أخوكم الصغير محتاج نصيحتكم في موضوع شخصي

**drdevil87** · 13-10-2008 03:03 AM

اولا انا فكرت افضفض لأي حد عشان اخد رأيه في الموضوع ده .. و بجد ملقتش .. و املي في ربنا ثم فيكم اني الاقي الرأي اللي يفيدني عندكوا .. عشان انا عارف انكوا هتعتبروني اخ صغير ليكوا و هتخافوا عليا ..
القصة اني في كلية صيدلة في اخر سنة.. عندي 20 سنة.. و ان شاء الله ناوي بعد ما اخلص اشوف موضوع الجيش و اخلص منه و بعدين اسافر امسك مع والدي الصيدلية بتاعتنا في الخليج .. والحمد لله والدي موفرلي كل حاجة .. جابلي عربيتي السنة اللي فاتت و باني ليا شقة في البيت اللي احنا ساكنين فيه والحمد لله حمدا كثيرا ..
المهم في الموضوع ان انا ليا زميلة فالكلية .. بجد بحسها اقرب حد ليا في الناس اللي اعرفها كلها .. بحب اخد رأيها في كل حاجة .. مع اني مش مفهمها غير ان احنا مجرد صحاب قريبين اوي من بعض .. و بجد البنت دي بحسها اكتر واحدة فهماني و اكتر واحدة بتوجهني للصح ..
والبنت دي جت عليها فترة و حصل بينها و بين حد من زمايلي زي ما تقولوا كدة ميل لبعض او حب .. و بعدين انفصلوا .. و بعدين اتقدملها عريس و وافقت عليه و اتخطبتله شهرين و بعدين سابوا بعض ..
طبعا انا لما حسيت ان البنت دي مجرد ما اتخطبت اكتئبت عشان مجرد حسيت انها هتبعد عني كأصدقاء .. " اللي كان خاطبها ده كان خنيق قوي الصراحة "
بعدين لما انفصلت عنه انا فرحت الصراحة و رجعت احكي معاها تاني و افضفضلها ..
و مرة وانا بتكلم مع واحد صاحبي قريب مني اوي .. قلتله ايه رأيك ارتبط بيها .. قعد يقلي انت باين عليك خرفت و انت شكلك مش فاهم انت بتقول ايه .. قلتله ايه المشكلة لو قلتلها اني مش قادر استغنى عنها و اني بفكر ارتبط بيها رسمي .. فقالي اولا ما ينفعش عشان السن (احنا الاتنين عندنا عشرين سنة .. انا اكبر منها بشهر ) و ثانيا دي مش هتقدر تصون بيتك .. و غير كدة و كدة انا لسة طالب و تفكيري هيتغير بعد الجامعة والجيش

بصراحة انا مش عارف اساسا ايه الاحساس اللي انا حاسه ناحيتها ؟ هل هو حب ام مجرد اعجاب بشخص خايف عليا و على مصلحتي .. بجد يا جماعة انا الحاجة الوحيدة اللي بفكر فيها هي انها متضعش من ايدي .. و حاسسها خسارة في اي حد .. خصوصا انها بنت ناس بجد و متربية تربية حسنة ..
انا مش عارف اعمل ايه ؟؟؟ هل افاتحها فالموضوع ده؟ و لو فاتحتها هل هنقدر نصبر لحد ما اقدر اتقدملها رسمي ؟
و المفروض لو فكرت اتقدملها يبقى امتى الوقت المناسب ؟
و لو فاتحتها هل ممكن اخسر صداقتها ؟ و امتى الوقت المناسب اللي افاتحها فيه ؟؟؟؟؟
بجد اسئلة كتير نفسي الاقيلها اجابة !!!!؟؟؟
ده غير كدة و كدة اني قعدت اتكلمت مع ابن عمي .. و هو شغال فالخليج برده .. قالي ان فرصة المصريين اللي بيشتغلوا برة مصر فالجواز بتبقى ضئيلة حبتين .. و حكالي عن واحد صاحبه بعت لوالدته تخطبله و عملها توكيل و خطب واحدة لعمرها شافته ولا شافها :s:s:s
طبعا انا لو حصل معايا حاجة زي كدة انا ممكن يجيلي تخلف عقلي ولا حالة نفسية..

بجد يا اخواتي فالمنتدى .. تنصحوني اعمل ايه؟ وآآآآآآسف للاطالة

**Ahmed Anwer** · 13-10-2008 03:10 AM

طيب ايه المشكلة ؟؟

شقتك موجوده و شغلك موجود ان شاء الله

صلي استخاره و قول لاهلك ،،

و لو فيه خير ربنا هيسرهولك

الا لو انتا من انصار الحرية و تأخير سن الزواج

**Nour_Peugeot** · 13-10-2008 03:13 AM

انا معا راي صاحبك القلك مينفعش دلوقتي

لازم يا باشا تكون نفسك و تبقي قادر تصرف علي نفسك و ثانيا لارم فرق سن علشان يكون في تفاهم و تجانس في التفكير انا انصحك بلاش ان شاء الله بعد متخلص جيشك و تكون نفسك في الخليج اعمل الانت عيزه

و بنات الناس كتير

اخوك الاصغر منك هههههههه

**drdevil87** · 13-10-2008 03:15 AM

لا ولله بالعكس انا نفسي ..
بس حاسس اني لو قدمت على حاجة زي دي دلوقتي ممكن مقدرش اتحمل مسئوليتها .. خايف اخسر صداقتها .. مش عارف !!

**Abdelrahman** · 13-10-2008 03:19 AM

أخي العزيز اولا انت لا صغير ولا أي حاجه ماشاء الله عليك انت في السنه النهائيه في كليه من كليات القمة يعني فاهم وواعي لكل شئ ...ولله الحمد الامور الماديه معاك ميسره بغض النظر انت الي عامل ده او والدك ...طالما انت عاقل ومتوفوق ومطيع وملتزم مش عيب ابدا ان والدك هو الي يتحمل مصاريف جوازك في سبيل انوا يبعدك عن المنكر والغلط والمعصيه ....البنت الي انت معجب بيها مرت بتجربتين فاشلتين .....هل انت متأكد ان البنت دي كويسه ...بمعنى تاني ان التجربتين الفاشلتين الحق مش عليها بالعكس الحق معاها؟؟؟؟دي حاجه تقلق شويه ما خبيش عليك
تاني حاجه انت بتحبها ولا لأ؟؟لازم تسأل نفسك السؤال ده ....الي انا فهمتوا من كلامك انك متمسك بيها فقط لأنها الوحيده إلي بتسمع شكواك وبتريحك...وده مش سبب كافي للارتباط
أنت ممكن تكون بس مفتقد الصديق الوفي ولاقيت الصديق ده فيها
بالنسبه للسن مش عيب ابدا انها من سنك او حتى أكبر.....السيده خديجا أم المؤمنين كانت أكبر من الرسول صلى الله عليه وسلم
حاجه بس زعلتني في كلامك...انت زعلت انها لما اتخطبت قطعت علاقتها بيك ولو جزئيا....انت ترضاها لنفسك أو أختك لا سمح الله انها تكون مخطوبه او متجوزه وبتصادق رجل تاني..صداقه محترمه وكل حاجه تمام ...بس انت ترضاها؟؟؟لا أعتقد
سواء كنت متدين أو لا ..أنا بحس ان الفطريه البشريه السليمه للراجل بترفض نوع العلاقات دي
حتى لو محترمه
أخيرا استخير وخد رأي ولدك ووالدتك هم أكتر ناس هادلك على الخير والصح بإذن الله

**drdevil87** · 13-10-2008 03:19 AM

يعني انت شايف ان لازم الواحد يكون نفسه بعد ما يخطب ولا قبل ما يفكر اساسا ؟

و يا باشا مش فارقة اصغر مني ولا اكبر مني .. المهم ان احنا اخوات :)

**Noha.M** · 13-10-2008 03:23 AM

انا مش فاهمة اصلا انت ليه عاوز تجوز دلوقتى !!

انت صغير اوى كمان ادى فرصة للتلات اجيال اللى قبلك اللى قاعدين لسه على القهاوى

بص بامانة انا حاسة ان خبراتك قليلة اوى فى الحياة و كلامك مفهوش نضج و فكرة الزواج دلوقتى اظن يبقي احسن لما تأجلها و تشتغل و تثبت نفسك

**drdevil87** · 13-10-2008 03:25 AM

على فكرة انا لما لقينها اتخطبت انا اللي بعدت .. حتى هي استغربت موقفي ..
و انا معاك ان صداقتنا غلط و هي مخطوبة ..
انا كان قصدي من كلامي بس اني حسيت ان في حاجة كبيرة راحت مني و بعدين رجعت .. ده اللي قصدي من الكلام

**دموع الثلج** · 13-10-2008 03:33 AM

المشاركة الأصلية كتبت بواسطة drdevil87

يعني انت شايف ان لازم الواحد يكون نفسه بعد ما يخطب ولا قبل ما يفكر اساسا ؟

و يا باشا مش فارقة اصغر مني ولا اكبر مني .. المهم ان احنا اخوات :)

المهم ان انتوا اخوات ...................!
حرام عليك يا راجل ده انا كانت الدمعه هتفر من عينى خلاص لحد ما شفت ردك ده
طيب واجع قلبك ودماغك بعلاقتها ليه وبتفكر فى جواز وخطوبه وانت بتقول اخوات

نصيحتى ركز فى مستقبلك بجد اللى بتحس بيه ده نتيجه التعود عليها بس
بعد ما تخلص كليه ولا هتفتكرها اصلا

**drdevil87** · 13-10-2008 03:35 AM

يا اخت نهى .. اولا انا قدامي مش اقل من سنتين عشان افكر فالجواز .. طبعا مش بفكر خالص فالجواز دلوقتي .. انا قصدي من الكلام هل افاتحها فالموضوع ممكن توافق على خطوبة دلوقتي ولا بلاش و افضل قاعد ساكت احسن ؟
و بعدين بالنسبة لل3 أجيال اللي قاعدين عالقهاوي ..خلاص يعني هياخدوا فرصتهم ساعة لما انا افكر ؟؟ :)