الوضع الاجتماعي للشخص في مصر

**amr100** · 08-06-2014 11:19 PM

الوضع الاجتماعي للشخص في مصر او النظرة الاجتماعية للشخص في مصر انا كاتب هذا الموضوع لإني كنت راكب مع سواق تاكسي و بيقول انه بكالوريوس تجار ة تقدير جيد والحمد لله معاه بدل من التاكسي اربع تاكسيات وايجار التاكسيات دي بتديله مبلغ ممتاز اخر الشهر ومع ذلك هو عاوز يشتغل و يكون عنده وظيفة علشان لما ييجي يحب يدخل ولاده مدرسة خاصة فاكيد ستعترض على الوضع الاجتماعي الخاص به واكيد الاعتراض مش هيكون في المدارس بس هيكون في اشياء اخرى هل تعتقدوا سيتم تغيير النظرة الاجتماعية في مصر والشخص اللي هيقول اه لما يحي عريس لبنتك سواق تاكسي هترضى بيه ولا تقول لا مينفعش علشان الوضع الاجتماعي انا ممكن اخده موظف ما اخدوش سواق تاكسي

**بحار** · 08-06-2014 11:41 PM

دى حكايه كبيرة قوى .. علشان نظرة الناس تتغير وتحترم الانسان لشخصة وليس لمهنته يبقى لازم ثقافة المجتمع كلة تتغير وعلشان تعرف ان النظرة دى متخلفه شويه ان الناس ممكن تتعامل مع شخص لابس كويس او بيدفع اكراميات كبيرة او علية اى مظهر ثراء تعامل مبالغ فية من الاحترام ولو عرفت بالصدفه مهنته مش ولابد تتغير النظرة فجأة مع ان هوه هوه نفس الانسان متغيرش . ولو ان بعض الدخلاء على المهن وطبائع الناس هيه السبب فى النظرة دى .. يعنى مثلا اقول لواحد جوز بنتك لسواق تاكسى ازاى وهوه شايف سواق التاكسى عمال يقلبة فى الرايحة والجايه كأنه اسير حرب !! ومعاملته زى البلطجى ( مش كلهم ولكن الاغلبية ) عن نفسى كنت بشوف سواق التاكسى زمان شخص محترم غالبا موظف ومتعلم وبيحسن دخلة بعد الظهر بالشغل ده .. لكن دلوقت حدث ولا حرج ..

**Mostafa.Mahran** · 08-06-2014 11:43 PM

للاسف احنا شعب بيحب المظاهر و بينسى الجوهر

**hugan** · 09-06-2014 12:43 AM

شيء في الجينات
موروث اصيل
انت وضعك الاجتماعي ايه

**mr_vampire** · 09-06-2014 02:50 AM

سواق التاكسي موظف زي اي موظف بيادي خدمة للناس. ولكن سلوكهم وتصرفاتهم هي اللي بتدي انطباع ان هذا السلوك لانه سواق تاكسي.

اذا انصلح سلوكهم اعتدلت نظرة المجتمع لهم..

انا ليا واحد صاحبي مهندس معاه جنسية امريكية وماشاء الله عربيات وعمارات ومش بيتكسف يقول وظيغة باباه.

سواق تاكسي بس في امريكا.

**khaled_sabry** · 09-06-2014 10:54 AM

المشاركة الأصلية كتبت بواسطة mr_vampire

اذا انصلح سلوكهم اعتدلت نظرة المجتمع لهم..

انا ليا واحد صاحبي مهندس معاه جنسية امريكية وماشاء الله عربيات وعمارات ومش بيتكسف يقول وظيغة باباه.

سواق تاكسي بس في امريكا.

زى ماحضرتك قولت - الموضوع موضوع المجتمع
سواق التاكسى فى امريكا مهنه مرموقه على فكره - و لو كنت شفت برنامج باسم يوسف بتاع امريكا بالعربى كان جايبلك شخصيات محترمه فى مصر و شغالين سواقين تاكسى و بياعين هوت دوج هناك و المهن دى محترمه جدااا هناك

فى انجلترا بقى مهنه سواق التاكسى دى بيتخانقو عليها زى الطب و الهندسه هنا - لإن بتدخل فى معهد و بتدرس فيه فتره و لازم تبقى حافظ كل شوارع البلد و التاكسى نفسه اللى هناك بتبقى عربيه مجهزه زى مثلا تقدر تاخد ملف اديق من العربيات الملاكى العاديه

**mmkhattab** · 09-06-2014 11:03 AM

المشاركة الأصلية كتبت بواسطة hugan

شيء في الجينات
موروث اصيل
انت وضعك الاجتماعي ايه

الرد دا يلخص الوضع في مصر
فغالبية المصريين أو بمعنى أصح العرب لديها نفس النظرة الطبقية إلا قلة قليلا جدا

**S O P H O S** · 19-06-2014 07:10 PM

حاليا مفيش مقياس للوضع
لان بسبب قلت العمل اصبحت الامور متلغبطه

**mcomics** · 19-06-2014 10:16 PM

التفرقة الاجتماعية دي آفه اصيلة في مصر، وعلى فكرة دي مشكلة في معظم الدول العربية والدول الحلوة بتاعة العالم الثالث كمان، إلا من رحم ربي . جرب كدة تروح تفتح حساب في بنك خاص وقولهم وظيفتي سواق تاكسي او فران، وشوف موظف البنك هيبصلك ازاي ويبتدي يغير طريقة تعامله معاك ٣٦٠ درجة!! ده اذا ما رفضش اصلا يفتحلك حساب حتي لو معاك فلوس. مواقف كتير تبين اد ايه احنا بقينا عنصريين في حتة الوضع الاجتماعي دي