طلعت الرخصة الدولية

**elpasha009** · 13-10-2008 04:00 PM

إمبارح طلعت الرخصة الدولية وقلت أحكيلكم على التفاصيل.بس قبل أي حاجة عاوز أقول حاجة مهمة جدااااااااااااا:
1-الرخصة الدولية غير مسموح إستخدامها في مصر نهائي ولا تغني عن الرخصة الخاصة.
2-النقطة ديه ناس كتير جدا إتكلمت فيها والأكيد بتاعها هو إن الرخصة الدولية تستخدم في البلاد المشتركة فيها لما يكون معاك تأشيرة زيارة أو سياحة فقط وتكون العربية مأجرة.لكن لو معاك إقامة أو العربية ملكك ممنوع إنك تستخدمها نهائي.
المهم التفاصيل للي عاوز يعرف هي:
1-رحت الإدارة العامة للمرور اللي جنب رابعة العدوية.تطلع الدور التاني إدارة البحث الجنائي وتسأل على مكتب الرخصة الدولية.مجرد إنك تديله رخصتك الخاصة والبطاقة وهيديك ورقة إسمها صحة بيانات مجانا وإنت واقف ويقولك تمضيها من المكتب اللي جمبه وبس.
2-تطلع على مكتب نادي السيارات الموجود في نص شارع طلعت حرب مابين جروبي وميدان التحرير الدور التالت (لو سألت أي حد هيدلك بسهولة) هتلاقي مكتب إسمه الرخصة الدولية أول متقوله السلام عليكم هيقولك جبت ورقة صحة البانات:).
3-المهم هتديله ورقة صحة البيانات والرخصة الخاصة وصورة الرخصة وصورتين شخصيتين و40 جنيه وهيديلك هو إستمارة تملاها (فيها البيانات الأساسية) وترجعهاله تاني ويديلك وصل ويقولمك تيجي بعد الساعة 1:30 وفعلا ترجع الساعة 1:30 هتلاقيها جاهزة.

معلومات مهمة:
-مواعيد العمل في نادي السيارات من الساعة 9 للساعة 1 لتقديم الطلبات.ومن 1 إلى 3 لإستلام الرخص.
-ممكن أي حد يقدملك الورق ويستلم الرخصة في النادي بشرط يكون معاه أصل الأوراق كلها والجواز بتاعك.بس أعتقد إن ورقة صحة البيانات اللي من المرور لازم تكون إنت بشخصك أو توكيل منك(مش متأكد من المعلومة).
-مفيش أي زحمة هناك خالص.وكمان فيه أماكن إنتظار لو معندكش حاجة تعملها في خلال وقت الإنتظار.
-لو رحت بدري (على 9 أو 10) 90% هتاخد رخصتك بعد ساعة أو نص ساعة يعني مش هتستنى لحد الساعة 1.

**elpasha009** · 13-10-2008 04:02 PM

نسيت أقول إن قائمة الدول المشتركة في الرخصة الدولية كبيرة مش هعرف أكتبها كلها.اللي عاوز يسألني على البلد اللي هيروحها وأنا أقوله مكتوبة ولا لأ.

**elgendy** · 13-10-2008 07:23 PM

الرخصه دي شبه الرخصه العاديه من حيث الشكل ولازم يكون معاك جواز سفر

**mondy2010** · 13-10-2008 07:27 PM

الف شكر ع المجهود و التوضيح

**Ayman_52** · 13-10-2008 08:01 PM

مبروك ......والصراحه اول مره اعرف المعلومه دى

الف شكر ياباشا

**حماده المصري** · 13-10-2008 08:05 PM

الف الف شكر ياباشا الموضوع ده انا كان نفسي اخد فكره عنه فعلا

عشان انا احتمال كبير اسافر الامارات

ونفسي اعرف الموضوع ده متاح في الامارات ولا لا

**elpasha009** · 13-10-2008 08:11 PM

أستاذ elgendy الرخصة ديه عبارة عن كتيب صغير في نفس حجم البطاقة القديمة كده تقريبا مكون من كذا صفحة مكتوب فيهم معلوماتك وصورة من الصورتين اللي إنت قدمتهم والبلاد اللي مشتركة في الرخصة.وزي مقولت في كلامي مش محتاج غير رخصتك والبطاقة وصورتين شخصيتين وصورة من الرخصة فقط.
أستاذ حماده المصري فعلا الإمارات مشتركة في الرخصة ديه وأنا مطلعها أصلا علشان مسافر الإمارات.بس بكرر تاني لازم يكون معاك فيزا سياحة أو زيارة فقط.وتكون العربية متأجرة.