كلاكيت تالت مرة ... التكييف زعلان ومزعلني
قبل كده من حوالي شهر ونصف التكييف عطل (الكمبروسر باظ) الحمد لله .. غيرت الكمبروسر بواحد إستيراد وغيرت الحساس والفلتر ونضفنا السربنتينة كويس وغيرنا فلترها .. الحمد لله إشتغل كويس لأكثر من شهر .
سافرت الصعيد وانا راجع من السفر شغلت التكييف مشتغلش وبعدين شميت ريحة شياط بسيطة .. ركنت على جنب فتحت الكبوت لقيت صوت المحرك عالي زيادة عن اللازم .. بعد ما رجعت روحت للميكانيكي لقي بلية الكمبروسر اللي بيركب عليها السير باظت وطالع منها زي المطاط وهي اللي بتعمل الصوت وريحة الشياط .
روحت للرجل بتاع التكييفات اللي جابلي الكمبروسر الإستيراد فغيرلي الكمبروسر ييجي 3 مرات وكل ما يجيب واحد يلاقيه مش راضي يشتغل ..
في النهاية جاب كمبروسر بيقسم بالله إنه حله بنفسه من عربية عند بتاع الإستيراد وجايبه بفيشه وخراطيمه ومساميره وكامل حاجته .
ركب الكمبروسر والحمد لله إشتغل زي الفل .. والماسورة ساقعة جداً .. ربع ساعة وفصل وبقى يلقط ثانيتين ويفصل وهكذا .. والماسورة تسخن .
الرجل حل السربنتينة وغير الفلتر بتاعها ونضفها كويس جداً هي وباقي الدورة وركب وشحن فتكررت نفس المشكلة ربع ساعة تكييف بمعنى الكلمة وبعدين يفصل .
طلعنا على فني تكييف في شارع معروف في وسط البلد إنتهى إلى ضرورة تغيير السربنتينة .... كان اليوم خلص فسبتهم وروحت على أساس أرجعلهم تاني يوم .. وانا ومروح عديت على فني تكييف كان الميكانيكي قاللي عليه إنه كويس .. كشف على التكييف وقاس الضغوط وحاجات كده ... وفي الآخر قاللي إما إن الفريون محروق وإما إن السربنتينة عايزة تتغير .
بصراحة أنا خايف أغير السربنتينة ويطلع الموضوع بعيد عنها ... فما رايكم دام فضلكم .. هل الموضوع فعلاً من السربنتينة ولا حاجة غيرها ..
