الموضوع: فيــرنـــــــــــــــا !!!

عندى سيـارة شخصية من نوع تويوتا كورولا 2008 ...

بس الشركة التى بشتغل فيها عطتنى سيارة فيرنـا 2009 للقيام بعملى فى ( التسويق ) حيث أعمل فى شركة كبيرة للكيماويات الزراعية ...

وعانيت بشدة لمجرد تصور قيـادة السيارات الكورية بعد الاعتياد على قيادة السيارات اليابانية

فما بالك بقيـادة سيـارة كورى مانيوال بدلاً من سيارة يابانى أتوماتيك ؟!!

وما بالك بقيادة سيارة ( عجوزة ) عاملة 350 ألف كيلو متر قبل كـده ؟!!

الشركة بصراحة قالت لى اصرف عليها زى ما انت عايز عشان متعملش معاك حاجة فى الطريق ( شغلى فى منطقة الصحراوى وأجواره )

المهم ، رحت عامل فيها الآتى :

1- غيرت زيت وفلتر زيت وفلتر الهواء وفلتر البنزين
2- غيرت كل السيور ( تكييف وباور وكاتينة ) وغيرت البليتين بتوع الكاتينة معاهم
3- غيرت طقم الكاوتش بالكامل بكاوتش بريدجستون جديد
4- شيكت على العفشة كلها ( غيرت بيض الدركسيون والكاوتشات وعليت العربية من ورا بكاوتش تعلية )
5- غيرت تيل الفرامل ورا وقدام وعملت للطنابير الخلفية ( وش نضافة ) فى المخرطة
6- سلكت الرادياتير ونضفت الإربة وحطيت ميه خضرا
7-غيرت بلية كمبروسر التكييف كانت خشنة جداً وغسلت التلاجة وغيرت فلتر التكييف وشحنته بالفريون
8- شيكت على كهربا العربية كلها ( أنوار وسنتر وكده :) )
9- عملت فيها شوية سمكرة خفيفة من خبطات قديمة !
10 - غيرت البوجيهات وزيت الفتيس

وطبعاً عملت فيها حاجات كتير من ناحية النضافة الداخلية والخارجية بس حبيت أقولكم على الحاجات الأساسية !

ومشيت بالعربية أخيراً بعد التعديل ، وطلعت بانطباعات إيجابية وسلبية :

العربية سحبها كويس جداً لدرجة استغربت ليها ! كويسة جداً فى المطبات ! التكييف بتاعها ممتاز ! ناعمة وسلسة على الطريق فى السرعات العادية ! مش بتاكل بنزين ! شنطتها كبيرة !

من عيوبها : صوت المكنة عالى ! مش ثابتة فى السرعات العالية ! الفتيس بتاعها بيعض ! الدبرياج تقيل شوية ( أو يمكن أنا اللى مش متعود على المانيوال !! )

وطبعاً بعربية عاملة 350 ألف كلم الواحد يبوس إيده وش وضهر على العيوب دى بس !

المهم فضلت حوالى شهرين ماشى بيها كفاءة ومعملتش معايا أى حاجة وحشة بس أول امبارح وأنا جاى بيها من الشغل حوالى الساعة 8 بالليل وعلى الكورنيش لاحظت إن أمبير الحرارة رفع على الآخر !!

استغربت جداًَ ! طيب ده أنا بمشى بيها فى عز الحـرّ ومسخنتش منى يبقى تسخن بالليل والجو كان تحفة ؟!

المهم وقفت بيها فوراً وشفت الميه لقيتها ناقصة شوية صغيرة ! مش هيا اللى تسخن المكنة يعنى !!

زودتها مية عادية وقفلت التكييف لقيت الأمبير رجع تانى فى النص ( العادى بتاعه )

مشيت بيها شوية لقيت الأمبير رفع تانى !! إيه يا عم مالك مش لسة مشربك ميه ؟!!

نزلت لقيتها ناقصة شوية ميه صغيرة برضه ! جات لى فكرة مخيفة ! مش يمكن المكنة جابت جوان ؟! كشفت بسرعة على الزيت لقيته نضيف ومش ( مطحّن ) يعنى مش عليه ميه ! وكمان الرادياتير مش بينفخ ولا يغلى وبصراحة مش حاسس بأية حرارة فى الموتور زيادة عن اللازم !!

بس عمنا الأمبير شايف غير كده !!

امبارح الصبح رحت لواحد ميكانيكى معرفة جنبى فى ميامى قعد يدور فيها على أى تسريب فى أى خرطوم ملقاش !

الناس اللى كانت عنده بتصلح عربياتها اتلمت علىّ وقعدت تنصحنى مشكورة وتحاول تحل معايا المشكلة ( جدعنة المصريين بقى :) )

واحد قالى : بص يا هندسة أكيد الرادياتير بتاعك عايز يتغير !

واحد تانى قالى : اكشف على طلمبة الميه يا ذوق وغيرها !

واحد تالت قالى : كان عندى فيرنا وعملت كده معايا وغيرت ترمستات الكوعة وبقت تمام !

بصراحة كثرة النصائح خلتنى أحتار قلت أسألكم هنا لأنى بصراحة مليش فى الفيرنا :(

مســــــاء الفــــل :)