-
ال excel مبهدلانى
لو سمحتم ياشباب المنتدى المحترمين انا معايا excel 94 فيها كام مشكله عاوز اعرف سببها علشان والله الميكانيكيه عاوزين الحرق شويه بهايم محدش عارف يظبطها المهم ندخل فى الموضوع المشاكل ممكن يكون ليها اكتر من سبب وعلاج بس انا عاوز اعرف الاقرب هتعبكم معايا :
اولا: العربيه بتولع منى فى المشوير الخفيفه يعنى كيلو او 2 مع كام فرمله فى النص بلاقى عداد الحراره جى قبل النص والعربيه ولعت منى والمراوح بتشتغل بس بتفصل عادى روحت عند بتاع الريداتير قالى قشطه مفهوش حاجه ظبط التكيهات وكان فى صباب ظبط كله ومفش فايده والكهربائبه بقى يقولولى العربيه تمام فابريقه هيه كده العداد مظبوط والترموستات سليمه
ثانيا : العريبه بتغيب فى الدواره الصبح شتا او صبف يعنى بتدور بعد 4 او 5 مرات كده مع انى ظبط الكاربراتير ونضفته ومغير فلتر هوا وبنزين
ثالثا : العربيه مبتحبش بعد ال90 خالص هي 1300 والفتيس 5 سرعات غيرت طقم البوجيهات جبت واحد يابانى ومغير كل حاجه برضو
رابعا : العربيه حريقه بتشرب بنزين
انا اسف والله على الاطاله بس من غلبى وارجو الافاده
-
رقم 2 3 4
بيقولو ان عندك تسييل فى البكات
روح لواحد فنى كاربراتير
موضوع السخونية دة فية منة اسباب كتير ياريت تراجعها
1-الرداتير بايظ مسدود
2-المراوح بابظة او ضعيفة
3-الترمستات بتخرف
4-تسريب فى الدايرة
5-غطاء الرداتير
6-وش شلندر
انا قولتهملك بالترتيب راجع بقى واحدة واحدة
-
ربنا يخليك ياأستاذ فادى على الاهتمام يعنى الكاربراتير ممكن يعمل البلاوى السودا دى كلها ولا فى حاجه تانيه من الماتور بالنسبه للسخونه تقريبا مفيش مشكله فى المراوح المشكله ان العربيه بتسخن اوى الحراره ايه اللى بيوصلها لكده اصلا بس اكيد حاجه من اللى حضرتك قولتلى عليهم اصل المكانيكيه بتقولى العربيه مفهاش الهوا وهو ده الطبيعى
-
بص مشكله الخنقه والاستهلاك العالي ضبط كربيراتير وديه يتظبط انا ايام ماكانت معايا كنت صلحته عند ورشة الحاج ابراهيم كربيراتير في شبرا والعربيه كانت زي الفل لغاية مابعتها ومشكله السخونيه كانت عندي في العربيه الاكسيل ودخت زيك لغاية ماكتشفت أن الشكمان مسدود وشلت علبه البيئه اللي كانت السبب ولو عايز تتأكد من كده خدلك مشوار حلو بليل وقبل ماتبطل العربيه افتح الكبوت في حته ضلمه وبص على شجره الشكمان اللي خارجه من الموتور لو لاقيتها متوهجه وعاملة زي جمره النار أو الفحمه المولعه يبقى الشكمان مسدود وإن شاء الله خير
-
ياهتمان باشا والله كتر خيرك بس شجره الشكمان دى ابص عليها من تحت العربيه اللى هيه 3 مواسير كده طيب ممكن واحد بتاع شكمانات يبص ويعرفلى اذا كان فيه مشكله فى الشكمان ولا ايه والمشوار ده يكون طويل ولا قصير وأقرص على العربيه ولا لأ ولا المهم ان العربيه تسخن وخلاص وموضوع الكاربراتير ده انا جيت الاسبراى اللى بينضفه ده تمام ولا الكاربرتير ممكن يكون فيه مشكله اصلا يعنى بايظ مثلا
-
هو حضرتك لسه شاري العربية ؟؟
أصل اللي بتوصفه في موضوع درجة الحرارة ده المفروض هو ده الطبيعي ولو حصل حاجة تانية غير كده يبقى هو اللي مش طبيعي.
يعني إيه؟؟
يعني الطبيعي إن الموتور يسخن بسرعة ودرجة حرارة المية توصل لحد قبل النص .. وتثبت على الوضع ده.. وتلاقي المراوح بتشتغل وتفصل..
ده معناه إن ثرموستات الكوعة شغال مظبوط
على فكرة... نصيحة أخوية مخلصة... اوعى تشيل ثرموستات الكوعة.. ولو حصل في مرة إنه باظ لأي سبب.. لازم تشتري واحد تاني وتركبه
عايز تعرف ليه؟؟
اتفضل وادخل على الموضوع ده
http://www.nilemotors.net/Nile/328708-a.html
بالنسبة للسحب واستهلاك البنزين العالي.. فلازم تشيك على الكاربيراتير فعلا.. واتأكد إن البكات كلها نظيفة .. وغالبا الموتور محتاج يتظبط عند ميكانيكي بيفهم في الياباني.. ويكون عنده فكرة عن توصيلات الفاكيوم
اتأكد بردو من الفرامل عندك مش قافشة !!!!
أما بالنسبة للغياب في الدوارة.. فده له كذا سبب..
أولا.. العربيات الكربيراتير محتاجة "تكارك لها" كذا مرة قبل ما تدور خالص.. يعني قبل ما تدور الكونتاك خالص ابقى دوس بنزين "لحد الأرض" مرتين تلاتة .. وبعدين دور
ثانيا.. ممكن يكون فيه مشكلة في الرداخ (طلمبة البنزين).. وده ممكن يأثر على سحب العربية واستهلاك البنزين بردو
ثالثا.. اتأكد من الموبينة وأسلاك البوجيهات.. الموضوع مش بوجيهات وبس. . ودول بردو بيأثروا على السحب واستهلاك البنزين
رابعا.. لو الاسبيراتير عندك إلكتروني يبقى اتأكد انه بيدي توقيت الإشعال مظبوط.. ولو اسبيراتير عادي من اللي فيه أبلاتين وكوندنسر.. اتأكد إنه مظبوط بردو وغير الأبلاتين والكوندنسر.
وطمنا إيه الأخبار
...
-
الف شكر ياأستاذ بوريو وربنا يخليكم ليا ياجماعه والله انا هعمل كل اللى انتو قولتولى عليه وهبقى اقولكم ايه الاخبار بس شويه بس علشان الموضوع ده شكله عاوز شويه فلوس حلوين وبالنسبه للعربيه انا جيبها من سنه ونص بس اللى هيجننى انها بتسخن اوى فى المشاوير القصيره اوى بس هجرب واقولكم
Content Relevant URLs by
vBSEO 3.6.0 PL2