غير الواد مسمار (مفك مصدى) و جنب العربية كله و انا راجع بضهرى علشان اطلع من الركنة

**Amrrr** · 14-10-2008 10:50 AM

المشاركة الأصلية كتبت بواسطة gemino

حادخل من الباب اليمين عادى و مش حاكتب ورقة و لا أعمل اى حاجة علشان ممكن جدا اللى راكن كده ده مايكونش بيعرف يقرا و يكتب ....................بس لو مجهود دخول العربية زاد و العملية قلبت بقرف يبقى مافيش غير الواد مسمار (مفك مصدى) و جنب العربية كله و انا راجع بضهرى علشان اطلع من الركنة

يا راجل حرام عليك بلاش الأذية اللي تعور دي
ممكن يعني لو طالبة معاك اوي تقرفه نيمله فردة كاوتش لكن حرام متبوظشي حاجة بالتجريحة دي عشان التجريحة مش هتتعالج لكن فردة الكاوتش تكدر هتاخد وقت وخلاص وممكن فردتين بقى تبقى جامدة اوي ويقعد رايح جاي او يشوف عربية تانية وتسيبله ورقة كمان تقول فيها ان اللي هو فيه دا عشان مخدشي بالة من غيرة وهو بيركن وهو مش ماشي لوحدة في الشارع لكن تجريح الباب دا بلاش

**Amrrr** · 14-10-2008 01:46 PM

المشاركة الأصلية كتبت بواسطة birdybirdy

بالنسبة لموضوع التموير ده بقلق منه ومش بحبه خالص مش عارفة ليه بقول اركن صح احسن وافضل من البهدلة لحسن حد يزقها للشارع التاني ولا يسيبها في نص الشارع مثلا :D

الركنة ممورة طبعا مش في اي مكان وبعدين انتي لو راكنة كويس محدش هيزقلك العربية في نص الشارع !!هوممكن حد ييجي يسند يلاقيها بتتحرك فيبعد مثلا لكن ايه اللي يخلي حد ييجي يزقها في نص الشارع مثلا او كدة
كان عندي زمان سيات وكانوا بيزقوها دايما ( شغلي كان في شارع جامعة الدول العربية) وطبعا مهما اعشق واشد الفرامل كانوا بيزقوها وبيتعافوا عليها طبعا لما بعشق أول أو تاني ويقعدوا يرفعوا ويزقوا كذا مرة ورا بعض بطريقة فعلا تقطع القلب
وبعدين جاتلي فكرة اني الف العجل بحيث تبقى العربية مكلبشة فرامل وتعشيق نقلة والعجل معشق في الرصيف لافف على الرصيف !!! السايس الرخم عمل ايه يومها ؟ عدل العجل بايدة من برة وزق العربية برضة

وبعد ماجبت عربية زيرو والحمد لله ببص عليها من الشغل مرة , لقيت تيريوس بيزقها بالاكصدام الحديد اللي ورا عندة وكنت شادد الفرامل وطبعا زقها !! بصراحة بقيت أخاف عالفرامل والاكصدامات من الزق فبسيبها ممورة عشان يوم ما حد يزق مايحصلشي حاجة وتتزق العربية وخلاص بدل الاكصدام ما يتقشر او يتطبق مثلا او الفرامل تخف او اي حاجة بقى ممكن تحصل في الظروف اللي زي دي :k44:
عشان واضح ان في ناس معندهاش مشكلة تعمل اي حاجة بس يركن وخلاص ومش مهم بقى هيبوظ ايه ويكسر ايه مش فارقة مع حد:k17:

**دموع الثلج** · 14-10-2008 03:47 PM

المشاركة الأصلية كتبت بواسطة gemino

حادخل من الباب اليمين عادى و مش حاكتب ورقة و لا أعمل اى حاجة علشان ممكن جدا اللى راكن كده ده مايكونش بيعرف يقرا و يكتب ....................بس لو مجهود دخول العربية زاد و العملية قلبت بقرف يبقى مافيش غير الواد مسمار (مفك مصدى) و جنب العربية كله و انا راجع بضهرى علشان اطلع من الركنة

يا سااااااااااتر يارب على العدوانيه دى

انت من جوه مش ابيض خالص:k40:
بصى يا بيردى هى حصلت معايا قبل كده بس الحمد لله عرفت اطلع بالعربيه بشويه صعوبه

بس لو حصلت معايا لا قدر الله ومنفعش اركب عربيتى ولا اطلعها اصلا ومتاخره بالليل
هفتح شنطه العربيه وهوب هطلع الغطاء اغطيها واركب تاكسى واروح
او هحاول اخلى حد يزق لى العربيه اللى قافله عليا
او هنتظر شويه وامرى لله لو فيه امكانيه
وفى كل الاحـــــوال انا شاريه دفتر صغنن استيكرز شكلها حلو اوى فى طرفها ماده لزقه
دائما فى اى موقف غبى بطلع الاستيكرز واكتب عليه كل اللى نفسى فيه والزقه على باب السواق يبقى ذى ذكرى على الزجاج