الموضوع: رسالة من عضو قديم في نايل موتورز (يا خسارة)

يا خسارة يا نايل موتورز كنت ومازلت بحب المنتدى دا جدا من ساعة ما انضميت لعضويته في 2007، لكن من ساعة ما السياسة احتلته حتى في مواضيع السيارات اصبح المنتدى سياسة موتورز مش نايل موتورز
البداية من وجهة نظري من ساعة ما تم انشاء الصفحة اياها (احوال الشارع المصري)
وهوووب المنتدى انقسم قسمين وناس كتير اتوقفت وخدت انذارات واصبح المنتدى مكان للتشاحن السياسي على الرغم من انه منتدى سيارات.
المصيبة ان المشاحنات خرجت من القسم دا واصبحت منتشرة في المنتدى كله، يعني اي موضوع مثلا عن عضو مش لاقي قطع غيار، او اسعار قطع الغيار زادت، تلاقي الردود كلها اسقاطات سياسية من عينة (بكرة تشوفوا ماسر) وخفة الدم اللي تلطش دي، وتلاقي ردود من المعسكر التاني بتشتم في فترة حكم الاخوان وان المصايب بدأت من ايام مرسي، وفي النهاية فين الموضوع؟؟؟ الموضوع بخ وبقت خناقة سياسية وخلاص

انا عن نفسي مش قادر ابطل ادخل على نايل موتورز، مكان عرفت فيه ناس محترمة واتعلمت فيه كتير وكونت صداقات مع ناس خارج المنتدى، بالوضع ده فعلا دخول المنتدى اصبح يمثل ضغط نفسي عليا، كل مادخل اشوف موضوع في اقسام السيارات الاقي معظم المواضيع اسقاطات سياسية، وبالتالي ارجوا لو كان سياسة ادارة المنتدى تحويل المنتدى لمنتدى سياسي، ان يتم تجميد او ايقاف عضويتي فيه، لأني بصراحة مش هاقدر الغي عضويتي بعد السنين دي كلها.
ويا خسارة يا نايل موتورز فعلا :(

المشاركة الأصلية كتبت بواسطة ahmed_ramadan

الراجل بيتكلم صح 100% ... لو حد عاوز يتكلم فى السياسة فيه قسم مخصوص للموضوع ده و اللى عاوز يتكلم أو يتخانق يروح هناك .... إنما باقى أقسام المنتدى مخصصة للنشاط الرئيسى للمنتدى و هو السيارات و مشاكلها و اللى فعلا الناس بقت بتدخل كل حاجة ليها علاقة بالسياسة فى مواضيع العربيات و ده غلط جدا و هيخلينا نبطل نفتحه واحد ورا التانى و فى الأخر محدش هيدخل عليه

أنا واحد من الناس من بعد قسم أحوال الشارع المصرى ما إتعمل مبقتش ببص حتي على الجزء اللى فى أول المنتدى خالص و ببدء من الأقسام اللى بعده و خلاص

الف شكر يا استاذ احمد، والله بهرب زي حضرتك من الاقسام العامة، لكن تلاقي السياسة ورانا ورانا

الواحد بقى بيخاف يعمل موضوع عشان هتلاقي ردود ملهاش دعوة بأي حاجة غير ان اصحابها عاوزين يحشروا السياسة في كل حاجة

وبستغرب من اللي يقول يجب ان نقبل الرأي الاخر!!! الرأي الاخر على راسي لو كنت بتكلم في السياسة او لو كان موضوع سياسي، لكن مش معقول واحد بيشتكي من مشاكل ازلية في بلدنازي سوء معاملة من توكيل، او ارتفاع اسعار العربيات، او قطع غيار غير اصلية، او ارتفاع اسعار قطع الغيار، او حتى تنبيه عن تحويلات في الطرق عشان اي حاجة، تلاقي الردود كتير منها اسقاطات سياسية.

زمان المنتدى ده كان منتدى تطلع منه بصداقات مش تطلع منه بمشاحنات :(

كنت اتمنى الكلام عن السياسة كله يكون في قسم (احوال الشارع المصري) فقط وباقي الاقسام تكون للأعضاء اللي فعلا زهقوا من السياسة وعاوزين يشبعوا هوايتهم في معرفة الجديد عن عالم السيارات

واسف للإطالة وشكرا وفي انتظار قرار المنتدى بخصوص عضويتي لو كنت بقول حاجة غلط