تقرير عن عمل صيانة وتصليح في مركز م/ هاني (سبيد سيرفيس)
السلام عليكم ورحمة الله وبركاته
انا معايا عربية هيونداي جيتز موديل 2007 عاملة 245000 كيلو ( عجوزة اوي انا عارف ) .
من فترة كبيرة وانا عندي مشكلة في علبة الدركسيون وقولت خليني ماشي بيها لغاية لما تجيب اخرها لانها غالية حبتين ( 3000 من بره التوكيل ) وكان من فترة برضه كبيرة اوي ايام ماكنت بروح التوكيل كانوا قالولي اني العربية محتاجة مقصات.
المهم العربية كانت بتعوم شوية من قدام في المطبات وكان في اصوات تخبيط في الجزء الامامي مع اقل مطبات. فقررت اني اظبط العربية شوية واشتريت الاتي :
- مقصين اصلي الواحد سعره 400
- مسمارين ميزان اصلي سعرهم 190
- بيضتين الطرف وكان سعرهم حوالى 140
- بيضتين داخلي وبصراحة مش فاكر سعرهم لانهم مكانوش اصلي
وكان ميعاد صيانة السيور وجب فقولت بالمرة قومت شاري طقم السيور كله ( كاتينة + باور + تكييف + دينامو ) والبليتين.
وتوكلت على الله وروحت للمهندس هاني وبدانا الشغل وبصراحة الرجالة هناك عملوا الواجب وخصوصا وائل ( سريع وفاهم وايده مظبوطة ومش من النوع اللى بيتلخم ) وركبنا كل الحاجات دي في حوالى ثلاث ساعات.
بالبلدي كده عشان الناس اللى مش فاهمة الحاجات اللى انا جبتها دي بتركب فين.
المقصات طبعا معروف مكانها تحت الطنابير وهي عبارة عن قطعة حديد على شكل قريب من حرف الV وفي اطرافها في جلبة كوتش ( الجيتز في مقصين امامي فقط وده اللى بيخلي عفشتها ناشفة شوية مقارنة بعربيات تانية وفي عربيات زي الاودي ال A4 مثلا في 8 مقصات يعني مقصين في كل فردة ) .
البيض الداخلي هو عبارة عن دراع خارج من علبة الدركسيون ورايح على اسفل الطنبورة وبيركب في بيضة الطرف وبعدين تتربط في الطنبورة .
وطبعا السيور مكانها معروف .
المهم خلصت وطلعت اجرب لقيت العربية عاملة زي ( صافيناز ) وده طبعا لان العربية محتاجة ظبط زوايا بعد ما العفشة كلها اتفكت . روحت عملت ظبط زوايا والحمد لله حسيت بفرق كبير في الاتزان العربية وحسيت انها ماسكة نفسها طبعا احسن من الاول لكن لسة في بعض التخبيط وده بسبب علبة الدركسيون .
ادعولي اجيبها بسرعه عشان العربية ترجع تاني زي ماكانت من 200 الف كيلو :colsmil:
تقييمي للمركز بصراحة جيد جدا والخدمة والاهتمام ممتازين وعورت هاني في بيبسي كتييييييييييير وشاي واكل وكان ناقص يطردني .
في الاخر بقى هو عمل معايا واجب مكنتش اتخيله .
الحساب كان 350 ( مصنعيات + سير دينامو وبلية كاتينة جابهوملي هو سعرهم 120 ) فوجئت بيه بصلي وفضل يبص للورقة اللى في ايده وقالي مبلغ بعييييييييييييييييييييييي يد عن الـ 350 ( مش هاقدر اقول عشان هو حلفني ان ده ليا انا بس )
شكرا يا باشمهندس وشكرا لوائل واسامي وابراهيم
وشكرا ليكوا على استماعكوا للقصة دي